![Асқар Мамин «Роскосмос» корпорациясының бас директорымен кездесті](/article_photo/1531278038_article_b.jpeg)
Кездесуге сондай-ақ Қазақстан Республикасы Қорғаныс және агроғарыш өнеркәсібі министрі Бейбіт Атамқұлов пен Қызылорда облысының әкімі Қырымбек Көшербаев қатысты. Кездесу барысында тараптар «Бәйтерек» ғарыштық зымыран кешенін құру, бірлескен инвестициялық жобаларды жүзеге асыру және Байқоңыр қаласын әрі қарай дамыту мәселелерін талқылады.
Тараптар жаңа буындағы ұшатын көлік корабльдерін ғарыш көгіне аттандыратын «Бәйтерек» жобасын жүзеге асыруды жеделдетуге уағдаласты. Осы мақсатта Қазақстан Республикасы Қорғаныс және аэроғарыш өнеркәсібі министрлігінің аэроғарыш комитеті, «Роскосмос» пен «С7 Ғарыштық көлік жүйесі» компаниясы өкілдерінің қатысуымен мемлекет-жекешелік әріптестігі аясындағы ынтымақтастықты жүзеге асыру үшін жұмыс тобы құрылады.
А.Мамин кәсіпкерлікті дамыту үшін жағдайлар жасау, Байқоңыр қаласына инвестициялар тарту, жаңа жұмыс орындарын құру ынтымақтастықтың басым бағыттары болып табылатынын атап өтті.
Қызылорда облысының әкімі Қ.Көшербаев Байқоңыр қаласында инженерлік инфрақұрылымдар нысандарын жаңғырту және қайта құру бойынша атқарылып жатқан жұмыстар туралы ақпарат берді. Инвестициялар тартып, бизнес үшін оңтайлы жағдайлар жасау мақсатында «Байқоңыр» кешені аумағында арнайы экономикалық аймақ құру мүмкіндігін қарастыру ұсынылды. Облыс әкімі ғарыш туризмін дамыту мақсатында облыста «Байқоңыр» ойын-сауық-туристік аймақ құру тұжырымдамасы жасалғанын айтып өтті.
Бірқатар көкейкесті мәселелер бойынша алда өтетін «Байқоңыр» кешені бойынша 6-шы Қазақстан-Ресей үкіметаралық комиссиясының мәжілісінде қарастыру үшін ұсыныстар дайындалды.