Көрнекті жазушы-драматург, Мемлекеттік сыйлықтың лауреаты Әкім ТАРАЗИ бізбен ел өміріндегі айшықты белес – Тәуелсіздіктің елең-алаң шағынан бастап, қазіргі кезеңге дейінгі жүріп өткен жолдарымыз, мемлекет ретінде қалыптасу, Арқа төсіне орнаған еңселі елорда, халқын өркениет көшіне бастай білген Елбасы жайлы ой-толғамдарымен бөліскен еді.
– Әкім аға, егемендік жарияланар алдындағы жағдайды көз алдыңызға бір елестетіп көрсеңіз қайтеді. Бәлкім, Тәуелсіздікті даяр асқа тік қасықтай көретіндер үшін бұл сабақ болар.
– Егемендік жарияланар алдында Кеңестер одағының бір топ жазушыларымен бірге Сингапурға бардым. Осындағы мерзімді басылымдар дүние жүзінің алтыдан бір бөлігіне жетпіс жылдан астам өз үстемдігін жүргізіп келген социалистік жүйеде аштық басталды деп жазса, телеарналар Мәскеу мен Ленинградтағы дүкендердің жылан жалағандай бос сөрелерін көрсетіп жатты. Кекету-мұқату сарынындағы сөздер жанымызды жаралып, көңілге қатты тиді. Қанша айтқанмен бір шаңырақ астында өмір сүрдік. Өткеннің бәрін күйелегеннен гөрі жақсы мен жасығын ажыратқан ләзім. Бірақ қанша намыстансақ та, олардың айтқандары шындық еді. Елге оралдық. Айлап жалақы, зейнетақы ала алмағаннан кейін жұртшылықтың тұрмысы әбден төмендеп, еңсесі езіліп кеткен. Бәрі жоқшылықтың, жетіспеушіліктің салдары ғой. Күнделікті тұтынатын заттар зым-зия жоғалып, ертеңгі күні қою қараңғы түндей көрінсе, бойды да, ойды да үрей билеген. Жалпы, ашуға булыққан, ақылдан айрылған адамдардың тобырға айналуы оп-оңай. Еліміздің әр қиырында митинг, жиындардың өрттей қаулап тұрған кезі. Одақтың қайта орнауын көксеуші сепаратистік топтардың соңына ерген, алдауына түскендер қаншама еді. Сол кезеңнің тірлігін сипаттайтын бір мысал келтірейін. Роза екеуміз Алматыда бірінші қабатта пәтер жалдап тұратынбыз. Сағат 8-ден бастап балалар ойнайтын алаңқайда сүт сатылады. Ел түнгі 3-тен кезекке тұрады. Сүт жетпей қалса, айғай-шудың көкесі сонда болады. Күнде қайталанатын құбылыс болғандықтан, етіміз үйреніп кетті.
Егемендіктің әрбір қазақстандық үшін үлкен мәні бар. Қазақстанның өз алдына жеке мемлекет болып, тыңнан түрен салғандай кезеңдерден өтуі қазір айтуға ғана жеңіл. Оған жету оңай болған жоқ. Сондықтан ауық-ауық айтып, жастардың есіне салып отырған дұрыс. Қазіргі ұрпақ сезінуі тиіс. 20 жылда қай саланы алсақ та керемет табыстарға жеткеніміз анық. Бірақ оны 0-ден емес, керісінше – 20-дан бастауымыз керек. Әміршіл-әкімшіл режім келмеске кеткенімен, орнын ойсыратып кетті. Ілгері басқан аяғымызды кері сүйреп тастады. Сол жай ғана қалпымызда жүрген кезде егемендік алған болсақ, оны мақтанып айтуға болар еді. Біз керісінше, 20-ға шегініп кеттік. Алғашқы 7-8 жыл сол 20-ны қалпына келтіруге кетті. Қазақстанның кемеліне келіп, дамуға шындап бет алғаны – соңғы 10-11 жыл ғана. Яғни, жоқтан бар жасау, қирандыдан мемлекет орнатқаны үшін ғана Елбасымыз Нұрсұлтан Назарбаевқа шексіз алғыс айтуымыз керек.
Мен өзім алақайлап қуана алмайтын адаммын. Ішкі көңіл-күйімді сыртқа көп шығара бермеймін. Әлі есімде, 31 желтоқсанда БҰҰ дауысқа салмай-ақ Қазақстанды мүшелікке қабылдады. Сонда ғана шын тәуелсіздікті сезінгендей күй кештім. Алайда бізден бұрын еркіндікке қол жеткізген өзбектер дүрілдетіп атап өтті. Қазақстан да бұл қуанышты ескерусіз қалдырмас деген ойым ақталмады. Рас, телеарнада басшылық қызмет атқаратын Дулат Исабеков жақсы хабар ұйымдастырып, көңілім бір көтеріліп қалды. Жаңа жылдық кеш ретінде өтсе де, Тәуелсіздігіміздің рухын асқақтатты. Кеш шырайын Роза, Бибігүл апаларымыздың әндері аша түсті. Түнгі 12-лер шамасында жүгіртпе жолдар арқылы «Егемендік құтты болсын!» деген құттықтау көзге көрінер-көрінбес әріптермен берілді. Сонымен тәмам! Кейде неге олай болды екен деп ойланамын. Сөйтсек, оның себебі, түп тамыры әріде жатыр. Бірнеше ғасырға созылған отарлық езгі ұлт санасын әбден сансыратып жіберді. Отаршылдар алдымен адамның жадын жаулайды. Сосын көкірегін тұншықтырады. Ұлттық намыс жоқ жерде құлтемірден айырмашылығымыз болмай қалады. Әр көтеріліс сайын қанға бөккен халықпыз. Сырым Датовтан бері алсақ, Ресей патшалығына қарсы 100-ден аса көтеріліс болған екен. Солардың өздері там-тұмдап қана айтылып жүр. Ең ірілері – Созақ, Қарқара, Жамбылдағы Көккөз көтерілісі...Көкірегіміз басылып, кеудеміз жаншылып қалғандықтан, егемендіктің алғашқы күндері қуана алмағанымыз сондықтан. Шын мәніндегі Азаттықты енді біліп жатырмыз. Ұлттық санасы биік буынның өсіп келе жатқаны қуантады.
– Шүкіршілік, мәртебемізді асқақтататын жетістіктерімізді санамалап шығудың өзі қиын. Қазақстанды төрткүл дүниеге танытқан ғажайыптарымыздың бірі – Арқа төріндегі елорда екені белгілі. Несін жасырайық, кезінде Астананы көшіруге қарсылардың қатары көп болды ғой.
– Еліміздің ертеңін, болашағын күні бұрын ойлап, болжай білген Елбасымыздың ұлылығы Астананы Арқа төсіне ауыстыру кезінде айқын байқалды. Әлі экономикамыз толыса қоймаған қиын кездің өзінде осындай шешім қабылдау екінің бірінің қолынан келмесі анық. Бастапқыда менің де Ақмолаға көңілім толған жоқ. Қала да, көше де жұтаң. Тізеге дейін батпақ. Досым Сайын Мұратбеков екеуміз көпірде тұрмыз. Айналаға көз тастаймыз. Мидай жазық дала. Сайын: «апырай, осы біз жаңа астана аштық деп құр даурығып жүрген жоқпыз ба? Ертең ұятқа қалмаймыз ба», деген қаупін білдірді. Мен қайбір жетісіп тұр дейсің. Үнсізбін. Есілдің сол жағалауында қалқиған жалғыз ғана үй тұр. Элеватордан аумайды. Сөйтсе, кейін білгеніміздей, «Қазмұнайгаздың» салып жатқан ғимараты болып шықты. Минус пен плюсті салыстыруымның сырын енді ұққан боларсың. Аз ғана уақыт ішінде мынандай ғаламат елорданың салынуы мүмкін екеніне Елбасыдан басқа ешкім сенбеді десем, артық айтқандық емес. Көрегендік, ұлылық деген осы! 60-жылдары Бразилия жаңа астана тұрғызу жөнінде шешім алды. 190 миллион халқын асырау оңай емес. Өзі кедей ел – астана не теңі. Несіне жетісіп салады деген күңкіл сөздер көп шықты. Міне, осы ел 50 жыл өтсе де, астананы салып біткен жоқ. Бірақ көшіп алды. Танзания Додома деген астана салды. Соған байланысты күлкілі бір әңгіме айтып берейін. Бірге тола қоймаған ұлымды жетелеп, сүт алуға келдім. Қатарымызға зейнет жасындағы кісі қосылды. Киім киісіне, сөз саптасына қарағанда, үлкен қызметте болғаны аңғарылады. Бір кезде «Астана саламыз деп неге даурығып жүрсіңдер? Көрпелеріңе қарап көсілуді білмейтін антұрғандар! Біздің жүрісіміз мынау» деп, орысша дүрсе қоя бергені. «Аға, Бразилия деген ел, Танзания Додома деген астанасын тұрғызып жатыр» деп хал-қадерімше жауап беріп жатырмын. Ол жөн сөзге құлақ асудың орнына табанының астындағы балшықты теуіп кеп қалды. Маған да, оған да шашырады. Елең қылар емес. «Катись до дома. Тура быт-шытыңды шығарамын» деді ызбарланып. Міне, зиялы деген қазақ азаматының сөзі, сиқы.
Жалпы, Сарыарқаның жазығында астананың тұрғызылуына қарсылардың көп болғаны рас. Қазіргі қолдаушылардың бірсыпырасы Елбасыға сол кездері сенімсіздік көрсеткенін білемін. Президент шетелден ұшып келе жатқанда Оралхан Бөкеймен Астананы Арқаға қарай көшіргім келеді деп жан сырын бөліссе керек. Оралхан келе салып «Қазақ әдебиетінде» мақала жариялап жіберді. Қуандық десек, өтірік болар еді. Нұрекеңнің тереңнен, әріден ойлайтын сұңғылалық қасиетін бірден қабылдай қоймадық. Мақала жазушылар ортасында қызу пікірталас туды. Мен елордаға жағрапиялық орналасуы жағынан Ұлытау сұранып тұр десем, менен гөрі білгіштеу досым Қалихан «әй, көке, ол жақта теміржол жоқ, қала жоқ. Кішкентай ғана ауданның орталығы. Астананы қайтып тұрғызасың?» деп тап бүгін көшкелі жатқандай қарсыласқаны да есте. Тағы бір білгіш Еуропаға жақын Оралды жөн көрді. Арада көп ұзаған жоқ, Президент шешімі мәлім болды. Ақмола Астана болып өзгертілді. Оның алдында Қытайдан оралған едім. Онда Турфан деген қала бар. Теңіз деңгейінен төмен орналасқан. Үргенішті аралағаннан кейін тағы нелерің бар көрсететін деп сұрадым. Содан қырдың басындағы ескі қалаға апарды. ЮНЕСКО-ның қорғауына алынған қаланың тұрғызылғанына 2500 жылдай болыпты. Қабырғалары қыштан қаланғаны көрініп тұр. Ортасында үлкен алаң орналасқан. Кезінде алаңның ортасында ханның ордасы құрылып, киіз үйлер тігіліпті. Қаланың атын естіп, таң-тамаша қалдым. Астана! Қуанғаннан жүрегім лүп ете қалды. Бірақ мағынасын ешкім білмейді. Кейін білгенімдей, үйсіндердің астанасы болған екен. Кеген, Нарынқол маңайында да үйсіндердің бірнеше астана атауы болғанға ұқсайды. Түркінің сөзі жаныма майдай жақты. Келген соң осыған байланысты бірқатар газеттерде шағын сұхбатым басылды. Демек, Елбасымыз тарихты тереңнен қозғап отыр. Осы бір мысал ғана Президенттің ел тарихын терең білетіндігін аңғартпай ма?!
– Аға, ұлттық идеология жоқ деп шулап жатамыз. Бұл сөз қаншалықты шындыққа жанасымды? Сонда қалай, 20 жылдың ішінде қалыптастыра алмағанымыз ба?
– Өз басым ешқандай дәлелге сүйенбестен жеңіл айтыла салатын сөздерді түсінбеймін де, қабылдамаймын да. Менің ұғымымда мемлекет ұлтқа қызмет етеді. Жұртшылықтың жағдайын ойладың ба, алдымен тұрмысын көтер, игілігін ойла. Мектеп, аурухана, жол сал. Оқуға, білім алуға мүмкіндік бер. Былайша айтқанда, бәрі халықтың, болашақтың қамын ойлаудан туады. Бұдан артық қандай идеология керек? Мемлекет ел тұрғындарына қызмет етсе – идеология осы. Қазақстанның қарыштап өсуі, дамуы – бәріміздің көз алдымызда. Нұрсұлтан Назарбаевтың «Алдымен экономика, сосын саясат» деген ұстанымының дұрыстығын өмірдің өзі дәлелдеді. Құр саясатты айта бергеннен не ұтамыз? Саясаттың өзі халықтың өмір сапасын арттыру секілді нақты қадамдардан құрылуы тиіс. Материалдық игілікті өндіретін – адам. Олай болса, жағдай тудыр. Сосын талап ет.
Әлемде тұрғын үй салудан үштікке енеді екенбіз. «Болашақ» бағдарламасы қай елде бар? «100 аурухана, 100 мектеп» бағдарламасы аясында елді мекендерде қаншама нысандар тұрғызылды? Санамалай берсе, тындырылған істеріміз толып жатыр. Сөзден сөз туады, Президент Министрлер кеңесінің төрағасы болып тұрғанда артта қалған 30 аудан жайлы қаулы қабылдаттырды. Проблемаларды жіліктеп берді. Көбі қазақ аудандары болатын. Мектептер, ауруханалар, жолдар салына бастады. Осы бір толғақты мәселе Елбасының әлі жіті назарында.
Жазушы ретінде мені ауыл жайы әлі де толғандырады. Елге жол түсе қалса, аралаудан шаршамаймын. Бұрындары тығырықтан шығу үшін кеңшар, ұжымшарларды қайта құру керек деп ойлайтынмын. Оңтүстік Қазақстан облысында болғанымда ауылдардың түлеп, жаңарғанын көріп қуандым. Ауыл өндіріс арқылы өркендейді. Келешегі озық технологиямен тығыз байланысты. Мақтаны қалдықсыз өңдейтін және жеміс-жидек өсіретін кластерлік жүйелерге ауылдықтар кеңінен тартылып, жұмыспен қамтылып отыр. «Орнында бар оңалар» деп атамыз қазақ текке айтпаған. 300 миллион халқы бар АҚШ-та, 67 миллион адам тұратын Англияда екі пайызы ғана ауыл шаруашылығымен айналысып, азық-түлік өнімдерімен өздерін толық қамтамасыз етеді. Біздің де оған жетер күніміз алыс емес.
– Осы кезең ішінде ана тіліміздің күрделі мәселелері шешілді ме?
– Жұбан Молдағалиев ағамыздың «Мен қазақпын» поэмасын жата-жастана оқыдық қой. Оқығанда кектеніп, ызаланып оқитынбыз. Ұлттық құндылықтарымыздың аяққа басылуы бәріміздің намысымызды қозғайтын. Ана тілінде сөйлеуге қорланатын, тіпті қазақ болып туғанына өкінетін адамдарды талай кездестірдік. Аты-жөндерін орысшаға ауыстырғандар да болмай қалған жоқ. Мұның бәрі сол кездегі солақай саясаттың бетпердесін көрсетсе керек.
– Енді «мен қазақпын» деп мақтанатын, шаттанатын кез келді. Құр мақтану, шаттану жеткіліксіз. Елбасымыз бәріміздің алдымызға «қазақ қазақпен қазақша сөйлессін» деген талап қойды. Осы бір қағиданы орындауға жұртшылық болып атсалысқанда ғана тіліміздің мәртебесі биіктей түседі. Бұрын орысша сөйлеу сән болса, енді мемлекеттік тілді білуге ұмтылушылар қарасы қалың. Қазақстанның болашағы – қазақ тілінде екенін басқа ұлт өкілдері де жақсы түсінеді. Заманның түзелгені, саясаттың орнықтылығын осыдан-ақ аңғаруға болады. Заңғар жазушы Мұхтар Әуезов «Алдымен бесігіңді түзе» деген. Балаларымызды, немерелерімізді ана тілінде оқытуға кім қарсылық жасап отыр? Ешкім де. Былтыр Қарағанды облысындағы Абай қаласында болдым. Балабақшадағы балалар қазақ тілін еркін меңгерген. Олардан неге үлгі алмасқа?!
– Елбасымен талай кездесіп, жүздескен боларсыз. Қандай айрықша қасиеттерін бөліп айтар едіңіз?
– Орыста интеллектуал, зиялы адам деген ұғым бар. Мені қай сала болмасын Президенттің жан-жақты хабардарлығы, мол білімділігі тәнті етеді. Жұмысбастылығына қарамастан, солардың бәрін терең игергеніне таң қаламын. Аллатағала Елбасымызға ерекше сабыр, зерде, ақыл, айрықша тағдыр берген. Алла әманда әр халыққа лайықтап жарылқайтын басшы сыйлайды. Ел басқару өнері – құдай берген талант. Небір кездерде небір дарынсыздар билікке таласқан. Орынтаққа отырып, елін де, халқын да жұтатқан. Ондайларға өлермендік, билікке жету тән. Олар келсе, күніміз не болар еді? Бетін аулақ қылсын. Қазақстандықтар Н.Назарбаевты өздері қалап алды. Таңдаудан қателеспеді. Сенім артты. Соңынан ерді. Президент етіп бірнеше рет сайлады. Қазақта «тастұғыр» деген ұғым бар. «Тұғырың мықты ма?» деп сұрасып жатады. Қазақстанның іргесін бекітіп, әлемдегі алдыңғы қатарлы мемлекет қатарына жеткізу – Елбасының ерен еңбегі. Ел болғанымызды көре алмайтын, күндейтіндер іштен де, сырттан да табылады. Кезінде Горбачев, Солженицын, Жириновскийлердің аузынан ақ ит кіріп, көк ит шыққан жоқ па? Еліміздің, жеріміздің тұтастығына барынша нұқсан келтіруге ұмтылып, ұлттар арасына жік салуға тырысып бақты. Оларынан түк те өнген жоқ.
Кейбіреулер қит етсе, Президентті кінәлауға бейім тұрады. Ана жолы телевидениеден тепсе темір үзетін бір жігіт сөйлеп жатыр. Көп ағайынды сол азамат бізге баспана бермеді деп өкпе артады. Айналайын-ау, бәрі жабылып неге үй салып алмайды? Бұл барып тұрған жатыпішерлік, масылдық қой енді. Тәуелсіздіктің тұғырын беріктендіре түсуге мен не үлес қостым деп азаматтық үнқатудың орнына жоғарыдағыдай сөзі қарын ашырады.
– Еліміздің өркендеуіне сіз қандай үлес қостыңыз деген сауал қойылса, қалай жауап берген болар едіңіз?
– Біз әдебиетке еш қолдау-қоштаусыз келіп, өз қолтаңбамызды, үнімізді қалыптастырған буынбыз. Жазушының басты қаруы – қаламы. 1991 жылдан бері үзбей жазып келемін. Мынаны жаз деп талап ету артық. Қабілет-қарыммен жұмыс істейтін кез бұл. Демеу жасап, қамқорлық жасап отырса, небір талантты шығармалардың туары күмәнсіз.
Жақында Англияда романым ағылшын тілінде жарық көріп, тұсаукесеріне қатыстым. Сөз беріп, өзіңіз туралы айтыңыз, деп өтінді. Мен: «әлемдегі 15 миллион қазақтың біреуі ғанамын. Озығы да, тозығы да емеспін» дедім. Халықтан биік ешкім жоқ. Жазған шығармаларымызды оқырман қауым бағалап жатса, одан асқан абырой болмайды.
– Салиқалы әңгімеңізге рахмет.
Әңгімелескен Өмір ЕСҚАЛИ.