Облыс орталығындағы Орман және жануарлар әлемін қорғау жөніндегі мекемеге қарасты Павлодар, Жаңаауыл, Чернорецк, Ямышев, Черное және Көктөбе орманшылықтары бар. Бір орманшы қарамағындағы 1 мың гектар алқапқа бас-көз болады. Өрттен, заңсыз ағаш кесушілерден, аңшылардан қорғайды. Орман және жануарлар әлемін қорғау жөніндегі мекемеге қарасты аумақта аң аулауға тыйым салынған. Мақсат – өңірдегі орман қорын қорғау, сақтау, ағаштарды өсіру, жануарлар әлемін қорғау, олардың өсімін көбейтуге үлес қосу. Сондықтан жергілікті әкімдік, төтенше жағдай, жергілікті полиция, орманшылық басқармасынан құралған облыстық штаб құрылса деген ұсыныс айтып отыр орманшылар.
Облыстық жер қойнауын пайдалану, қоршаған орта және су ресурстары басқармасының мәліметінше, биыл өңірдегі Үрлітүп, Павлодар, Лебяжі орман шаруашылықтарына өрт сөндіру көліктері, моторлы қайықтар, тракторлар беріліпті.
Қазір орманшылар жануарлардың азығын дайындауға кірісіп кеткен. Олар жыл сайын қыс келерде жабайы жануарларға қорек тасиды. Табиғат жанашырлары жабайы жануарларға арнап жемшөп салатын астаулар орнатқан. Астауларға шөп, тұз салып кетеді.
Орманшылар жабайы аң-құстардың есебін де жүргізеді. Осы көрсеткіш арқылы аң аулау лимиті белгіленеді.
– Жануарларға қыс кезінде қалың қар астынан азық табу қиын. Сондықтан биотехникалық шаралар аясында 300 кило тұз, ағаш бұтақтарынан буып жасалған 1600 дана азық, 6 тонна шөп дайындалды. Күзде жауыннан, қыста аяздан, бораннан қорғайтын күркелер жасалды. Аңдардың азығына лайықты кесілген ағаштардың діңгектері ойылып, арнайы астаулар ілініп, жемшөп салынады, – дейді орманшылар.
Облыстық Орман шаруашылығы және жануарлар дүниесі аумақтық инспекциясының мәліметінше, елімізде 2016 жылы көктемгі аңшылыққа тыйым салынғаннан кейін биыл өткен жылмен салыстырғанда өңірдегі құстардың саны 20 пайызға өсіпті. Мысалы, үйрек 1091300-ге, қаз 49965-ке, қасқалдақ 193130-ға, шіл 49066-ға дейін жетіпті.
Көбейгені жақсы-ақ еді, биылғы жылдың қыркүйек-қазан айларында үйрек, қаз, қасқалдақ, құр, балшықшы құсын, бөдене мен көгершін, қоян, түлкі, қарсақ аулауға рұқсат беріліпті. Күзгі аңшылық маусымында өңірде 800-дей аңшы жабайы құстар мен аңдарды аулауға шығатын көрінеді.
Иә, айтса айтқандай-ақ, аң-құс, орман-тоғай біздің байлығымыз. Орманшылар болса аң-құстардың қыста жейтін азығына дейін дайындап беріп, күркесін жасап, аялап, қамқорлық көрсетуде.
Фарида БЫҚАЙ,
«Егемен Қазақстан»
ПАВЛОДАР