Іс-шараға Ауыл шаруашылығы министрлігі Ветеринарлық бақылау және қадағалау комитеті төрағасының міндетін атқарушы Тұрсын Қабулданов қатысып, министрлік Мемлекет басшысының тапсырмасын орындау аясында отандық өнімдерді ілгерілету және тауарлар-
ды халықаралық нарықтарға шығару мақсатында стратегиялық іздеу жұмыстарын жалғастырып отырғанын жеткізді.
«Ауыл шаруашылығы министрлігі мал шаруашылығы өнімдерін экспортқа шығару бағытында кешенді жұмыстар атқаруда. Оның ішінде көршілес Қытай еліне экспортқа шығару мәселелері қарастырылуда. Қытай Халық Республикасының сапа бақылау және карантин басқармасының сайтында Қазақстанның 9 облысынан ҚХР-ға мұздатылған қой етін импорттауға ресми шешім қабылданған ақпарат шықты. ҚХР-дан 2017 жылы Қазақстанның 5 кәсіпорны инспекция жасалып, тексеріліп, олар Қытай Халық Республикасының реестріне енгізілген. Бүгінгі күні Қазақстанның 9 облысынан 5 кәсіпорын арқылы Қытайға қойдың мұздатылған етін экспорттауға жол ашылды», деді Т.Қабулданов.
Қытай Халық Республикасына мұздатылған қой етін экспорттайтын 9 облыстың ішінде Қарағанды, Батыс Қазақстан, Ақтөбе, Атырау, Павлодар, Қостанай облыстары бар. Аталған аймақтар аусыл ауруларына қарсы вакцина егілмейтін таза өңірлер болып саналады.
«Сонымен қатар Иран елімен де хаттама толтырылған. Ветеринарлық сертификаттары келісілген. Былтыр ол елге 4800 бас қой тірідей жөнелтілді. Және Сауд Арабиясымен де келісім шаралары жүргізіліп, өткен жылы Біріккен Араб Әмірліктеріне 3400 бас қой тірідей экспортталды. Оның сыртында осы елге сиыр мен қой еті де жөнелтілді. Сондай-ақ Қытай еліне бірінші рет 2017 жылдың желтоқсан айында 153 бас асыл тұқымды қолданыста болатын жылқылар тірідей экспортталды», деді комитет төрағасы.
Рауан ҚАЙДАР,
«Егемен Қазақстан»
