Жаппай сырғанаудағы жабырқау
Астанадағы «Алау» мұз айдыны сарайындағы «техникалық үзіліс» жұртшылықтың көңіліне сызат түсіруде
Алдымен, осы спорт кешенінің аталуы хақында бірер сөз. Әрине, катоктың тікелей аудармасы «мұз айдыны». Онда «сарайды» қыстырмалаудың жөні бар ма? Ал «Алау» мұз айдыны» деп шектелсек, тым қарабайырлап, ауқымын тарылтып алмаймыз ба? Сарай дегеннің өзі аса үлкен, айрықша ірі, архитектуралық жағынан ерекше бітімді боп келетін ғимарат мазмұнын ашады екен.
Астанадағы «Алау» мұз айдыны сарайындағы «техникалық үзіліс» жұртшылықтың көңіліне сызат түсіруде
Алдымен, осы спорт кешенінің аталуы хақында бірер сөз. Әрине, катоктың тікелей аудармасы «мұз айдыны». Онда «сарайды» қыстырмалаудың жөні бар ма? Ал «Алау» мұз айдыны» деп шектелсек, тым қарабайырлап, ауқымын тарылтып алмаймыз ба? Сарай дегеннің өзі аса үлкен, айрықша ірі, архитектуралық жағынан ерекше бітімді боп келетін ғимарат мазмұнын ашады екен.
Осы тұрғыда «мұз айдынын» олқысынсақ, «Алау» мұзда сырғанау сарайы» десек, ұғым мен мазмұн іштей қабысып тұратындай емес пе? Немесе, «Алау» сырғанақ сарайы». Тіпті «Алау» мұзды сарайы» (Ледовый дворец) десе де мәнінен онша алыс кетпейтін секілді.
Осы «Алау» мұз айдыны сарайымен қапталдасып тағы екі аумақты спорт ғимараты орын тепкен. Әуежайдан қалаға кіре берісте, Қабанбай даңғылының сол жағында орналасқан екіншісі – «Астана-арена», үшіншісі – «Велотрек» спорт кешендері. Осы үшеуінің қандай бағыттағы ғимараттар екенін сырт көз бірден аңғармай дал болары анық. Рас, маңдайшаларында жақындап барғанда ғана көзге шалынатын атау-жазулары бар. Алыстан андағайлатып, ірі де көркем жазумен еңселерін одан әрмен биіктетіп қойса, құба-құп. Көз қанығып, көңіл сеніп дегендей, көркем құбылысты ғимараттардың ажары мен сәніне ішкі тылсымының сыры қабысып, жайнап, жарасып-ақ кетпес пе? Жырақтан қол бұлғап шақырып, менде мынандай-мынандай қызықтар бар дегендей, ықылас оятып, ынталандырар еді-ау! Спортқа деген бұқаралық бұлқыныс сонда бұла күшке кенелер, бәлкім?
Жасыратын не бар, былтыр дүркіреп өткен қысқы Азиада ойындарынан соң Астанадағы біраз спорт ғимараттары аракідік бос күйінде қаңтарылып тұратыны айтылып та, жазылып та жүр. Шынның жүзіне тура қараған абзал ғой. Мүмкін, содан қорытынды шығаруды ойластырды ма екен, биліктегілер «Алау» мұз айдыны сарайын демалыс күндері жаппай сырғанауға беріп қойды. Халық оған ықыластанып баратын болды.
Алғашқы кезеңде үлкендерге кіру бағасы 500 теңгеден болса, жұрттың көп келе бастағаны ескерілген шығар, 1000 теңгеге көтерілді. Ал түстен кейінгі баға 1500 теңге. Тиісінше, конькиді жалға беру бағасы да өсті. Сырғанау ләззатына бөленгендер ақшаға қарап жатпайды, бағаны қалай көтерсе де соның ығына жығыла береді. Бір жолғы 3 сағаттық демалыс қызығын ештеңеге айырбастағылары келмейтіндей.
Бірақ… Өткен жолғы өкінішке тап болған біраз астаналықтардың жүзіндегі кірбіңді айтпай тұра алмас едік. Түске дейінгі мұз айдынына жіберілгендер бала-шағасымен, немерелерімен сырғанақтың өзге біліп болмас бойды бусандыра балқытатын шипа-шапағатына шомылып, шуылдаса сыртқа беттегенде, билет кассасының алдында томсырайып, түнеріп тұрғандарға тап болғаны бар. Не болыпты? Ішке кіре алмай тұр екен. Себебі – сағат 15-16 арасы техникалық үзіліс кезі депті. Үлкен-кішісі бар бір қора сырғанақшылар осылайша сарсылып, әлдекімдерге шағынғанымен дәнеңе өнбеді. Мұндайда бір сағаттан астам уақыт күту қандай қиын. Ұнжырғалары түсіп, кеміріліп кетіп бара жатты. Қала шетіндегі қызыққа қауымдасып келгендегі көрген құқайлары осы. Тауаны шағылып, маңдайлары тасқа соғылғандай.
Техникалық үзілістің көздеген мақсаты бар шығар. Ол жағына бас ауыртып жатпайық. Алайда, астаналықтардың бұқаралық спортқа деген жаппай ынта-ықыласын болымсыз үзілістермен тежеп қою қисынсыз-ақ. Біріншіден, қаншама адамның көңіліне кірбің түсті. Олар келесі жолы бұл маңға атізін сала қояр ма екен? Уақыт аңдыттырып қойған машақатынан қашады да. Екіншіден, мұз айдыны сарайы қаншама пайдадан қағылды десеңізші. Бұл жерде қаржыдан өткін бір салдар – демалушылар сенімінен шыға алмау жағы қатты алаңдатуы тиіс еді. Реті келгенде айтайық, өзге мемлекеттерде жұртшылықтың мәдени демалуына жақсы жағдай жасау үшін барлық қолайлылықтар жіті ойластырылған. Тіпті Жаңа жыл мерекесі күндері Мәскеудің мұражайлары келушілерге тегін қызмет көрсеткен. Сондағы көздегені – неғұрлым ынталылар қатарын көбейту. Ал бізде ықыласпен сырғанаққа келіп тұрғандардың кеудесінен итергендей жағымсыз іс-әрекет сезіледі.
Есімізге амалсыздан түсіп отыр, былтырғы қысқы Азия ойындары күндері осы мұз айдыны сарайына конькишілер сайысын көрмекке жиналғандар екі сағат бойы қақаған аязда ішке кіре алмай ызғақтағанының куәсі болғанбыз. Іште орын жоқ, билет сатылып кеткен деп қарауылда тұрған тәртіп сақшылары бет қаратпай қойып еді. Уақыты келіп, сарайға амалсыздан тегін кіргізгенде конькишілердің жаттықтырушыларынан өзге жанкүйерлерді көре алмай таңқалғанбыз. Соңынан білсек, сарай жанынан билет кассасын ұйымдастыра алмағаны белгілі болды. Ал халықты «билет сатылып кеткен» деп алдай салу оларға шыбын шаққан құрлы сезілмегендей…
Қыс қызығы әлі алда. Тек, жаппай сырғанау ретсіз сырғақсытылып, сағымданбаса екен.
Қайсар ӘЛІМ,
Астана.
