ӨЗАРА ТҮСІНІСТІК ҚАЖЕТ
Жаңаөзен қаласында болған біздің қоғамымыз үшін өте қолайсыз, жағымсыз жағдай баршамыздың жүрегімізге ауыр тиді. Мен осы қалада өткен ғасырдың 70-ші жылдарының басында еңбек жолымды мұнай кәсіпшілігінде инженер болып бастаған едім.
Содан бері жастық жігермен еңбек етіп, әр кезеңде әртүрлі қызметтер атқарып, осы қаланың ыстығына күйіп, суығына бір кісідей тоңған адаммын. Сондықтан осында орын алған келеңсіз жағдай төбемізден жай түскендей менің де қабырғамды қайыстырды.
Бұл қала жасампаз еңбектің, бауырмал достықтың, береке-бірліктің қаласы болатын. Қазіргіден анағұрлым қиын кезде де тұйыққа тірелген барлық мәселелердің шешімі табылып, түйіндері түсіністікпен тарқатылатын. Біздің алдымыздағы аға ұрпақ, олардың ізін басқан біздер барлығын өз қолымызбен тұрғыздық. Мұнай кәсіпшіліктері игерілді, жолдар салынды, зауыттар тұрғызылды, жапан далада қала көтерілді.
Оның бер жағында, Тәңірдің берген сыйы Қазақстанның тәуелсіздігіне қол жеткіздік. Егемен ел болдық. Елбасымыз ел тізгінін қолына алды. Еңсемізді көтердік. Бүгінде көзімізбен көріп, қолымызбен ұстап отырғандай Отанымыз Қазақстан бүкіл әлемге танылып, дамудың даңғыл жолына шықты.
Барлық елімізбен бірге Жаңаөзенде де жасалып жатқан игі істер аз емес. Өткен екі шақырылымның депутаты ретінде жастық шағымның қаласы Жаңаөзеннің талай әлеуметтік мәселелерін шешуге атсалыстым.
Әрине, қандай дамыған қоғамда болса да шешімі табылуға тиіс проблемалар аз болмайды. Еңбек дауы қай жерде де бар. Бірақ ол қантөгіс жолымен шешілмеуі тиіс. Адами парасат, түсінікті негізде, заң жолымен ғана шешілуі керек. Осы дағдарыстағы ең бір қиын жағдай – қан төгілді, адам өліміне жол берілді. Марқұм болған отандастарымыздың жақын-туыстарына көңіл айта отырып, осы әлеуметтік дағдарыстан шығудың бірден-бір жолы еліміздің заңнамасын басшылыққа алу, сабырлылық, ақылға жеңдіру және өзара түсіністік дегім келеді.
Елбасымыз Н.Ә.Назарбаев елімізді өткен жиырма жылда небір қиын-қыстау жолдардан алып өткен, басымызға түскен осы қиыншылықтан да алып өтетіндігіне, түйінді төрелігін айтатындығына еш күмән жоқ.
Зейнолла АЛШЫМБАЕВ, 3, 4-ші шақырылған Парламент Мәжілісінің депутаты.
Астана.
