Жиынға қатысқан Дін істері және азаматтық қоғам министрі Дархан Калетаев Азаматтық альянс Қазақстандағы азаматтық саланы дамытушы күштердің бірі болып қала беретініне тоқталды. «Бұл құрылым еліміздің барлық өңірлеріндегі үкіметтік емес ұйымдардың белсенді және тәжірибелі көшбасшыларын біріктіре алады, сондай-ақ халықаралық ұйымдармен, бизнес және мемлекеттік органдармен бірлескен тиімді жұмысты ұйымдастыруды қамтамасыз етеді», деді Д. Калетаев. Сонымен қатар министр үкіметтік емес сектордың тұрақтылық деңгейін көтеру және үкіметтік емес ұйымдар мен мемлекет арасындағы конструктивті байланысты орнату бойынша атқарылып жатқан жұмыстар туралы айтып өтіп, коммерциялық емес ұйымдардың қызметі туралы заң жобасының негізгі жаңашылдықтарына тоқталды.
Жиында Қазақстанның Азаматтық альянсымен бірлесе жүзеге асыру үшін бірқатар нақты бастамалар ұсынылды. Атап айтқанда, азаматтық қоғамды дамыту саласындағы заңнаманы жетілдіру және азаматтық секторды дамыту жөніндегі Жол картасын іске асыру жұмыстарында Азаматтық альянстың әлеуетін барынша пайдалану мәселесі көтерілді.
Сонымен қатар конференцияда үкіметтік емес ұйымдарды қайта тіркеуден өткізу туралы ұсыныс талқыланды. Елімізде 20 мыңнан астам ұйым тіркелген көрінеді. Қаржы және Әділет министрліктері жүргізген тексеруден кейін олардың 8 мыңдайы мүлдем жұмыс істемейтіні анықталған.
Венера ТҮГЕЛБАЙ,
«Егемен Қазақстан»
