Еңбек пен ерлік жоғары бағаланды

Жиынға қатысушыларға арналған сөзінде Елбасы Қазақ­станда Отан қорғаушы күні мен Жеңіс күнін мерекелеудің маңыз­дылығын ерекше атап өтті.
«Баршаңызды келе жатқан Отан қорғаушы күнімен және Ұлы жеңіс мерекесімен шын жүрегіммен құттықтаймын. Ерлік пен патриотизмге дәріптейтін осы айтулы мерекелер биыл Астана­ның 20 жылдық мерейтойымен тұспа-тұс келіп отыр. Қазақта «Елді қорғау – ердің ісі, ерді қолдау – елдің ісі» деген қанатты сөз бар. Сондықтан бүгін сіздерге жетістіктеріңіз және халыққа үздік қызметтеріңіз үшін арнаулы атақтар мен шендерді тапсырғалы отырмын», дей келіп, Елбасы мінсіз әске­ри қызметі мен ерен еңбегі­мен ерекшеленген азаматтарға да еліміздің жоғары дәрежелі ор­ден, медальдарын тапсырғалы отыр­ғанын айтты.

 «Біз ширек ғасырдан астам уақыттың ішінде антқа берік, аманатқа  адал айбынды армиямызды тәрбиелеп, оны жабдықтап келеміз. Сайыпқыран сарбаздарымыз бен сардарларымыз қастерлі тәуелсіздігіміздің қор­ғаны бола білді. Осы міндетін жалғас­тыра береді деп сенемін. «Ұраны бар елдің ұланы бар». Ұйытқысы берік ұландарымыз әскери әлеуетті нығайтып келеді. Баһадүр бабалардың ерен еңбегін егемен елдің ерлері лайықты жалғастырды», деді Н.Назарбаев. 

Сондай-ақ әлемде белең алып келе жатқан тұрақсыздық жағ­дайында мемлекеттің әскери-күш саласы ерекше маңызға ие болатынын айтты. «Біздің әскеріміз бен құқық қорғау құры­лым­дарымыз ел қауіп­сіздігі­нің берік қалқаны әрі егемен­дігіміздің мызғымас ке­пі­лі болып саналады. Мемлекет бар­ша қазақстандықтардың бейбіт өмірі мен тыныштығын сақтау жолындағы сіздердің ерліктеріңіз бен қажырлы еңбектеріңізді жоға­ры бағалайды», деді Мем­лекет басшысы.

Рәсім барысында Мемлекет басшысы жоғары әскери шендерден бөлек арнаулы атақтар да тапсырды. Мұндай марапатқа елі­міздің бейбіт өмірі мен тыныш­ты­ғын сақтайтын әскер мен арнаулы қызметтердің өкілдері ие болды. 

Сонымен, Қорғаныс ми­нистрі­нің орынбасары Талғат Жан­жүменов генерал-лейтенант әскери атағына ие болды. Ал Ұлт­тық қауіпсіздік ко­ми­теті төраға­сының орынбасары – Терро­ризмге қарсы қызметінің бастығы Нұрғали Білісбеков пен Ұлттық қауіп­сіздік комитеті төрағасының орын­басары – Қарсы барлау қыз­меті­нің бастығы Марат Өсіпов Ұлттық қауіпсіздік генерал-лейтенанты арнаулы атағын алды.

Сондай-ақ генерал-лейте­нант шені «Сырбар» Сыртқы бар­лау қыз­метінің директоры Ғабит Бай­жановқа берілді. Бас про­курор­дың орынбасары Ерлік Кенен­­баев 2-сыныпты мем­лекет­­­тік әділет кеңесшісі шенін иеленді. 

Бұдан бөлек, генерал-майор әскери атағы Ұлттық ұлан­ның «Орталық» өңірлік қолбас­шы­лығы қолбасшысының бірін­ші орынбасары – штаб бас­ты­ғы Ұлар­бек Абыкеевке, «Батыс» өңір­лік қолбасшылығы әскер­лері­нің қолбасшысы Қаныш Әбу­­б­әкіровке, Ұлттық ұланның «Шығыс» өңірлік қолбасшылығы қолба­сшысының бірінші орынба­сары – штаб бастығы Дмитрий Боча­ров­ке, Қорғаныс министрлігі Кадр­­л­ар және әскери білім беру депар­таментінің бастығы Қай­рат Көп­баевқа, Ұлттық қауіп­­сіз­дік комит­еті Шекара қыз­­меті­нің «Оң­түстік» өңірлік бас­қар­­ма­сының бастығы Арман Қалиев­­ке және Серік Ізтілеуовке берілді. 

«Бүгін Елбасының қолынан жоғары шенді әскери атақ алу біз үшін зор құрмет. Отанымыздың қорғаныс саласын нығайтуда және бейбітшілік өмірімізді сақ­тауда қызмет етіп жүрген офи­цер­лерді бағалағаныңыз үшін ал­ғысымыз шексіз. Елдің сенімін ақтауға ант етеміз», деді Қ.Әбу­бәкіров марапаттау барысында. 

Сонымен қатар Әуе қорғаныс күштері бас қолбасшысының орынбасары Евгений Подгай­скийге авиация генерал-майоры әскери атағы, ҰҚК Қарсы барлау операциялары департаментінің басшысы Сабыржан Оңғарбаев пен ҰҚК Терроризмге қарсы қызметі Халықаралық терроризмге және діни экстремизмге қарсы күрес департаменті басшысы Бақытбек Рақымбердиевке ұлттық қауіпсіздік генерал-ма­йоры арнаулы шені, «Сырбар» Сыртқы барлау қызметі дирек­торының орынбасары Нұрлан Оразовқа сыртқы барлау генерал-майоры арнаулы атағы табысталды. Ақтөбе облысы Ішкі істер департаментінің басшысы Махамбет Абисатов, ІІМ Криминалдық полиция депар­таментінің басшысы Арманбек Бай­мурзин, ІІМ Көші-қон қыз­меті комитетінің төрағасы Мұрат Қабденов, Ішкі істер ми­нистрі­нің бірінші орынбасары Жанат Сүлейменов полиция генерал-майоры арнаулы шеніне ие болды. Астана қаласының прокуроры Болат Дембаев пен Алматы облысының прокуроры Азамат Жылқыбаевқа 3-сыныпты мемлекеттік әділет кеңесшісі сыныптық шені, Сыбайлас жемқорлыққа қарсы іс-қимыл ұлттық бюросы басшысының орынбасары Дулат Әзбергеновке 3-санатты жоғары біліктілік сыныбы атағы табысталды.

Бұдан бөлек, рәсім барысында ІІ дәрежелі «Даңқ» орденімен Мұхамеджан Таласов, Марат Құсайынов, Мұхаметқали Сатов, Қайрат Жақыпбаев ма­ра­пат­талды. Сонымен қатар І дәре­желі «Айбын» ордені Дулат Кұр­машев пен Асхат Тө­леуовке берілді. «Құрмет» ордені Эльмира Омарова­­ға табысталды. 

«Қоғамдық тәртіпті және қауіп­­сіз­дікті нығайтуға зор үлес қосқан Дулат Құрмашевты ерекше атап өткім келеді. Аса қауіпті қыл­мыс­керлерге қарсы арнайы опера­ция­ны басқарып, өткізген оны бірін­ші дәрежелі «Айбын» орде­ніне лайық деп санадық», деді Елбасы. 

Мемлекет басшысы II дәре­желі «Айбын» орденімен Жасұлан Жақыповты, Андрей Калининді, Дмитрий Пластовецті марапаттады. «Қызметін мінсіз атқарып, әскери білімге білікті басшылық жасағаны үшін Жасұлан Жа­қыпов­қа екінші дәрежелі «Ай­бын» ордені беріледі. Биыл құр­лық әскерлері арасында өткен коман­далық дайындық нәтижесі бо­йын­ша ол бірінші орынға ие бол­ды», деді  Президент. 

Балаларды өрттен құтқарған сарбаз Ғалымжан Әлеухановқа «Ерлігі үшін» медалі берілді. Бұл жөнінде Елбасы «Бейбіт күнде басын қатерге тігіп, екі баланы өрттен құтқарған Ғалымжан Әлеуханов ерен ерлік көрсетті. Оның бұл ісі барша жұртқа үлгі. Сол себепті «Ерлігі үшін» медалі­мен марапатталады», деді. 

Сондай-ақ өрттен екі баланы құтқарып қалған ІІМ Қарағанды облыстық төтенше жағдайлар департаментінің бөлімше командирі Виталий Калмыков та «Ерлігі үшін» медаліне ие болды. «В.Калмыков жанкештілігінің арқасында алаулаған өрттен екі баланы құтқарды. Осы ерен еңбегі үшін оған «Ерлігі үшін» медалі табысталады», деді Президент.

«Әскери қызметте кәсіби біліктілік танытқан Нұрлан Зал­мұқанов «Жауынгерлік ерлігі үшін» марапатталды. Соңында Мемлекет басшысы салтанатты шараға қатысушылардың барлығын Отан қорғаушы күнімен және Ұлы Жеңіс мерекесімен құттықтады. Іс-шарадан кейін Елбасы марапатқа ие болғандармен естелік суретке түсті. 

Абай АСАНКЕЛДІҰЛЫ,
«Егемен Қазақстан»