«Менің алғашқы мамандығым IT – технологияға байланысты, қазір Қазақстанда цифрландыру жүріп жатқанын ескерсек, бұл аса өзекті мәселе. Цифрландыру және компьютерлік технологиялар заманында программист сияқты ойлау және кез келген іс-әрекеттерді автоматтандыру қабілеттерін білу маңызды», деді «Нұр Отан» партиясының Алматы қалалық филиалы төрағасының орынбасары, қалалық мәслихаттың депутаты Станислав Канкуров.
IT-сыныбы Қорғаныс министрлігінің әскери-техникалық мектебінің базасында ашылды. Оқуға әртүрлі жастағы ер адамдар мен әйелдер келді. «Ең бастысы адамның оқуға деген ниеті мен уақыты болу керек. Оқу барысында мен өз ой-өрісімді және кәсіби біліктілігімді арттыратыныма сенімдімін», деді курсқа қатысушы, алматылық Нұрмұхан есімді жігіт.
«Нұр Отан» партиясының «Цифрлы Қазақстан» жобасы аясында алдағы үш жылда еліміз бойынша тегін 1000 ІТ-сынып ашу жоспарланып отыр. Бұл жоба бойынша жылына 150 мың бала білім алатын болады. Партияның бұл тың бастамасы аталған мәселенің оң шешілуіне ықпалын тигізетіні сөзсіз. Ертеңгі күні 1000 IT болашаққа өрілген мамандық иесі, білгір жас болып өмірге жолдама алады. Мұны «Нұр Отанның» қолға алып жатқан жарқын бастамасының бірі деп ойлаңыз.
Сапарбай ПАРМАНҚҰЛ,
«Егемен Қазақстан»
АЛМАТЫ