Жалпы, биылғы оқу жылында аймақ бойынша жаңа қонысқа көшкен мектеп оқушыларының қуанышы облыс орталығында екі еселенді десе де болғандай. Білім күні Талдықорған қаласында да қос мектеп пайдалануға беріліп, алғашқы қоңырау салтанаты өтті. Оқушылардың қуанышын бөлісуге облыс әкімі Амандық Баталов келіп, білім ғимаратының тұсаукесеріне қатысты.
– Бүгін өңірде 45 мыңға жуық бала алғаш рет мектепке қадам басып отыр. Біздің кейбір аудандарымызда 45 мың халық тұрады. Яғни бүгін мектепке тұтас бір ауданның тұрғыны келді деуге болады. Өте қуанышты жағдай. Еліміздегі тұрақтылықтың арқасында ұлтымыз өркендеп, ұрпақ санының артып келе жатқандығының көрінісі. Біз өз тарапымыздан облыста балалардың білім алуына жағдай жасауға тиіспіз. Бұған толық негіз бар. Міне, жаңа оқу жылына 7 мектеп пайдалануға беріліп отыр. Жалпы 22 оқу ғимараты 6,8 млрд теңгеден астам қаржыға күрделі және ағымдағы жөндеуден өтті. Ал Жетісуда мектеп салу ісі жалғаса береді. Жыл соңына дейін тағы 2 мектептің құрылысы аяқталады. Талдықорған қаласында 300 орындық музыка мектебінің құрылысы аяқталуға жақын. Осының барлығы ұрпақтың сапалы білім, саналы тәрбие алуы үшін мемлекет тарапынан жасалған қамқорлықтың үлгісі, – деді облыс басшысы Амандық Баталов оқушылармен кездесу кезінде.
Талдықорған қаласында қолданысқа берілген 2 мектеп те 1200 оқушыға арналған. Қазір қала тұрғындарының қатары өсіп, әлеуметтік нысандарға сұраныс жыл сайын артып келеді. Оның үстіне Талдықорғанда соңғы 15 жылда жаңадан мектеп ғимараты салынбаған екен. Жаңа оқу жылында жұмысын бастаған қос оқу шаңырағы дер кезінде ашылған құтты ғимарат болып отыр. Ал бұл білім шаңырақтарының материалдық-техникалық базасы толықтай жабдықталып, заманға сай білім беруге лайықталған екен.
Қалмаханбет МҰҚАМЕТҚАЛИ,
«Егемен Қазақстан»
Алматы облысы