Құрлық додасының соңғы жарыс күндерінде Индонезия астанасында бірнеше ресми кездесу өтеді. Қазақстан ҰОК басшысы Халықаралық Олимпиада комитетінің президенті Томас Бахпен кездеседі.
Сондай-ақ, Т.Құлыбаев Ұлттық Олимпиада комитеттері Қауымдастығының (ANOC) және Азия Олимпиадалық Кеңесінің (АОК) президенті шейх Ахмад әл-Фахад әл-Сабахпен жолығады.
Еске сала кетейік, Т.Құлыбаев Азия Олимпиадалық Кеңесінің вице-президенті саналады. Кездесулер барысында Қазақстан ҰОК пен халықаралық спорттық ұйымдардың әріптестігін нығайту мәселелері қарастырылады.
Бұдан бөлек, Қазақстан ҰОК басшысы қазақ боксшыларының жартылай финалдық бәсекесін, дзюдодан финалдық жекпе-жектерді және су добынан өткен матчты тамашалады.
Қазіргі сәтте Қазақстан спортшылары жазғы Азия ойындарынан 11 алтын, 11 күміс және 39 қола медаль жеңіп алды. Азия ойындарының жабылу салтанаты 2 қыркүйекке жоспарланған.
