Сондай-ақ «Балалар – біздің болашағымыз» әлеуметтік жобасы аясында микротия және есту арнасының атрезия диагнозы қойылған кеңеске балалар қатысты.
Биыл маусым айында америкалық хирургтер 140-қа жуық пациентті қарап, 64 балаға ота жасауға шешім қабылдады. Соның ішінде микротия мен есту арнасының атрезиясы бар 7 балаға ота жасалды. Бұл балаларға америкалық хирург заманауи «Medpore» имплантын қолданып, құлақ қалқанына реконструктивті операциялар жүргізді. Бұл оталар Қазақстанда алғаш рет жасалды және америкалық мамандардың шеберлік-сабағына Алматыдан арнайы келген дәрігерлер де қатысты. Аталған жобаны «Асыл бала» қоғамдық қоры АҚШ-тың «Халықаралық ықпалдастық тобындағы» әріптестерімен бірлесіп «University Medical Center» корпоративтік қорының Ана мен бала ұлттық ғылыми орталығы базасында іске асырды. Пластикалық операциялар жасау үшін аталған қоғамдық қор 1 795 340 теңге сомасына дәрі-дәрмек сатып алды. Сондай-ақ 160 650 теңге мөлшерінде микротия және есту арнасының атрезиясы бойынша операцияларды жүргізуге қажетті дренаждар сатып алды.
Жобаның негізгі мақсаты – мамандардың өзара тәжірибе алмасуы, отандық хирургтердің біліктілігін арттыру және қазақстандық балалар арасында мүгедектікті азайту бағытында әрі қарай өзара ынтымақтастық орнату. Еске сала кетейік, 2016 жылғы 4 қазанда жобаның алғашқы кезеңі басталып, 2017 жылдың 13-15 наурызы аралығында «UMC» корпоративтік қорының Ана мен бала ұлттық ғылыми орталығы және Surgicorps International (АҚШ) пластикалық хирургтері осы орталық базасында еліміздің барлық өңірінен келген 300-ден астам баланы, оның ішінде балалар үйлерінің 14 тәрбиеленушісін қабылдап, тексеруден өткізген болатын. Ал үшінші кезеңде, 2017 жылдың мамыр айында 80 балаға ота жасалды.
«Егемен-ақпарат»
