Кеше Сыртқы істер министрлігінде еліміздің шет елдердегі елшілерінің қатысуымен кеңейтілген кеңес отырысы болып өтті. Еліміз Тәуелсіздігінің 20 жылдығын атап өту қарсаңында өткізілген басқосуға Отанымыздың шет елдердегі барлық елшілері келді. Отырыста сыртқы саяси мәселелер талқыланды.
Дипломаттардың мұндай басқосуы осыдан төрт жыл бұрын өткені белгілі. Содан бері халықаралық қатынастарда, көпжақты деңгейдегі сыртқы саясатта маңызды мәселелерді талқылау өзекті бола түсті. Сыртқы істер министрі Ержан Қазыханов тәуелсіздік алған жылдар ішінде Қазақстан екіжақты және көпжақты деңгейде өзін сенімді әріптес және халықаралық қоғамдастықтың жауапты мүшесі екенін дәлелдей білгендігін ерекше атап өтті. Президент Нұрсұлтан Назарбаев айқындап берген еліміздің сыртқы саясаты Қазақстанның қауіпсіздігі мен тұрақтылығын, сонымен қатар, әртарапты даму деңгейін қамтамасыз етуде өзінің тиімділігін дәлелдеді, деді ол.
1 қаңтардан бастап күшіне енетін Біртұтас экономикалық кеңістік пен Кеден одағы бойынша көптеген шаруалар атқарылуда, деп жалғады сөзін Е.Қазыханов. Әйтсе де БЭК-ке қатысты Қазақстан, Ресей және Беларусь тарапынан 55 халықаралық келісім-шарт жасалып, міндетті деп саналатын 74 шара өткізілуі қажет. Сонымен қатар, еліміздің БСҰ-ға кіруі тұрғысында келіссөздер белсенді жүргізілуде. Кеден одағы бойынша көршіміз – Ресей жыл соңына дейін осы Ұйымға мүшелікке өту туралы шақырту алады деп күтілуде. Қазақстан да бұл бағыттағы жұмысын аяқтап келеді. АҚШ-пен екіжақты келіссөздер толық бітсе, ЕО-мен арадағы келіссөздер аяқталуға жақын. Сондықтан да келесі жылы Қазақстан БСҰ-ға мүше болады деуге толық негіз бар.
Жапониядағы АЭС-терде орын алған апат жағдайында Мемлекет басшысы Н.Назарбаев атом энергетикасын бейбіт мақсатта пайдаланудың міндетті және әмбебап сызбасын әзірлеуді тапсырды, деді Ержан Хозеұлы сөзін сабақтай түсіп. Үстіміздегі жылдың 12 қазанында Семей сынақ полигоны жабылуының 20 жылдығына арналған Астанада өткен «Ядросыз әлем» халықаралық форумы барысында жаппай қырып-жоятын қаруды таратпау және қарусыздану үдерісінде Қазақстанның көшбасшылық рөлі ерекше атап өтілді. Министрлік алдына қойылып отырған ендігі міндет – 2012 жылы Сеулде өтетін Ядролық қауіпсіздік жөніндегі екінші саммитке Мемлекет басшысының қатысуына дайындық жүргізу. Бірер күннен кейін еліміз Ұжымдық қауіпсіздік туралы шарт ұйымына (ҰҚШҰ) қайта төраға болғалы отыр. Бұдан басқа, үстіміздегі жылы Қазақстан түркітілдес мемлекеттердің басын қосқан жаңа бірлестік – Түркі Кеңесін басқарады. Е.Қазыханов тиісті елдердегі елшіліктерге осы іс-шараларға орай дайындық жұмыстарына ерекше көңіл бөлуді тапсырды.
Министр еліміз Ауғанстанды тұрақтандыру жөніндегі халықаралық күштерге белсенді көмектесуі қажеттігін де баса айтты. Биылғы жыл – Мемлекет басшысы Н.Назарбаевтың бастамасымен соңғы кезде тиімді жүзеге асырылып жатқан «Еуропаға жол» Мемлекеттік бағдарламасының аяқталатын жылы. Аталған бағдарламаға сәйкес Түркия, Италия, Испания және Франциямен Стратегиялық әріптестік туралы келісімге қол қойылды. Бүгінгі таңда Қазақстан сыртқы сауда айналымының 50 пайызы мен тартылған инвестицияның үштен бірі Еуропа елдерінің үлесіне тиеді.
Кездесуде Бакуде 2010 жылы Үшінші Каспий саммитінде келісім негізінде қол жеткізілген Капий теңізінің құқықтық мәртебесі туралы конвенцияны қабылдау мәселесі де сырт қалған жоқ. БҰҰ жүйесіндегі, «Өркениеттер альянсы» достар тобындағы жұмысты жандандыру да күн тәртібінде тұрғаны айтылды. ЮНЕСКО-ның Әлемдік құндылықтар тізімін қазақстандық нысандармен толықтыру, инвесторлармен жұмысты жалғастыру жайы және әлемдегі саяси үдерістерге сараптама жүргізу мәселесі өткір қойылды. Әсіресе, мемлекеттік тілдегі құжаттар айналымының үнемі назарда болуы қажеттігі де ерекше аталды.
Асқар ТҰРАПБАЙҰЛЫ.