Эктовтар әулеті жазғы Олимпиадаға кемі екі жолдама ұтып алуға нық бел байлап отыр
Дүбір
Олимпиадаға 155 күн қалды
Лондонда өтетін ХХХ Олимпиада жолдамасынан қызылжарлық спортшылардың еншісіне нақты бұйырғаны әзірге біреу ғана. Оны ұзындыққа үш мәрте секіруден халықаралық дәрежедегі спорт шебері Ирина Эктова былтыр Алматыда өткен жеңілатлетшілердің үшінші жазғы спартакиадасында жеңіп алды (Ол бертінге дейін Литвиненко деген қыз кезіндегі тегімен танымал болып келген – Ө.Е.). Бір қызығы, осы айтулы жарыста Евгений Эктов алтын медальді қанжығаға өңгергеніне қарамастан, жолдамадан тыс қалды. Оның себебін халықаралық дәрежедегі спорт шебері, ұзындыққа үш мәрте секіруден Сидней, Пекин олимпиадаларына қатысушы Елена Парфенова түсіндіріп берді.
Дүбір
Олимпиадаға 155 күн қалды
Лондонда өтетін ХХХ Олимпиада жолдамасынан қызылжарлық спортшылардың еншісіне нақты бұйырғаны әзірге біреу ғана. Оны ұзындыққа үш мәрте секіруден халықаралық дәрежедегі спорт шебері Ирина Эктова былтыр Алматыда өткен жеңілатлетшілердің үшінші жазғы спартакиадасында жеңіп алды (Ол бертінге дейін Литвиненко деген қыз кезіндегі тегімен танымал болып келген – Ө.Е.). Бір қызығы, осы айтулы жарыста Евгений Эктов алтын медальді қанжығаға өңгергеніне қарамастан, жолдамадан тыс қалды. Оның себебін халықаралық дәрежедегі спорт шебері, ұзындыққа үш мәрте секіруден Сидней, Пекин олимпиадаларына қатысушы Елена Парфенова түсіндіріп берді.
– Олимпиада жолдамасын сарапқа салатын жеңіл атлетшілерден белгілі халықаралық нормативтерді орындау талап етіледі. Атап айтсақ, «А» лицензиясын ұту үшін қыздар кемі 14 метр 30 сантиметрді, «В» лицензиясын иелену үшін 14 метрді бағындыру керек. Жігіттер үшін 17 метр 10 сантиметр және 16 метр 90 сантиметр болып белгіленген. Алатау баурайында Ирина 2-ші орын алса да 14 метр 48 сантиметрге қарғып, «А» лицензиясын қоржынға салды. Евгений 16 метр 88 сантиметрге ғана секірді. Ал күзде Күншығыс елінде ұйымдастырылған Азия біріншілігінде 16 метр 91 сантиметрді көрсетіп, «Б» лицензиясын еншіледі, – деді ол.
Сөз арасында Евгенийден басқа жерлестеріміз Маргарита Мацко /800 метр/ мен Владислав Поляков /жүзу/ «В» лицензиясын иеленгенін айта кеткен жөн. Алда әлі Олимпиада жолдамасы таласқа түсетін небір байрақты бәсекелер тұрғанын ескерсек, лицензиялар санының өсе түсеріне күмәніміз жоқ. Ол үшін аянбай тер төгулеріне тура келері анық. Бұл санатқа боксшымыз Дариға Шәкімова мен балуанымыз Роман Мелешинді де қосуға болады.
Ерлі-зайыпты Александр Николаевич пен Нина Викторовна Эктовтардың есімдері Қызылжар жұртшылығына жақсы таныс. Кәсіпқой спортшылар көп жыл бойы спорттың қысқа қашықтыққа жүгіру түрімен айналысып, бірнеше мәрте облыстың, еліміздің жеңімпазы атанған. Енді, міне, ширек ғасырға жуық «спорт падишасы» саналатын жеңіл атлетиканың жас толқынын тәрбиелеумен айналысып келеді. Тәжірибелі бапкерлер өздерінің төл мектебін қалыптастырып, қанат қаққан шәкірттері додалы бәсекелерде олжа салып жүр.
Солардың бірі – баласы Евгений мен келіні Ирина. Мектепте оқып жүрген қаршадай қыздың спортқа бейімін алғаш байқап, қамқорлығына алған А.Эктовтың өзі болатын. Жеке жаттықтырушысы ретінде ұзындыққа үш мәрте секірудің қыр-сырына талмай үйретті. Ирина спортқа кештеу келсе де, тынбай еңбектенудің арқасында қысқа мерзімде талай белестерді бағындырды. 2007 жылы Макаода өткен Азия ойындарында жеңістің ең биік тұғырына көтерілді. 2008 жылы Пекиндегі Жазғы олимпия ойындарына қатысу бақытына ие болды. Тәжірибенің аздығынан жеңіліс тапса да, көп нәрсе үйреніп қайтты.
Осыдан екі жыл бұрын Евгений мен Иринаның көңілдері жарасып, шаңырақ құрды. Дүниеге Яна есімді қыздары келіп, Ирина спорттан қол үзіңкіреп қалды. Алайда, бала күту демалысынан кейін үлкен аренаға қайта оралды. Үзбей жаттығып, әбден бабы келіскен соң, байрақты бәсекелерде қайтадан жарқырап көріне бастады. Лондонда бағы жанып, еліміздің әнұраны шырқалып жатса, таңданудың еш реті жоқ. Намысты қыз тұманды Альбион еліне қатысушы емес, жүлде олжалайтын бәсекелес ретінде барғысы келетінін еш жасырмайды.
«В» лицензиясына Евгенийдің көңілі көншір емес. Жолдамаға жол ашатын Гран При /Банкгок/, Ғ.Қосанов /Алматы/, Татьяна Колпакова атындағы /Бішкек/, Қазақстан чемпионаты секілді лицензиялы жарыстарда топ жаруды басты мақсат еткен сыңайлы. Бүгінде олар оқу-жаттығу дайындықтарын Тайландта қызу бастап кеткен. Жеке бапкерлері – жеңіл атлетикадан облыстың аға жаттықтырушы қызметін атқаратын А.Эктов.
Нина Викторовнаның көңілі алаң. Немересі Янаны әжелік мейіріммен аялап-толғанып, Эктовтар әулетінің тілеушісі болып отыр. Ол да жаттықтырушылықпен шұғылданады. Облыстық жоғары спорттық шеберлікті жетілдіру мектебінің тәжірибелі бапкері ретінде болашақ олимпиада ізбасарларын тәрбиелеп келеді. Оның Евгений Клюев, Алексей Мащенцев, Светлана Загороднева секілді балғын шәкірттері шет елдерде олжа сала бастады. Қызы Екатерина әпкесінің жолын қуған. Ұзындыққа үш мәрте секіруден еліміздің бірнеше дүркін жеңімпазы атанып, Канада мен Италияда өткен әлем чемпионаттарына қатысып қайтты.
Қызылжар өңірінде жеңіл атлетиканың дамуына осылайша зор үлес қосып келе жатқан Эктовтардың қос шәкіртінің бабы мен бағы келісіп, еліміздің абыройын асқақтатса, шіркін, деген арманымыздың ақиқатқа айналуын тілейік.
Өмір ЕСҚАЛИ,
Солтүстік Қазақстан облысы.
