Арнайы құрылған комиссия 152 үйдің 13-ін тұруға жарамсыз деп таныған болатын. Қазіргі уақытта ауданда тұруға жарамды 134 үйге жөндеу жұмыстары жүргізіліп жатыр. Ал баспанасы жарамсыз деп танылған үй иелеріне облыс басшылығы жаңадан үй сатып алып береміз деп уәде берген еді. Жақында «Нұр Отан» партиясы облыстық филиалы төрағасының бірінші орынбасары Әнуарбек Мұхтарханов Шемонаиха ауданына арнайы барып, 12 отбасына баспана кілтін тапсырды.
«25 наурыз күнгі жағдай әлі есімде. Менің үйім суға батып кетті. Іргетасы үш жерден жарылды. Сол кездегі жағдайымды көрсеңіздер ғой. Бұрын тек теледидардан көретін жағдайдың басыма келетінін ойламаған да едім. Қиын сәтте бізбен бірге болған халыққа, әсіресе Елбасына, облыс басшылығына рахмет айтамыз. Апат болған алғашқы күннен әр тұрғынның жағдайын жеке-жеке біліп, үйді-үйді аралап, гуманитарлық көмек жеткізген «Нұр Отан» партиясына алғысымыз шексіз», деді бұрынғы тұрған үйінен әлдеқайда жақсы, қолайлы, 4 бөлмелі баспанаға қол жеткізген Людмила Дегтярева.
Партия филиалының баспасөз қызметінің хабарлауынша, бұл күні Шемонаиха тұрғындарына тек пәтер кілтін ғана емес, Астанадан арнайы келген «Мемлекеттік қызмет көрсету саласындағы қызметкерлердің жергілікті кәсіптік одағы» қоғамдық бірлестігінің төрағасы бірнеше тұрмыстық техникаларды тарту етті. Олар өздерімен бірге 18 тоңазытқыш, 7 кір жуатын машина, 8 теледидар алып келді. «Ауданда жөндеу жұмыстары қызу жүріп жатыр. Тамыздың аяғына дейін 126 үйдегі жөндеу толық аяқталады. Жұмыс барысы толық бақылауда. Аудандық әкімдіктің алдына қойылған міндет бар. Сондықтан тасқыннан зардап шеккен халықты қалыпты тіршілігіне оралту күн тәртібіндегі басты мәселе», дейді «Нұр Отан» партиясының облыстық филиалы төрағасының бірінші орынбасары Әнуарбек Мұхтарханов.
Азамат ҚАСЫМ,
«Егемен Қазақстан»
Шығыс Қазақстан облысы,
Шемонаиха ауданы
