Кеңеске қатысқан Алматы қаласының әкімі Бауыржан Байбек 1 қыркүйекте заманауи 1200 орындық мектеп-гимназия ашылатынын айтып, ұстаздар қауымын қуантты. Тамыз кеңесіне қатысқан Мәжіліс депутаттарын бастап келген Гүлмира Исимбаева да ұстаздарға жылы лебізін арнады.
Парламент Мәжілісі төрағасының орынбасары, «Нұр Отан» партиясы фракциясының жетекшісі Гүлмира Исимбаева бастаған топ тамыз конференциясының жұмысына қатысып, қала мұғалімдерімен кездесті.
Кездесу кезінде Гүлмира Истайбекқызы Мәжіліс жұмысының кейбір қорытындыларына тоқталды. Сонымен қатар жұмыс барысында депутаттар әлеуметтік салаға ерекше мән бергенін атап өтті. Мәселен, өткен сессия барысында 84 заң жобасы мақұлданса, 6-уы білім саласын және балалардың құқығын қорғауға арналды. Оның 3-еуі депутаттардың бастамасымен әзірленді. Олардың қатарында балалардың денсаулығына және дамуына зиян келтіретін ақпараттан қорғауға бағытталған және жоғары оқу орындарының акедемиялық дербестігі туралы заңдар бар. Сондай-ақ білім туралы заңға енгізілген өзгерістерге сәйкес, колледж түлектерінің бір мамандық шеңберінде бірден үш біліктілік алуға болатынын, мұның өзі олардың жұмысқа тұру мүмкіндігін молайтатыны туралы да айтты.
«Үшінші парламенттік сессияны тарихи тұрғыдан маңызды деп айтуға толық құқығымыз бар. Өйткені дәл осы Парламент қабырғасында Елбасымыз алғаш рет бес әлеуметтік бастамасын жариялады, оның заңнамалық қамтамасыз етілуіне депутаттар барынша белсенді қатысты», деді депутат.
Мәжіліс төрағасының орынбасары Г.Исимбаева Елбасының «білімді дамыта алмайтын елдің болашағы жоқ» – деген сөзін келтіріп, ұстаздық қызметтің басты нысанасы саналатын білім саласы мемлекеттің тірегі, өркениеттің айнасы екенін, келесі сессияда заң шығарушылық жұмысының векторы Елбасының тапсырмаларын орындауға және еліміздің педагогтеріне барынша қолдау көрсетуге бағытталатынын айтты.
Сапарбай ПАРМАНҚҰЛ,
«Егемен Қазақстан»
АЛМАТЫ
