Жамбыл облысы елімізге Меркі шипажайы мен Т.Рысқұлов санаторийі арқылы жақсы танымал. Мұнда жыл сайын жүздеген адамдар келіп, тиісті ем қабылдап, демалып кетеді. Бұл өз кезегінде өңір экономикасын арттырып қана қоймай, өңірдің бәсекелестігін жоғарылата түсетіні анық. Енді бұл бастама жуырда Жуалы ауданында жүзеге аспақшы. Қыс мезгілінде қаталдық танытқанымен, Жуалы жерінің тіпті жаз мезгілінде де жасыл желекке малынып тұратын табиғаты кімді де болса таңдандырмай қоймайды. Өңір туризмін қалыптастыру мақсатында аудан іргесіндегі Тәттібай Дүйсебаев ауылы аумағынан жер бөлініп, «Қаралма» тау шаңғысы базасын ашуға арналған жұмыстар басталып та кетті. Кешеннің құрылыс жұмыстары ағымдағы жылдың желтоқсан айына дейін аяқталады.
«Тараз» әлеуметтік-кәсіпкерлік корпорациясы» акционерлік қоғамының басқарма төрағасы Нүркен Шәрбиевтің айтуынша, «Қаралма» сауықтыру орнына келуші туристер мен демалушыларға барлық жағдай жасалады. Мұнда 50 адамға арналған қонақүй мен келушілерге жоғары сапалы қызмет көрсететін мейрамхана салынып, өзге де сауда-саттық нүктелеріне орын бөлінетін болады. Мейлінше заманауи үлгіде салынатын сауықтыру орталығы Тараз қаласынан небәрі жүз шақырым жерде орналасады.
Сонымен қатар Жамбыл облысының әкімі Асқар Мырзахметовтің тапсырмасы негізінде «Қаралма» демалыс орнынан кемінде 10 коттедж салу көзделген. Сондай-ақ әкімнің айтуынша сол жерді жылдың төрт маусымында да пайдалануға болады. Мұнда жаз мезгілінде бақтақ (форель) балығын өсіруге, ал қыс мезгілінде спорттық шаралар өткізуге де мүмкіндіктер бар екен. Ал өңір кәсіпкерлері үшін бұл өте үлкен мүмкіндік болмақ. Аталған сауықтыру орнында демалушылар үшін қонақүйлер, мейрамханалар, коттедждермен қатар алдағы уақыттарда еуропалық талапқа сай тау шаңғысының кешені салынады. Болашақта жасыл желекті Жуалы аймағын Алматыдағы «Шымбұлақ» кешені секілді аумаққа айналдыру жоспарда бар.
Бүгінгі таңда болашақ шипажай аумағына өңірдегі кәсіпкер азаматтардың белсенділігі қажет. Бұл бастама кәсіпкерлердің өздерінің әлеуметтік жағдайын да жоғарылатумен қатар, өңірдің экономикасын арттыруға да үлес қосатыны анық. Ал аудан әкімі Бақтияр Көпбосынов аталған сауықтыру орталығынан жуалылық екі кәсіпкердің коттедж салуға ниет танытып отырғанын айтты. Жалпы, өңір кәсіпкерлері де бүгінде бұл бастамаға қызу қолдау білдіруде. Бұл орайда Тараз инновациялық-гуманитарлық университетінің ректоры Ерболат Саурықов бір коттедж салуға дайын екенін айтып отыр. Сонымен қатар бұл бастаманы тараздық кәсіпкер Жұмагүл Омарова мен шулық кәсіпкер Әлімжан Ахметов те қолдайды. Тараз қаласындағы «Рысбаева және К» компаниясының директоры Сәуле Рысбаева аталған сауықтыру орнында ұлттық нақыштағы естелік кәдесыйлар сатуға ынталы екенін жеткізді.
Хамит ЕСАМАН,
«Егемен Қазақстан»
Жамбыл облысы
