Конференцияда Қазақстанның ұлтаралық келісім мен диалог орнатудағы тәжірибесін таныстыру және талқылау, мәдениетаралық диалогты қолдаудағы үздік тәжірибелерді анықтау, жастар мен халықаралық ұйымдардың сарапшылары арасында түсіністік алаңын құру, «Рухани жаңғыру» бағдарламасын таныстыру тақырыптары көтерілді. Оның жұмысына Азия-Тынық мұхиты аймағындағы ЮНЕСКО клубтық қозғалысының, мемлекеттік органдар мен халықаралық ұйымдардың өкілдері, 200-ге жуық халықаралық және ұлттық сарапшылар қатысуда.
Шараны Мәдениет және спорт вице-министрі Ақтоты Райымқұлова ашты. Оның айтуынша, конференцияда көтерілген мәселелер Қазақстан үшін өте өзекті. «Бүгінгі шараға билік, азаматтық қоғам өкілдері және түрлі халықаралық ұйымдар мен ЮНЕСКО-ның 200-ден астам маманы қатысып жатыр. Олардың қатарында ЮНЕСКО аясында өткізілген «The Рlanet of ART» шарасының жас жеңімпаздары да бар. Тәуелсіздік алған уақыттан бері еліміз ата-бабаларымыздан қалған мәдени мұраларды қалпына келтіру бойынша жүйелі жұмыстар атқаруда. Бүгінге дейін қазақ халқының көптеген мәдени ескерткіштері, ел аумағындағы материалдық және материалдық емес мұралар жаңғыртылды. Ал 2013 жылдан бастап Қазақстан өзге елдердің мұрағатында сақталған ел тарихына қатысты құнды деректерді жинақтау үстінде. Бұл орайда, еліміздің мәдени жаңғыруының үшінші кезеңі, Мемлекет басшысы ұсынған «Рухани жаңғыру» бағдарламасы өте маңызды. Сондай-ақ осы шара аясында қонақтарды 100-ден астам мәдениет пен этнос өкілдері бейбіт өмір сүріп жатқан еліміздің үздік тәжірибесімен таныстыру және өзімізге шетелдік қонақтардың жұмыс тәжірибесімен танысу мүмкіндігі бар. Сессиялар жұмысының соңында тұрақты даму және Қазақстан мен Азия-Тынық мұхиты аймағы жастарының көшбасшылық қасиеттерін дамыту бойынша нақты ұсынымдар әзірленеді деп күтеміз. Бүгінгі жиын арқылы қатысушыларды ЮНЕСКО-ға мүше елдердің мәдениетін жақындастыру мен бейбітшілікке қолдау білдіруге шақырамыз», деді Ақтоты Райымқұлова.
Бұдан кейін Алматыдағы Қазақстан, Қырғызстан және Тәжікстан бойынша Кластерлік бюросының директоры Криста Пиккат, Қазақстанның Тұңғыш Президенті – Елбасы Қоры атқарушы директорының орынбасары Игорь Рогов, Қазақстан халқы Ассамблеясы Төрағасының орынбасары – Хатшылық меңгерушісі Леонид Прокопенко, ЮНЕСКО клубтары, орталықтары мен ассоциацияларының бүкіләлемдік федерациясының президенті Дхирендра Бхатнагар, Астана қалалық Тілдерді дамыту басқармасының басшысы Тілеуғали Қышқашбаев сөз сөйлеп, конференция жұмысына сәттілік тіледі.
Венера ТҮГЕЛБАЙ,
«Егемен Қазақстан»
