– Елбасы айтып өткендей, бүгінгі таңда ел бәсекеге қабілетті болу үшін пайдалы қазбалар жеткіліксіз, ол үшін мемлекет, әсіресе цифрлы технологиялар саласында алдыңғы қатарда болуы керек. Біз «Самұрық-Қазына» АҚ компаниялар тобы ретінде цифрлы технологияларды дамытуға мүдделіміз, деді Ә.Пірметов.
Бағдарламаның негізгі мақсаты – ақпараттық технологияларға қызығушылық білдірген және де Қор компанияларында ақпараттық технологиялардың дамуына үлес қосуға ниетті мамандарды анықтау.
Үш апта ішінде аталған бағдарлама үлкен сұранысқа ие болып, өтінім бергендердің саны 2100-ге жеткен және олардың 500-і негізгі IT білімін тексеретін сынақтан сүрінбей өтсе, соның ішінде 72 жас маман тағылымдамаға шақырылатын болып отыр.
Айта кетерлігі, тағылымдама 1 шілдеден басталып, 31 тамызға дейін Астана, Алматы, Өскемен, Павлодар және Атырау қалаларында жалғасады. Оған қатысу үшін кәсіби тәжірибенің болуы міндетті емес. Тек ақпараттық жүйелер мен инфрақұрылымды әкімшілендіру, жобалық басқару, бағдарламалау, қосымшалар архитектурасы, ақпараттық қауіпсіздік қағидалары саласында негізгі білімі болса жеткілікті.
Оқыту бағдарламасын Қор әлемдік ІТ көшбасшыларымен бірлесе әзірледі. Тағылымдамадан өтетін жастарға ІТ саласындағы ықпалды әрі ірі SAP, Microsoft, Oracle, Cisco, HP, IBM, Huawei сынды компаниялардың өнімдерімен бірге жұмыс істеп, тәжірибе жинақтауға мүмкіндік мол.
Бағдарлама соңында алғырлығымен көзге түскен тәлімгерлер «ҚазМұнайГаз» ҰК» АҚ, «Қазатомөнеркәсіп» ҰАК» АҚ, «Қазақстан темір жолы» ҰК» АҚ, «Қазпошта» АҚ, «Самұрық-Энерго» АҚ, «Қазақтелеком» АҚ, «Тау-Кен Самұрық» АҚ, «КОРЭМ» АҚ, «Qazaq Air» АҚ, «Энергоинформ» АҚ, «Самұрық-Қазына Контракт» ЖШС және «Бірлескен химиялық компания» ЖШС сынды беделді компанияларға жұмысқа орналасу мүмкіндігіне ие болады.
Еркежан АЙТҚАЗЫ,
«Егемен Қазақстан»
