Қазақстандық боксшы Геннадий Головкин мен мексикалық Сауль Альварес арасындағы екінші кездесу өтпейтін болды. Бұл туралы Golden Boy Promotions промоутерлік компаниясының президенті Эрик Гомес пен Альварестің өзі Лос-Анджелесте өткен баспасөз мәслихатында айтты. Айқастың өтпейтініне негізгі себеп – мексикалық боксшының допинг дауына іліккені болып тұр.
«5 мамырға жоспарланған екінші кездесуден бас тарттық. 18 сәуір күні комиссия тыңдалымы өтіп, ресми шешім шығады. Өкінішке қарай, одан кейін 5 мамырға дейін жекпе-жекті кең көлемде жарнамалауға уақыт аз», деді Эрик Гомес.
Айта кетейік, Сауль Альварес 17 және 20 ақпан күндері кленбутеролды анықтайтын допинг-тест тапсырып, ол оң нәтижені көрсеткендігі үшін бокстан уақытша шеттетілген-ді. Осыдан екі апта бұрын Невада штатының атлетикалық комиссияның атқарушы директоры Боб Беннетт Альварес дауына байланысты комиссия отырысы 18 сәуірде өтетінін айтқан еді.
Екі боксшының арасындағы екінші кездесу 5 мамырда Лас-Вегаста өтуі тиіс болған.
