Ел экономикасындағы ең ауыр еңбектің бірі шахтерлердің еншісінде екені белгілі. Қарағанды облысының әкімі Ерлан Қошанов өңірдегі байырғы кен орындарының бірі Костенко атындағы шахтада болып, кеншілермен жүздесті. Өңір басшысы өзі де шахтаға түсті. Көміршілермен жұмыс барысында жүздесіп, олардың хал-жайымен танысты. Оларға Елбасы Н.Назарбаевтың кеншілердің еңбек жағдайын үнемі сұрап, бақылауда ұстап отыратынын жеткізді.
Қарағанды шахталарын басқаратын «АрселорМиттал Теміртау» АҚ жылдың басынан бері еңбеккерлердің жалақысын 33,55%-ке арттырған.
Президент тапсырмасымен «АрселорМиттал Теміртау» акционерлік қоғамын дамытудың 2018-2020 жылдарға арналған Жол картасы жасалып, бұл құжатқа Инвестициялар және даму жөніндегі министрі Жеңіс Қасымбек, Қарағанды облысының әкімі Ерлан Қошанов және аталған компанияның бас директоры Парамжит Калон қол қойған болатын. Жол картасына сәйкес, «АрселорМиттал Теміртау» үш жыл ішінде Болат, Көмір және Кен департаменттерінің өндірістік нысандарына 305 млрд теңге инвестициялайды. Жылға шаққанда, компания биыл 100 млрд теңге, 2019 жылы 105 млрд теңге және 2020 жылы тағы 100 млрд теңге құймақ. Айта кету керек, былтыр компания тек 50 млрд теңге инвестициялаған болатын.
Осы қаражаттардың есебінен өндіріс ошақтары жетілдіріліп, материалдық-техникалық тұрғыдан жақсартылып, шахтерлер еңбек қауіпсіздігін қамтамасыз ету шаралары жүзеге асырылады. Индустрияның 4.0. стандарттары қолданылады. Алдағы уақытта экология мәселелеріне де баса көңіл бөлінбек.
Қайрат ӘБІЛДА,
«Егемен Қазақстан»
ҚАРАҒАНДЫ
