Жуырда қазақ актері, Қазақстанның еңбек сіңірген қайраткері Төлеубек Аралбай Қытайда өткен кинофестивальде жүлдеге ие болды. Циндао қаласында маусымның 13-і мен 17-і аралығында өткен фестивальге Шанхай ынтымақтастық ұйымына мүше елдер кинотуындылары қатысты. Қазақстандық актерлер еліміздің Мәдениет және спорт министрлігінің тапсырысы бойынша «Адигул продакшн» кинокомпаниясының қатысуымен Ш.Айманов атындағы «Қазақфильм» АҚ түсірген режиссер Т.Теменовтің «Біздің қаланың ханзадасы» фильмін апарған болатын. Бибол есімді қамкөңіл ұл – балалар үйінің алты жасар тәрбиеленушісі мен Қасымхан есімді музыкант қарияның кездейсоқ кездесуінен өрбитін киноның драмалық желісі одан әрі мүлдем бөтен екі кейіпкердің өзара етене жақын болып, бір-біріне әке мен баладай бауыр басып кетуіне ұласады. Адамгершілік қасиетті басты орынға қойып, осы ізгі қасиет арқылы бақытқа бөлену мүмкіндігін алға тартқан мелодрама Астанада және Ақмола облысының Бурабай ауылында түсіріліп, 2017 жылы 1 маусым – халықаралық балаларды қорғау күнінде тұсауы кесілді. Сол жылы қазан айынан бастап еліміздің кинотеатрларынан көрсетіліп, қыркүйек айында Ресейде өткен II халықаралық «Еуразиялық көпір» кинофестивалінің негізгі бағдарламасы аясында көрсетілді.
ҚХР мемлекеттік кинематография басқармасы мен Шаньдун провинциясының әкімшілігі ұйымдастырған ШЫҰ аясындағы кинофестивальде көрермендер назарына 60 картина ұсынылған болатын. «Біздің қаланың ханзадасы» фильмінде басты рөлдерді Әнуар Төлеуғажы мен бұрын «Жаужүрек мың бала», «Жоюшы», «Тығырықтан жол тапқан» фильмдерінде ойнаған Төлеубек Аралбай сомдады және фильмге Астана қаласындағы Қ.Қуанышбаев атындағы Мемлекеттік академиялық қазақ музыкалық драма театрының актерлері қатысты. Өз рөлін шебер, тартымды сомдаған Төлеубек Аралбай кинофестивальде «Үздік ер адам» рөлі жүлдесін жеңіп алды.
Гүлайым ШЫНТЕМІРҚЫЗЫ,
«Егемен Қазақстан»
Маңғыстау облысы