Фото: Майгүл СҰЛТАН
Израильдегі Бейлинсон медициналық орталығының гастроэнтеролог- эндоскописті Виолетта Габович елорда дәрігерлеріне эндоскопиялық ультрадыбыстық зерттеу (УДЗ) арқылы асқазан-ішек және ұйқы безі мен өт жолдарындағы ісіктерді, энтероскопиямен аш ішектегі ісіктерді анықтау, сондай-ақ оған сол мезетте операция жасау әдісін үйретті.
Президенттік клиника дәрігерлері эндоскопиялық диагностиканың барлық заманауи әдістерін игерген. Аш ішекті зерттеу энтероскопиясы елімізде тұңғыш рет осы ауруханада бір ай бұрын жүзеге асқан болатын. Аз уақыт ішінде осы әдіспен 23 зерттеу жүргізілген. Эндоскопиялық ультрадыбыстық зерттеу де осы клиникада алғаш рет жасалып жатқан эндоскопиялық диагностиканың бір түрі. Президенттік клиникадағы заманауи жабдықтар зерттеулердің осы түрін күнделікті жүргізуге мүмкіндік туғызып отыр. Ал эндоскопиялық ретроградтық холангиопанкреатография болса асқыну қаупі жоғары, күрделі хирургиялық процедура.
Шеберлік сыныбын жүргізген шетелдік дәрігер аталған әдістерді бір мезетте орындауды тәжірибе жүзінде көрсетті. «Қазіргі уақытта адамдар асқазан-ішек, ұйқы безі мен өт жолдары және аш ішек ауруларына жиі шалдығады. Олар осы әдіс-тәсілді қажет етеді. Бүгін көрсетіліп жатқан әдіс арқылы осы органдардағы ісіктерден анализ алып, түрін анықтауға болады. Сондай-ақ жылауық түріндегі және қатерсіз ісіктерді сол мезетте эндоскопиялық жолмен алып тастауға мүмкіндік бар. Бұған дейін науқастар шетелге барып тексерілетін. Болмаса науқас компьютерлік томография арқылы ісіктің түрін анықтап, хирургиялық ашық операция жасатуға мәжбүр еді. Тілік жасалатын хирургиялық операциядан кейін пациент бір апта бойы ауруханада жататын. Онда асқынулар да көп кездесетін. Ал 30 минуттан бір сағатқа дейін созылатын бұл әдіспен бір мезетте диагностиканы жасап, операцияны да істеп, сол күні науқасты үйіне қайтаруға да мүмкіндік алып отырмыз», дейді Президент Іс басқармасы Медициналық орталығының ауруханасының дәрігері Жеңісбек Тыныкөзиев.
Майгүл СҰЛТАН,
«Егемен Қазақстан»
