Сенат Төрағасы Қайрат Мәмидің жетекшілігімен өткен палатаның кешегі жалпы отырысында тоғыз мәселе қаралды. Ал қылмыстық-атқару жүйесі мәселелеріне қатысты заң жобасы бойынша сұрақтардың көбеюіне байланысты ол күн тәртібінен алынып тасталды.
Сенат Төрағасы күн тәртібіне шығарылған мәселелерді талқылауға көшпес бұрын өткен жұмада Жаңаөзенде орын алған оқиға туралы айта кетті. Қауіпсіздік кеңесінің 17 желтоқсандағы отырысында Жаңаөзен қаласындағы жағдай талқыланып, Елбасы қаза тапқандардың туыстарына көңіл айтып, Қазақстан халқына үндеу жолдаған-ды. Артынша Жаңаөзен қаласында Президент Жарлығымен төтенше жағдай енгізілген болатын. Қ.Мәми Жаңаөзен қаласында орын алған оқиғаның негізінде қатардағы еңбек дауы жатқандығын, бірақ осы әлеуметтік мәселені басбұзарлық жасауды көздеген жеке топ саясиландырып, арты қоғамдық тәртіпсіздікке әкеліп соқтырғанын баса айтты. Төрағаның пікірінше, ол топ өздері тасада тұрып, буындары қатпаған, әлі ой-саналары толық қалыптаспаған жастарды қылмыстық әрекетке итермелеген. Осы ретте Сенат Төрағасы заңдылықтың және қоғамдық тәртіптің бұзылуына жол берілмейтіндігін қатаң ескертті. Сондықтан да оқиғаны ұйымдастырушылар мен нақты тәртіп бұзушылар қатаң жауапкершілікке тартылып, тиісті жазасын алады. Елбасының тапсырмасымен құрылған тиісті жедел топ тексеру мен тергеуді ашық, әділетті жүргізеді және де қажет болса шетелдік сарапшылар да осы жұмысқа тартылатын болады. «Мен жаңаөзендіктерді, ақтаулықтарды, бүкіл маңғыстаулықтарды сабырлылық сақтауға шақырамын. Отанымыздың тұрақты дамуының басты кепілі – елдің бірлігі мен қоғамдағы тұрақтылық. Соны біз әрқашан есімізде сақтауымыз керек», деді Қайрат Әбдіразақұлы.
Күн тәртібіне сәйкес, депутаттар Еуразиялық экономикалық комиссия туралы шартты қарап, ратификациялады. Комиссияның негізгі міндеті Кеден одағы мен Біртұтас экономикалық кеңістіктің жұмыс істеуі мен дамуына жағдай жасауды қамтамасыз ету, сондай-ақ экономикалық ықпалдастық саласында ұсыныстар әзірлеу болып табылады. Еуразиялық экономикалық комиссияның екі деңгейлі құрылымы болады: Комиссия кеңесі мен Комиссия алқасы. Комиссия кеңесіне әр тараптан үкімет басшысының орынбасары деңгейінде бір адамнан бекітілген. Ал Комиссия алқасына әр елден 3 адамнан кірсе, біреуі төрағалыққа сайланады. Осылайша екі органда да бір мүше бір дауысқа ие болу жолымен шешім қабылданады. Еуразиялық экономикалық комиссия жұмысына қажетті соманы қаржыландыруда Беларуське 4,7 пайыз үлес тисе, Қазақстан – 7,33 пайыз, Ресей 80 пайыздан астам қаржы жұмсайтыны белгілі болып отыр.
Қожа Ахмет Ясауи атындағы Халықаралық қазақ-түрік университетінің қызмет шарттары туралы Қазақстан мен Түркия арасындағы үкіметаралық келісімді және 2009 жылғы 22 қазандағы Қожа Ахмет Ясауи атындағы Халықаралық қазақ-түрік университеті қызметінің шарттары туралы екі ел үкіметтерінің келісіміне өзгеріс енгізу туралы хаттаманы ратификациялау туралы заң қаралды. Заңдық құжатта сырттан келетін тауарларға салықтық жеңілдіктерді алып тастауды ұсынған Ғани Қасымов мұндай артықшылық бір жоғары оқу орнына ғана жасалмауы тиістігін алға тартты. Сенатордың пайымынша, мұндай шығынды бюджетте қарастырған әлдеқайда тиімді әрі ашық жүзеге асады. Сондай-ақ сенаторлар екі ел арасындағы келісімнің үш тілде жасалғанына да наразылықтарын білдірді. Өйткені, екіжақты келісімде қазақ және түрік тілдерімен қатар, орыс тілі де қолданылған. Заң жобасын талқылай келе депутаттар оны қабылдауды ұйғарды.
Күн тәртібіндегі «Энергия үнемдеу және энергия тиімділігін арттыру туралы» және «Қазақстан Республикасының кейбір заңнамалық актілеріне энергия үнемдеу және энергия тиімділігін арттыру мәселелері бойынша өзгерістер мен толықтырулар енгізу туралы» заң жобалары да қабылданды. Бұдан басқа қолданыстағы кейбір заңнамалық актілерге асыл тұқымды мал шаруашылығы, индустриялық-инновациялық қызметті мемлекеттік қолдау, мемлекеттік сатып алу және жобалық қаржыландыру мәселелері бойынша өзгерістер мен толықтырулар туралы заң жобалары да қолдау тапқандығын айта кету керек.
Отырыста «Қазақстан Республикасының кейбір заңнамалық актілеріне Қазақстан Республикасында қор нарығын дамыту мәселелері бойынша өзгерістер мен толықтырулар енгізу туралы» заң жобасы бірінші оқылымда мақұлданды.
Асқар ТҰРАПБАЙҰЛЫ.