Фото: автор
Қатысушыларды ең алдымен Шығыс Қазақстан облысының әкімі Даниал Ахметовтің атынан әкім орынбасары Әсем Нүсіпова құттықтады.
«Құрметті жастар, сіздердің осы сайысқа белсене қатысып, республикалық деңгейде өтетін чемпионатқа жолдама алуларыңызға тілектеспін. Біздің облыс техникалық мамандық иелерін даярлауға әлеуеті жоғары аймақ болып табылады. Сондықтан да мектеп, колледж бітіруші түлектер осы салаларда еңбек етіп, жұмыс істеуіне барлық мүмкіншілікті жасаймыз. Жұмысшы жастардың қанатын қатайтып, биікке шығаратын WorldSkills бағдарламасының болашағы зор» делінген Шығыс Қазақстан облысы әкімнің құттықтау хатында.
– Айта кету керек, бұл сайыс жыл сайын біздің облыста кеңінен қанат жайып келеді, – деді облыс әкімінің орынбасары Әсем Нүсіпова.Мәселен, 2016 жылы WorldSkills сайысы жеті сала бойынша өткізілсе, 2017 жылы он бір сала бойынша қолға алынды. Ал, биыл міне, 31 саланы қамтып отырмыз. Біздің өңірде жұмысшы жастар даярлауға мүмкіндік зор. Әрине, колледждер түлектерінің 85 пайызы толық жұмысқа орналасып кетеді. Әсіресе, құрылысшы, шаштараз, кондитер, ауылшаруашылық мамандарына деген сұраныс жоғары. Өткен жылы КазЦИНК-пен келісімшартты бекіттік. Сөйтіп жастар оқи жүріп, ірі кәсіпорындарда еңбек ете алады. Биыл осы сайыс Семей машина жасау зауытының негізінде ұйымдастырылып отыр. Балалар өздеріне керекті мамандықты оқып жатқандықтарын сезіну керек. Сөйтіп республикалық сайысқа жолдама алған кезде тың дайындықта болады. Әрине, былтыр халықаралық деңгейге дейін көтерілгендер бар. Бірақ, ағылшын тілін еркін білмеуі оларға біршама кедергі болды. Біз әлі де жастарымызды осындай алқалы жиындарға талпындырамыз, олардың түрлі сайыстарға белсене қатысуына ықпал етеміз.
– Бұл облыстық білім басқармасының тікелей ұйымдастыруымен қолға алынған шаруа, – деді Шығыс Қазақстан облыстық техникалық және кәсіптік білім беру және мамандарды даярлау орталығының директоры Ришат Рамазанов. Бүгінгі шараға облыстан 35 колледж және бір кәсіпорын қатысып отыр. Колледждер 31 бағыт бойынша сайысады, бұл қоғамдық қызмет көрсету, техникалық біліктілік, құрылыс саласы дейсіз бе, жалпы жұмысшы мамандығына қатысы барлар өз біліктіліктерін көрсетпек. Және алған білімдерін ортаға салады. Бұлардың барлығы да экономикамен тікелей байланысты мамандықтар. Бұл облыс бойынша осындай ауқымды түрде тұңғыш рет қолға алынған шара. Салыстырмалы түрде айта кетсем, былтыр республика бойынша 30 түрлі салада сайыс өтіп, оған 140 адам қатысқан еді. Биыл облыстық деңгейде өтіп жатқан осы жиынға 31 түрлі сала мамандары бас қосып, 150-ден астам студент қатысты. WorldSkills бұл әлемдік қозғалыс, Еуропада пайда болған. Соғыстың соңғы жылдары елде маман тапшы болып, жұмысшыларды оқытып, үйрету керек болған кезде осы WorldSkills бағдарламасы қолға алынды.
Жеңіл көліктерді жөндеу саласы бойынша сайысқа қатысушыларды сараптаушы Дмитрий Колмаков Риддер аграрлық-техникалық колледжінің оқытушысы екен, оның айтуынша көліктерді ең алдымен компьютерлік диагностикадан өткізуді білу керек. Екіншіден, жеңіл автокөліктің қорабын тексеріп, шашып, қайта жинап үйрену қажет. Бұлардың барлығы қатысушы жастарға қойылатын талаптар.
– Парижде мен 2017 жылы болдым, – деді шебер шаштараз атанған Владимир Дубинин. Өскеменде және Мәскеуде «Авеню» атты шаштараз салоным бар. Әрине, мен басқа мамандық бойынша жоғары білім алдым. Бірақ, шаштараздық өзіне тартып тұрды. Бес жыл университетте кәсіпорындардың аудиторы мамандығын меңгердім. Бірақ, жарты жыл қарапайым шаштараздыққа оқығанымда ғана көңілім көншіді. Адам өзінің сүйікті ісін тапса болғаны екен.
– Біз Аягөздегі политехникалық колледжден ұжымымызбен келдік, – деді аталмыш колледж директоры Берікжан Оралғазыұлы. Аймақтық чемпионатты өткізудегі мақсат – үміткерлерді кәсіби құзыреттілікке қойылатын халықаралық талаптармен таныстыру, топпен жұмыс істеу дағдыларын қалыптастыру және жоғары білікті жұмысшы мамандардың мәртебесін көтеру.
Чемпионатқа қатысушылар кәсіби шеберлік тәжірибесін кеңейтуге, халықаралық деңгейдегі оқыту технологиялары және жаңа кәсіби стандарттармен танысуға мүмкіндік алмақшы. Сайысқа 18-22 жас аралығындағы ШҚО ТжКББ жүйесі оқу орындарының студенттері және жұмыс істейтін жастар қатысып отыр. Жиынды ұйымдастырушылардың қатарында Шығыс Қазақстан облыстық білім басқармасы басшысының орынбасары Айгүл Байжанова, Семей қаласындағы Жастар ресурстық орталығының директоры Олжас Соғымбай бар. Жарыс қорытындысында WorldSkills чемпионатының барлық деңгейі бойынша даярланудың іс-әрекет алгоритмдері құрылатын болады.
«Рухани жаңғыру» бағдарламасы аясында бастау алған халықаралық «World Skills Shygys-2018» сайысы Семей машина жасау зауытында жалғасын тапты. Сайысты ұйымдастыруға белсене атсалысушылардың бірі Семей машина жасау зауыты АҚ-тың директоры Нұрлан Омаровтың айтуынша, мұндай шараларға кәсіпорындарымыз қолдау білдіргені жөн. Себебі қазірде шығарылып жатқан өнімдеріміз шетелдерге де сатылып жатыр. Сондықтан нарық заңдылығында кез келген тауардың сұранысы талапқа сай болу керек. Ол үшін жоғары білікті мамандар қажет.
– Бүгін осынау «World Skills Shygys-2018» сайысы барысында жастар «Дәнекерлеуші», «Құрастырушы», «Киім үлгілерінің дизайнері», «Шаштараз», «Аспаз» мамандықтарын еркін меңгергендіктерін көрсетеді, – деді облыс әкімінің орынбасары Әсем Нүсіпова. Сарапшылар ішінде «СемАЗ» ЖШС, «Азимут» ЖШС, «Парасат Энерго» ЖШС, «Қазақтелеком» АҚ сияқты көптеген кәсіпорындардың білікті мамандары бар. Бұларда жастарымыздың да жұмыс істеп жүргендігін айта кету керек. Себебі білімді әрі өнерлі, талантты болу кез келген жастың талаптануына байланысты дүние.
Елбасы Нұрсұлтан Назарбаевтың «Рухани жаңғыру» бағдарламасы аясында бастау алған халықаралық «World Skills Shygys-2018» сайысының Семейдегі облыстық кезеңі осылайша бірнеше күнге созылып, өз мәресіне жетті. Қатысушылар осы күндердің ішінде Семей машина жасау зауытында түрлі бәсекелерден сынға түсті.
Салтанатты шарада Шығыс Қазақстан облысының білім басқармасы басшысының орынбасары Айгүл Байжанова облыс әкімінің арнайы марапат қағазын сайысты ұйымдастыруға белсене атсалысқан Семей машина жасау зауыты АҚ-тың директоры Нұрлан Омаровқа табыстады.
Сондай-ақ Семейдегі көптеген кәсіпорындар мен шағын кәсіпкерлік жетекшілері де осы сайысты облыстық деңгейде ұйымдастыруға ниет білдіргендіктері үшін мақтау қағаздарымен марапатталды. Ал «World Skills Shygys-2018» бойынша «Флористика» саласынан бірінші орынға Жадыра Мұхаматқалиева ие болды. Нан пісіруден Елена Бородулина, аспаз ісінен Сергей Шинко жеңімпаз аталып және тағы да басқа жүздеген жастар өз салалары бойынша алға озып шықты.
«World Skills Shygys-2018» сайысының қорытындысында жастар «Дәнекерлеуші», «Құрастырушы», «Киім үлгілерінің дизайнері», «Шаштараз» мамандықтарын еркін меңгергендіктерін көрсете білді. Жеңіске жеткендерді республикалық «World Skills Kazakhstan-2018» жобасының менеджері Анар Тлеумағамбетова құттықтап, ұлттық чемпионатқа жолдама алғандарға сәт-сапар мен игі табыстар тіледі.
Раушан НҰҒМАНБЕК,
журналист
Семей
