Кәсіпқой бокс • 10 Қыркүйек, 2018

Сеулдегі сайыс

164 реткөрсетілді

Осыдан тура 30 жыл бұрын, нақтылап айтсақ, 1988 жылдың 17 қыркүйегі мен 2 қазаны аралығында Оңтүстік Кореяның астанасы Сеулде XXIV жазғы Олимпия ойындарының жалауы желбіреді. Байрақты бәсеке барысында 159 мемлекеттен келген 8,5 мыңға жуық үміткер сайысқа түсіп, спорттың 27 түрі бойынша 263 жүлде жиынтығын сарапқа салды.  

Сеул Олимпиадасы жайында біз бекер әңгімелеп отырған жоқпыз. Ол жарыста бірнеше тарихи оқиға тіркелді. Мәселен, шыққан тегі, тілі мен ділі, діні мен дәстүрі бір болғанымен, саяси көзқарастары мүлдем бө­лек Оңтүстік пен Солтүстік Ко­рея мемлекеттері алға­шында «Олимпия ойындарын бірігіп өткіземіз» дегендей сы­ңай танытқан еді. Алайда араға содыр саясат килігіп, бауырлас қос халықтың бұл жолы да бастары бірікпеді. Нәтижесінде, ғаламдық дода бір елде ғана өтті. Соған наразы болған Албания, Вьетнам, Куба, Никарагуа, Сейшель аралдары және Эфиопия сынды мемлекеттер бойкот жариялап, Сеулдегі сайысқа қатысудан үзілді-ке­сілді бас тартты. Олардың қа­та­рына Солтүстік Корея да қосылды.

Сеулдегі сайыста төрткүл әлем жұрт­шылығы төрт жылда бір өтетін Олимпия ойындарында Кеңес Одағының қызыл туы көкте желбірегенін соңғы рет көріп, әнұранын соңғы мәрте естіді. Жер жаһанның алты­дан бір бөлігін бауырына басқан алып империя көп ұзамай келмеске кетті. 1992 жылы Барселона Олимпиадасында КСРО құрамындағы бұрынғы «бауырлас» респуб­ликалар ТМД командасы сапында бақ сынаса, одан кейін барлығы да тәуелсіздікке қол жеткізіп, дүбірлі додаларда дербес елдің өрендері ретінде өнер көрсете бастады. Сол секілді сол заманда әлемдегі ең озық спорттық державалардың бірі саналған Германия Демократиялық Рес­публикасы (ГДР) үшін де бұл соңғы сынақ болды. Көп ұзамай олар да тарих сахнасынан жоғалды.

Бір ғажабы, Сеулдегі ойындар ыдырау алдында тұрған жоғарыда аталған қос мемлекет өрендерінің жеңісімен аяқталды. КСРО өкілдері 132 (51 алтын+35 күміс+46 қола) жүлдемен командалық есепте көш бастаса, 102 (37+35+30) медальді еншілеген ГДР құрамасы екінші орынды олжалады. 94 (36+31+27) мәрте жеңіс тұғырына көтерілген АҚШ-тың саңлақтары үшінші орынға табан тіресе, Оңтүстік Корея 33 (12+10+11), ГФР 40 (11+14+15), Венгрия 23 (11+6+6), Болгария 35 (10+12+13), Румыния 24 (7+11+6), Франция 16 (6+4+6) және Италия 14 (6+4+4) медаль алып, үздік ондықтың қата­рынан көрінді.

1988 жылғы Олимпия ойындарында КСРО-ның спорттық даңқын арттырып, абыройын асырғандар арасында Қазақ­станның спортшылары да же­терлік еді. Мәселен, ақтөбелік Валерий Люкиннің жалғыз өзі жеңіс тұғырына төрт мәрте көтерілді. Спорттық гимнастиканы серік еткен саңлақ екі жаттығуда алдына жан салмаса, тағы екі жарысты күміс медальмен қорытындылады. Командалық сайыс­та бас жүлдені олжалағандар қата­рында Алматының тумасы Вла­димир Новиков та бар.

Жеңіл атлеттердің жарысында жер­лестермізге қос алтын бұйырды. Желмен жарыс­қан желаяқтардың 4х100 эстафеталық сайысында шашасына шаң жұқтырмаған КСРО құрамасы сапында жез­қазғандық Виталий Савин мен қарағандылық Вла­димир Муравьев өнер көрсетті. Ауыр атлетикадан 90 кило салмақ дәрежесіндегі айқас атбасарлық Анатолий Храпатыйдың айқын жеңісімен аяқталды. Волей­болдан чемпиондық атаққа қол жеткізген әйелдер командасы сапында Қазақстанның екі аруы ойнады. Олар – балқаштық Елена Чебукина мен алматылық Ольга Кривошеева. Баскет­болдан бас жүлдені олжалаған ерлер құрамасының намысын қорға­ғандардың бірі әрі бірегейі – Алматының алыбы Валерий Тихоненко. Жамбыл облысы, Каратау қала­сында туып-өскен даңқты футболшы Евгений Яровенко да Олимпиада чемпионы деген мәңгі тозбас атаққа қол жеткізді.

Грек-рим күресінен 74 кило салмақ дәрежесінде белдескен Семей өңірінің түлегі Дәулет Тұрлыхановтың да ғаламдық додада бас жүлдені олжалауға зор мүмкіндігі болды. Бастапқы бәсекелердің барлығында кү­мәнсіз жеңіске жеткен қанда­сымыздың жолы ақтық айқаста Ким Ен Наммен қиысты. Бірақ шешуші тұста шынайы спорт­­тық сайыс шетке ысырылып, бұл бәсекенің тағдыры саяси тұрғыдан шешілді. Жарыс қожайындарының ығына жы­ғылған төрешілер әділдікті белден басып, жеңісті Оңтүстік Корея оғланына әперді. Соның салдарынан дүбірлі додаға нағыз бабында келіп, дара шы­ғамын деп жұлқынып тұрған дарабоз Дәулет күміс медальмен шектелді.

Сеул Олимпиадасынан тағы бірнеше жерлесіміз қола жүлдемен оралды. Олар – ватерполшы Сергей Котенко мен Нұрлан Меңдіғалиев, сырықпен секіруші Григорий Егоров, жүзуші Константин Петров және баскетболшы Ирина Герлиц.

Ғалым СҮЛЕЙМЕН,

«Егемен Қазақстан»

АЛМАТЫ

Баннер
Соңғы жаңалықтар

«Crown Батыс» «Тұлпарға» айналады

Аймақтар • Бүгін, 16:28

Негізгі бағыттар айқындалды

Аймақтар • Бүгін, 15:00

Алматыда қойма өртеніп жатыр

Аймақтар • Бүгін, 09:28

20 жыл аңсаған алтын...

Спорт • Бүгін, 09:25

Сырттанов туралы сыр

Руханият • Бүгін, 09:23

«Алтын аймақ» – Ақмешітте

Руханият • Бүгін, 09:20

«Шаңырақтың» шапағаты

Руханият • Бүгін, 09:13

20 мыңға жуық адамның азабы – жол

Экономика • Бүгін, 09:11

Жұртым деп келген жеткіншектер

Руханият • Бүгін, 09:08

Тағылымы мол кездесу

Аймақтар • Бүгін, 09:03

Бақтың барар жері – ынтымақ

Аймақтар • Бүгін, 08:46

Тырнақалды туындының тың тынысы

Аймақтар • Бүгін, 08:42

Саф өнерге сұраныс жойылмайды

Руханият • Бүгін, 08:40

Әлеуметтік желілер: сөз бен көз

Руханият • Бүгін, 08:39

Аграрлық банк құрылса...

Экономика • Бүгін, 08:30

Жол құрылысына серпін берді

Саясат • Бүгін, 08:27

Ұқсас жаңалықтар