Кітапта Әбу Насыр әл-Фараби және оның арғы-бергі ізбасарлары мен мұралары, олардың өзі және отбасы тұтынған қолөнер бұйымдары мен тұрмыстық заттары, шаруашылық құрал-саймандары, Отырардың құпия көмбелері, сондай-ақ 1930 жылға дейін Арыстанбаб кесене-мешіті жанында рухани ағарту ошағы болған шағын мұсылман кітапханасы, Елбасының киелі өңірге сапарлары мен зиялы қауыммен кездесуі, ұлылардың ұлағатты ізін жалғап келе жатқан буынның да өткенге із қалдырар істері туралы сөз болады. Деректер қазынасын құнды кітап етіп, көпшілікке ұсынған мемлекет және қоғам қайраткері Қуаныш Айтаханов және әдебиет зерттеушісі, Мәдениет қайраткері Абдулла Жұмашев.
Ежелгі Отырар қаласының дүниежүзілік өркениетке қосқан үлесі, ондағы алар орны бүкіл әлемге аян. «Ғалымдардың айтуынша, жазба дерегі аз, бірақ ескерткіштерге ең бай елміз. Жазба дерегіміз жиырма процент десек, 80 процент тарихымыз ескерткіштерде тұр. Еліміздің қайсы бір төбесі мен жәдігерлерінің сырына үңілсеңіз тұнып тұрған тарихы бар. Ал Отырар жайлы аз айтылып, жазылып жатқан жоқ. Бірақ сол деректердің бәрінің басын қосып, келер ұрпақтың еншісіне қалдыру жұмысы Отырар ауданының тумасы, қоғам қайраткері Қуаныш Айтахановтың бастамасымен жүзеге асты. «Отырар жәдігерлері» биыл деректермен, тарихи құндылықтар жайлы ақпараттармен толықтырылып, үлкен энциклопедия түрінде жарыққа шықты», дейді «Руханият Әбу Насыр әл-Фараби» музейінің негізін қалаушы Абдулла Жұмашев.
1000 дана таралыммен жарық көрген «Отырар жәдігерлері» кітап-альбомына қызығушылық танытып, оң пікірлерін білдірушілер көп.
Ғалымжан ЕЛШІБАЙ,
«Егемен Қазақстан»
Түркістан облысы