– Бүгін біз үшін айтулы күн. Бұған дейін кішкентай науқастарымыз барлық пән бойынша палаталарында білім алып келсе, енді осы сыныпта білімдерін жалғастырып қана қоймай, бос уақыттарын мәнді өткізе алады. Сурет салу, конструктор құрау, ағылшын тілін үйрену, дойбы, шахмат үйірмелері жұмысын бастайды. Бұл балалардың тезірек жазылып, сауығып кетуіне оң әсерін тигізеді деп сенеміз, – деді инновациялық сыныптың тұсаукесерінде орталық директоры Риза Боранбаева.
Инновациялық оқу бөлмесі онкологиялық дертке шалдыққан балаларға арналған. Орталықта бүгінгі күні жүзден астам бала ем қабылдап жатыр.
Ғылыми орталықтың мұндай игілікке қол жеткізуіне Samsung Electronics Central Eurasia компаниясы қолдау көрсетті. Бүгінге дейін компания еліміздің мектептерінде осы іспетті 13 смарт сынып ашқан.
– Біз осындай оқу сыныптарының онкологиялық ауруларға шалдыққан балаларға оң әсері тиетінін Ресейдегі Рогачев атындағы онкология және гематология орталығынан білдік. Балалардың сауығып кетуіне септігімізді тигізу үшін ем алатын балаларға сыйға тартуды жөн көрдік, – деді Samsung Electronics Central Eurasia компания өкілі Берік Омаров.
Осы арада бұл кәсіпорын өткен жылы Ана мен бала ұлттық ғылыми орталығына дәл осындай смарт сыныпты сыйға тартқанын айта кету керек.
Заманауи құралдармен жабдықталған оқу сыныбында балалар математика, тарих, ағылшын тілі сияқты жалпы пәндермен қатар, шығармашылықпен де айналыса алады. Сондай-ақ музыка мен ертегілердің көмегімен терапия сеанстары өткізіледі. Орталыққа келіп дәріс беретін мұғалімдер сабақтарды тиімді және қызықты етіп онлайн режімде де жүргізе алады. Онлайн түрінде өтетін сабақтарға енді төсекке таңылған балалар да қатыса алады. Сынып үлкен интерактивті тақтамен, экологиялық таза жиһаздармен қамтамасыз етілген. Іші заман талабына сай әрленіп, безендірілген. Орталықта емделуші балалар сабақтарды жаңа оқу жылынан жаңа форматта оқитын болады. Сурет салу, конструктор құрау, ағылшын тілін үйрену, дойбы, шахмат үйірмелерін «HelpToday» қоғамдық ұйымының 10-ға жуық ерікті өкілдері тегін жүргізетін болады.
Айнаш ЕСАЛИ,
«Егемен Қазақстан»
АЛМАТЫ