«СарыарқаАвтоПром» автозауыты қарайтын «Аллюр» компаниясы бүгінде JAC шассиі базасындағы N сериясымен коммуналдық техникалардың 9 моделін шығарады, ал Iveco 682 шассиы базасында коммуналдық машиналардың құм шашатын, бетон араластыратын, өзі аударғыш секілді үш моделі шығарады. Өткен жыл осындай сынақтық алғашқы 96 коммерциялық техника сапқа қойылды.
«СарыарқаАвтоПром» зауыты өндірісті жыл сайын кеңейтіп және жаңғыртып келе жатыр. 2017 жылы тұтынушылардың сұранысына қарай тұрмыстық және өнеркәсіптік қоқыстарды жинап, шығаратын техникаларды жасап көруге бел байлаған. Коммуналдық машиналардың алғашқы легі «Таза-Әлем Астана» жауапкершілігі шектеулі серіктестігіне берілді. Онда машиналардың тиімділігі сыналды.
Қоқыс таситын, жинайтын коммуналдық машиналар құралдың негізгі бөлігіне қондырма салу есебінен Iveco 682 және JAC шассиы N сериясы базасында өндіріледі. Мұндай қондырма салған көліктерді 7 жылға дейін еш жөндемей пайдалануға болады. Машиналардың бөлшектері Ресейден, Түркиядан, Еуропа елдерінен әкелінеді. Олардың ең негізгі бөлшектерін өзгертіп, қондырма салу арқасында қазақстандық үлес, яғни қостанайлық зауытта атқарылатын жұмыс 35 пайызға дейін жеткізіледі. Қазақстандық зауытта жасалған қоқыс таситын машиналардың беріктігін күшейту үшін 6-7 мм болат пайдаланылады. Сонымен қатар контейнерді жуатын қосымша құралмен жабдықталады. Ол үшін техни-каға су құятын бак орнатылады.
– Біздегі технологиялар бойынша өндірілетін қондырғылар Ресей нарығында жеті жылдан бері пайдаланылып келеді, сапасы жақсы. Бұған дейінгі сынақ көрсеткендей, кіші көлемде жасау арнайы техникалардың қызметін азайтпайды. Шағын қоқыс таситын техникалар үлкен қалалардағы тығыз салынған үйлер мен басқа ғимараттар арасында жұмыс істеуде тиімділігін көрсетті. Аз тонналық машиналар жолы тар қалаларда жеңіл жұмыс істейтін болады, – деді «Allur Auto Astana» ЖШС қызметкері Александр Цой.
Тиімділгі сыналған қоқыс таситын машиналар алдағы уақытта жеке сұраныспен де жасалатын болады. Мұндай техника тек өзіміздің нарыққа ғана емес, экспортқа да шығарылады. Коммуналдық шаруашылықтардың тиімділігі жоғары техникаға қол жеткізуі үшін жеңілдігі бар лизинг бағдарламалар да іске қосылмақ.
Нәзира ЖӘРІМБЕТ,
«Егемен Қазақстан»
ҚОСТАНАЙ
