Қазақстан ұсыныстары қашанда ұтымды
Елбасы Нұрсұлтан Назарбаев осыдан 25 жыл бұрын өзі бастамашы болған қордың қатысушы мемлекеттері басшыларының саммитінде ұтымды ұсыныстарын ортаға салды. Алдымен қордың ұйымдастырушылық құрылымын тәртіпке келтіру мен басқару жүйесін автоматтандыруға дейінгі іс-шаралар аумақтық ауқымнан шығып кеткен Арал мәселесін бірыңғайлауы тиіс. Нұрсұлтан Назарбаев, Гурбангулы Бердімұхамедов, Шавкат Мирзиёев, Эмомали Рахмон, Сооронбай Жээнбеков қабылдаған құжатта Қазақстан тарапының өзге де ұсыныстары көрініс тапты.
Жалпы, өткен ширек ғасырда Аралдың мәселесіне байланысты қорға қатысушы мемлекеттер көрпелеріне қарай көсіліп, шама-шарқынша қаржы бөліп келсе, оларға қоса дүниежүзілік қаржы институттары, жекелеген мемлекеттер қаржылай жәрдем етті. Аралдың тағдыры жайында алдымен дабыл қағып, экологиялық апаттың зардабын Біріккен Ұлттар Ұйымының мінберіне дейін жеткізген біздің еліміздің жанайқайын әлемдік қоғамдастық естіді.
Арнайы бағдарламалар қабылданып, қаржы құйыла бастаған соң Арал аумағының тіршілігіне қан жүгіріп, теңіз ұлтанынан су кете бастаған уақытта үдере көше бастаған ел тұрақтады. Бүгінде Аралдың суы сарқылғанымен, айналадағы елді мекендер артезиан құдықтарынан атқылаған сапалы ауыз сумен қамтылған. Ауылдар, аудан орталықтары газдандырылып, тезек теріп, сексеуіл шабатын күн де келмеске кетті. Бұл да болса шатқаяқтаған экологиялық жағдайға демеу болуда. Балық шаруашылығы қалпына келе бастады. Бұрын еңбеккерлері талай шығармаға арқау болып, өндірістік балық өндірудің биік сатысына шыққан балықшылар осыдан 15-20 жыл бұрын бірер кило балыққа зар болса, қазір жылына 8 мың тонна балық аулануда. Міне, берекенің бастауы.
Орамы келгенде дәл осы мәселелерді жетілдіре түсу – Халықаралық Аралды құтқару қорына қатысушы мемлекет басшыларының мерейтойлық саммитінің өзегіне айналды. Ал Мемлекет басшысы Нұрсұлтан Назарбаевтың Түрікменстанға сапары шақырушы тараптың басшысымен кездесуден басталған болатын...
Су деңгейі – 42 метр
Қазақстан Президенті Халықаралық Аралды құтқару қорының құрылтайшы мемлекеттері басшыларының отырысында саммиттің Халықаралық Аралды құтқару қорының 25 жылдығы қарсаңында өтуінің символдық мәні зор екенін айтып, осы жалпыөңірлік маңызды басқосу алаңының алғашқы күндерінен бастап мұнда Арал теңізі мен Арал аймағының күрделі әлеуметтік-экономикалық, су шаруашылығы және экологиялық мәселелерін шешуге бағытталған жұмыстардың атқарылып жатқанын атап өтті.
– Аралды құтқару қоры халықаралық деңгейде белсенді жұмыс жүргізуде. Соның арқасында Арал өңіріне әлемдік қоғамдастық пен халықаралық қаржы институттары тарапынан айтарлықтай көмек көрсетіліп келеді. Біздің бірлесе жұмыс істегеніміздің арқасында бұл қор Біріккен Ұлттар Ұйымының Бас Ассамблеясы жанындағы бақылаушы мәртебесіне ие болды, – деді Нұрсұлтан Назарбаев.
Қазақстан Президенті Орталық Азиядағы трансшекаралық су ресурстары өңірдегі халықтардың ортақ игілігі екеніне тоқталды, сондай-ақ осы аймақтағы мемлекеттердің барлығы тиімді шешімдер іздестіріп, оңтайлы идеялар мен нақты жобалар ұсынып жатқанын айтты.
– Түрікменстанның бастамасы бойынша Біріккен Ұлттар Ұйымының деңгейінде Арал аймағы елдеріне арналған БҰҰ-ның Арнайы бағдарламасын қабылдау мәселесі қарастырылуда. Тәжікстанның ұсынысы бойынша Біріккен Ұлттар Ұйымының Бас Ассамблеясы 2018 жылдан бастап «Су – орнықты даму көзі» атты халықаралық іс-қимылдың онжылдығын жариялады. Өзбекстан биылғы маусым айында Ташкентте Орталық Азияның халықаралық экологиялық форумын жоғары деңгейде өткізді. Қырғызстанның бастамасы бойынша Біріккен Ұлттар Ұйымы құрылымдарының қолдауымен «Шу және Талас өзендерінің бассейндеріне арналған іс-қимылдардың стратегиялық бағдарламасы» әзірленді, – деді Қазақстан басшысы.
Нұрсұлтан Назарбаев Қазақстанның осы бағытта белсенді жұмыс атқарып жатқанын айтып, елдер делегацияларын биылғы 10-12 қазанда Астанада өтетін Трансшекаралық су ағыны мен халықаралық көлдерді қорғау және пайдалану жөніндегі БҰҰ конвенциясына мүше тараптар кеңесінің сегізінші сессиясына қатысуға шақырды.
Қазақстан Президенті бірлескен іс-қимылдың арқасында қол жеткізілген оң нәтижелерге арнайы тоқталды.
– «Сырдария өзенінің арнасын реттеу және Арал теңізінің солтүстік бөлігін сақтау» ауқымды жобасын жүзеге асыру нәтижесінде Сырдария өзенінің төменгі саласындағы экологиялық жағдай елеулі түрде жақсарды. Солтүстік Арал қалпына келіп, онда судың деңгейі 2010 жылдан бері тұрақты түрде 42 метрлік көрсеткішті ұстап тұр. Судың тұздылығы төмендеп, теңіздің қоректік базасы, өсімдіктер мен жануарлар дүниесі қалпына келуде. Арал теңізінің қазақстандық бөлігіндегі микроклимат пен әлеуметтік жағдай жақсарды. Балық өңдейтін бірқатар кәсіпорын ашылып, олардың өнімі шетелге экспортталуда, – деді Мемлекет басшысы.
Нұрсұлтан Назарбаев шағын құрамда өзекті проблемалардың, ұйымның тиімділігін арттыруға және бірлескен күш-жігерді үйлестіруге бағытталған Халықаралық Аралды құтқару қоры міндеттерінің егжей-тегжейлі талқыланғанына назар аударып, Қазақстан ұсынған шараларға арнайы тоқталды.
– Қордың қазіргі институттарының негізінде Халықаралық Аралды құтқару қорының ұйымдастырушылық құрылымы мен шарттық-құқықтық базасын жетілдіру қажет. Арал теңізі бассейнінің су ресурстарын басқару жүйесін автоматтандырудың, бөлудің, есепке алудың, мониторинг жасаудың, соның ішінде олардың сапасын жақсартудың уақыты келді. Қазіргі жағдайда Орталық Азияның халықаралық су-энергетикалық консорциумын құру мәселесіне қайта оралудың маңызы зор. Халықаралық Аралды құтқару қорының Атқарушы комитетін елдеріміздің біріне тұрақты орналастыру мәселесін қарастыру керек, – деді Қазақстан Президенті.
Мемлекет басшысы бүгінгі кездесу халықаралық ауқымдағы маңызды оқиға болып саналатынын және су ресурстары мен экология мәселелері бойынша өңірлік кооперация үдерісіне тың серпін беретінін атап өтті.
– Біз мұнда жаңа басымдықтар мен міндеттерді анықтадық. Орталық Азияның орнықты дамуы мен өркендеуі үшін бұл мәселелерді шешудің маңызы аса зор. Сондықтан мұның бәрі біздің әрі қарай бірлесіп үйлесімді іс-қимыл жасауымызды талап етеді. Мен Қазақстанның әрқашан да өңірлік ынтымақтастық мәселелері жөнінде дәйекті әрі сенімді әріптес екенін және солай болып қала беретінін нық сеніммен айтқым келеді, – деді Нұрсұлтан Назарбаев.
Жаңа технологияларды қолдану ұсынылды
Мемлекет басшысы Халықаралық Аралды құтқару қорының құрылтайшы мемлекеттерінің басшылары отырысының қорытындысы бойынша бірлескен баспасөз мәслихатын өткізді.
Қазақстан Президенті журналистер мен ресми делегациялар мүшелерінің алдында сөйлеген сөзінде Түрікменстан Президентіне дәстүрлі қонақжайлылық көрсеткені үшін ризашылық білдіріп, саммиттің жоғары деңгейде ұйымдастырылғанын атап өтті.
– Бұл кездесуіміздің әлемнің барша мұсылман қауымы үшін қасиетті Құрбан айт мерекесінен кейін өткізілуінің символдық мәні зор. Осы мүмкіндікті пайдалана отырып, бауырлас халықтарға бақ-береке, бейбіт өмір, амандық тілеймін, – деді Нұрсұлтан Назарбаев.
Мемлекет басшысы Арал дағдарысы адамзат тарихындағы ең ірі экологиялық апаттардың бірі болып саналатынын атап өтіп, 50 жыл ішінде теңіздің аумағы 9 есе кеміп, су көлемі 30 есе азайғанын айтты.
– Жыл сайын Арал теңізінің кеуіп қалған ұлтанынан желмен бірге 80 миллион тонна улы тұз көтеріледі. Бұл тұз шаңды дауылмен Батыс Еуропадан Гималайдың шыңдарына дейін мыңдаған шақырымға таралып, адамдардың денсаулығына және елдеріміздің экологиялық жүйесіне зардабын тигізуде, – деді Мемлекет басшысы.
Нұрсұлтан Назарбаев Арал аймағының экологиялық жағдайын жақсартуға бағытталған Халықаралық Аралды қорғау қорының құрылтайшы мемлекеттерінің күш-жігерін қолдау үшін тараптардың осы проблемамен айналысатын дүниежүзілік қоғамдастыққа, Біріккен Ұлттар Ұйымына, барлық Қорлар мен банктерге жүгінгені жөн деп тапқанын атап өтті.
– Біз өз тарапымыздан қордың жұмысын жетілдіруге уағдаластық. Барлық мәселелерді, соның ішінде ескірген шешімдерді, сондай-ақ қордың барлық басқарушы және атқарушы органдарының қызметін талдау мәселесін шағын құрамда ашық талқыладық, – деді Қазақстан Президенті.
Мемлекет басшысы су шығынын 50-60 процентке қысқартып, өнімділікті 4-5 есе арттыратын тамшылатып суару сияқты заманауи технологияның және суаруға қолданылатын суды үнемді пайдаланудың маңыздылығын атап өтті.
– Заманауи ғылыми ұстанымдарға негізделген өте маңызды ұсыныстар болды. Мысалы экологиялық жағдайды жақсартуға септігін тигізетін әрі ауыл шаруашылығында малға жем дайындаудың көзі бола алатын, сондай-ақ тұздың көтерілуін болдырмайтын, тұзға төзімді жасыл көшеттер отырғызу мәселесі айтылды, – деді Нұрсұлтан Назарбаев.
Қазақстан Президенті ұсыныстардың бәрі саммиттің коммюникесінде бекітілгеніне тоқталып, түрікмен тарапы барлық ұсыныстарды жинақтайтынын, ал атқарушы комитет алдағы іс-қимылдардың нақты жоспарын әзірлейтінін атап өтті.
Жиын соңында Мемлекет басшысы тараптардың су шаруашылығы, өңірдің су-энергетикалық және экологиялық аспектілері жөніндегі ұстанымдарын жақындастыру мәселелерін егжей-тегжейлі талқылағанын атап өтіп, Қазақстан өткен келіссөздердің нәтижелерін жоғары бағалайтынын айтты.
Арал – ынтымаққа зәру аймақ
Халықаралық Аралды құтқару қорының өткен жылдарына аз-маз шолу жасап өтсек, 25 жылда тағдырлы теңізге байланысты қабылданған тағдыршешті шешімдер нәтижесіз болған емес. Бірақ журналистер алдында Өзбекстан президенті Шавкат Мирзиёев Түрікменбашы саммитінің келіссөздері оңайға соқпағандығын айтып қалды. Өйткені 2009 жылдан бері қорға қатысушы мемлекеттер басшыларының басы құралмаған. Әрі тартып, бері жығулар, ішкі ұстанымдар уақыт тізгінін тежей алсын ба? Оның үстіне, Қырғызстан тарапы қор жұмысына бейтарап қарап, оны Сооронбай Жээнбеков қордың сол кездегі жұмысы Қырғызстанның мүдделеріне сәйкес келмеуімен түсіндірді. Бірақ алдағы уақытта ұйым жаңғырар болса, қор жұмысына белсене қатысатындықтарын мәлімдеді.
Ал Түрікменстан мен Тәжікстан тараптары қордың қалыпты жұмысына мүдделілік білдірді.
Сайып келгенде, еліміз егемендікке жеткен жылдардағы елең-алаңда Мемлекет басшысы Нұрсұлтан Назарбаевтың Аралға байланысты алаңдаушылығы жоғары нәтиже беріп отыр.
ХАҚҚ Қазақстандағы атқару дирекциясының директоры Болат Бекнияздың айтуынша, Солтүстік Аралды реттеу жобасы аясында бірқатар экологиялық мәселелердің түйіні тарқатылған. Сырдарияның су өткізу қуаты арта түсіп, жағалау, өзен арналары шегенделген. Яғни судың ысырап болмауына барлық жағдай жасалған.
– Қазақстан тарапынан Көкарал бөгені салынған соң Солтүстік Аралдағы су деңгейі 42 метрге көтерілді. Аралдың тарихында судың ең биік деңгейі 53 метр болғанымен, қазіргі шамасының өзі 27 шаршы километр су жинақтауға мүмкіндік береді. Оған қоса, судың тұздылығы төмендегені балыққа да жайлы. Қазіргі уақытта балықшылар ата кәсіптеріне оралуда. Тіпті ауланған балық экспортқа шығарылып жатыр. Енді осы күйімізден де айырылып қалмау үшін Қазақстан Президенті ұсынған автоматтандыру жүйесін тезірек іске қосқан дұрыс. Бұл саммит бес мемлекеттің ынтымақтастығына серпін беруі тиіс, – дейді Б.Бекнияз.
Ал дирекцияның су ресурстары департаментінің жетекшісі Әмірхан Кеншімов Қазақстан тарапы ұсынған суды үнемді пайдалану жүйесі, бірлесе басқару, консорциум құру уақыт талабы екендігін айтады.
Өз кезегінде белгілі инженер ғалым Нариман Қыпшақбаев ширек ғасырда атқарылған жұмыстар нәтижесінде Аралға байланысты қауіптің беті қайтқандығын айтып отыр. Сырдарияның бойында КСРО кезінде салынбаған бөгеттер тұрғызылған. Суды реттеу, негізсіз шығынға жол бермеу мен үнемдеудің амалдары жасалған.
– Су – табиғаттың теңдессіз ырыздығы. Адамзаттың тіршілігінде судың пайдасы алтын мен күмістен де жоғары тұр. Ең бастысы, бір өзеннің тағдырын бір мемлекет жеке-дара шеше алмайды. Дәл осы арада ынтымақтастық, ауызбіршілік қажет. Оны Елбасы үнемі айтып келеді. Сондай-ақ көршілес мемлекеттер өзеннің бастауында тұрғандығын малданып, бұра тарту пиғылынан арылу керек. Оған Қазақстан тарапы ұсынып отырған су жүйесін басқаруды автоматтандыру жәрдем етеді. Сонда ғана Сырдария суының Аралға құйғанға дейінгі арнасы толық бақылауда болады, – дейді Н.Қыпшақбаев.
Сарапшылардың айтуларына қарағанда, бүгінде Сырдария өзенінің жылдық қоры 37 млрд текше метрдің шамасында. Ал тұтынушы мемлекеттердің Сыр суына сұранысы 50 млрд текше метрден асып кеткен.
Сайып келгенде, Н.Қыпшақбаевтың айтуынша, әлем елдерін Орталық Азия мемлекеттерінің Аралдың тағдырын қалай шешетіндігі қызықтыруда. Өйткені жер бетіндегі 360 мемлекетаралық өзеннің қай-қайсысында да осы тектес қиындықтар туындауы мүмкін. Сондықтан Аралды құтқару шараларынан басқалар да сабақ алуға бейіл.
Бабаларымыз ежелден судың да сұрауы болатынын бекер айтпаған. Дамыған өндіріс, өрістеген экономика, халық санының артуы болашақта да суға сұранысты арттыра түспек. Ал бауырлас елдер Аралдың мәселесін өзара сенімділікпен, достық пиғылмен, адал үлес арқылы шешіп алмаса болмайды. Халықаралық Аралды құтқару қоры қатысушы мемлекеттері басшылары саммитінің де көздегені осы. Президенттер қол қойған коммюникеде бұл мәселелер тайға таңба басқандай көрсетілген. Жаңа заманда өзгелерден бір шелек су алудың өзі мүмкін болмайтындығын тараптар толық түйсінгендей.
Серік ӘБДІБЕК,
«Егемен Қазақстан» –
Түрікменбашыдан