Солтүстік Қазақстанда дене шынықтыру-сауықтыру кешені ашылды

Аймақтар • 21 Қазан, 2018

Солтүстік Қазақстанда дене шынықтыру-сауықтыру кешені ашылды

167 реткөрсетілді

Мағжан Жұмабаев ауданының орталығы Булаево кентінде екіқабатты еңселі денешынықтыру- сауықтыру спорт орталығы қолданысқа беріліп, Абылайханның сенімді серіктерінің бірі болған Батыр Баянның есімін иеленді.

Egemen Qazaqstan

Шараның ашылу салтанатында сөйлеген сөзінде облыс әкімінің бірінші орынбасары Айдарбек Сапаров биылғы Жолдауда өңірлік деңгейдегі резервтерді тауып, бұқаралық спорт пен денешынықтырудың қолжетімділігін арттыру міндеті қойылғанын, елімізде кем дегенде 100 денешынықтыру-сауықтыру кешенін салу тапсырмасы берілгенін атап көрсетті.

«Өңір жұртшылығының 30 процентке жуығы спортпен шұғылданып, жастарға саламатты өмір сүру үлгісін көрсетіп келеді. Жуырда Петропавл қаласында мемлекеттік-жекеменшік әріптестік шеңберінде 2,6 миллиард теңгегенің әмбебап теннис орталығы тұрғызылды. Бұл үрдіс алдағы уақытта да өз жалғасын табады.Кешенге қазақ жерін жоңғар шапқыншылығынан қорғауда теңдессіз ерліктер көрсеткен, есімі халық жүрегінде сақталған Баян Қасаболатұлының есімін берілуін жұртшылықтың ұсыныс-тілектері екені талассыз », дей келіп, аймақ басшысы Құмар Ақсақаловтың жылы лебізге толы құттықтауын жеткізді.

Батыр Баянның алтыншы ұрпағы Зейнолла қажы Олжабаев, облыстың құрметті азаматы, даңқты спортшы Жамбыл Тасеменов, ауыр атлетикадан облыстың аға жаттықтырушысы Ерік Әлібаев, тағы басқалары қуанышқа ортақтасып, ұлт денсаулығының маңызына тоқталды.

Аудан әкімі Асқар Бегманов саламатты өмір салтын белсене насихаттап, байрақтыбәсекелерде олжа салып жүрген жергілікті спортшылар мен жаттықтырушыларды марапаттап, ақшалай сыйақылар табыс етті.

1100 шаршы метр аумақты алып жатқан кешенді салуға қазынадан 80 миллион теңге бағытталды. Мұнда енді ауыл балалары күрес, ауыр атлетика, спорттың басқа да түрлерімен еркін айналысатын болады.

Өмір ЕСҚАЛИ,

«Егемен Қазақстан»

Солтүстік Қазақстан облысы