Дүбір
Олимпиадаға 148 күн қалды
ТӨРТЖЫЛДЫҚТЫҢ БАСТЫ БӘЙГЕСІ
Олимпия ойындары – жер жүзіндегі жарыстардың жарысы, төресі болып саналады. Қазіргі кезде күллі адамзат қауымы әлі Олимпиададан артық, Олимпиададан қызығырақ жарыс ойлап тапқан жоқ. Өйткені, осы төрт жылда бір келетін байрақты дода бүгінгі күні бүкіл дүние жүзін біріктіретін, бүкіл халықтың арманын бір жерге тоғыстыратын жарыс болып табылады.
Олимпиадаға 148 күн қалды
ТӨРТЖЫЛДЫҚТЫҢ БАСТЫ БӘЙГЕСІ
Олимпия ойындары – жер жүзіндегі жарыстардың жарысы, төресі болып саналады. Қазіргі кезде күллі адамзат қауымы әлі Олимпиададан артық, Олимпиададан қызығырақ жарыс ойлап тапқан жоқ. Өйткені, осы төрт жылда бір келетін байрақты дода бүгінгі күні бүкіл дүние жүзін біріктіретін, бүкіл халықтың арманын бір жерге тоғыстыратын жарыс болып табылады.
Бұл ойындарға құрлықтық жарыстардан іріктеуден өтіп, жолдама алған елдердің спортшылары қатысады. Сол себепті онда бір ай бойы жүзден жүйрік, мыңнан тұлпар шыққан спортшылар ғана күш сынасатын болады. Жалпы, Олимпиада күні кеше ғана пайда болған жоқ. Бұл жарыстың тарихына қарасаңыз, оның іргетасы француз Пьер де Кубертеннің ұсынысы бойынша алғаш рет Афинада өткен ойындарда емес, одан ертерек, б.з.б. 776 жылда қаланғанын көруге болады. Иә, сол кезде ол алғаш рет Зевс құдайының құрметіне Олимпия қаласында өткізілді. Дегенмен, осы күнге дейін оның нақты пайда болу мерзімі туралы ешбір жерде ешқандай мәлімет жоқ.
Ал жаңағы Олимпиаданың іргетасы б.з.б. 776 жылы қаланғаны бізге жеткен эллиндердің аңызынан алынған мәлімет. Сөйтіп, сол кезде ежелгі гректер Олимпия қаласында алғашқы жарыстарын өткізіп, онда әскери дайындық, дене шынықтыру өнерін көрсету байқаулары, ақындар мен шешендердің дәстүрлі айтысы, әртүрлі көрмелер ұйымдастырған. Ал жарыстары бес күнге созылып, оған жүгіру, күрес, ат жарысы, қоссайыс пен бессайыс сияқты спорт түрлері кірген. Сол кезде жарыстарда жеңімпаз атанған адамға зәйтүн ағашының жапырағынан өрілген алқа кигізіліп, құрмет көрсетілген екен.
Тағы бір аңызда ежелгі Элладада тек бір ғана спорт түрі – жүгіруден ғана жарыстар өтіп, ол Эллис және Писы қалаларында өткен деген дерек бар. Содан кейін ойындар танымал болған соң, оған грек қалаларының бәрі қатыса бастапты. Сол кезде Олимпиада жақындаған сайын Элладада елдің барлық түкпіріне «Қасиетті бейбітшілікті» хабарлайтын желаяқтар жіберіліп тұрған екен. Олар барлық елді мекенді өз еркімен аралап, соғысты тоқтатуға көп жұмыс істеген. Оларды, қазіргі тілмен айтсақ, еріктілер (волонтерлер) деп те айтуға болады. Міне, сол волонтерлерді барлық жерде салтанатпен қарсы алып отырған. Оларды тек Эллада елі ғана емес, Мысыр, Испания, Қырымда да ерекше салтанатпен қарсы алатын болған.
Сөйтіп, Олимпия ойындары кезінде соғыстар тоқтатылып, бүкіл елде «Қасиетті тыныштықты» орнату дәстүрі болған деген аңыз бар. Осы кезде бүкіл Эллада елінде бір айдан үш айға дейін адамдарға бір-біріне қару жұмсауға, қылыш ойнатуға, тіпті жарыстарды тамашалауға қару-жарақпен келуге тыйым салынатын болған. Мұндай дәстүр қазіргі кезде де бар. Алайда, Олимпиада кезіндегі «Қасиетті тыныштықты» 2008 жылы Ресей мен Грузияның бұзғаны көпшіліктің көңіліне кірбің түсіргені белгілі. Осындай жағдай бұдан былай қарай қайталанбаса екен дейміз.
Ал Эллада елінен бізге жеткен аңыздарға қарағанда, сол алғаш рет Олимпия қаласында өткізілген жарыс кейін б.з.б. 394 жылы Византия императоры Феодосий І-дің бұйрығы бойынша тоқтатылады. Содан кейін ХІХ ғасырдың орта шенінде Грекияда Олимпия ойындарын қайта жандандыру мақсатында біраз әрекет жасалады. Сол кезде 1859, 1870, 1875 және 1889 жылдары Афинада секіру, жүгіру, диск, найза лақтыру, гимнастика сияқты спорт түрлерінен жарыстар өтіп, оған тек грек спортшылары ғана қатысады. Міне, осындай Олимпиада қозғалысын жандандыру мақсатында істелген жұмыстардың нәтижесінде ойындар бүкіл грек халқын біріктіретін ұлттық идеяға айналады.
Бұл ойындарды ұйымдастыруда француз Пьер де Кубертен көп еңбек сіңірді. Ол Олимпиялық қозғалысты жандандыруға, қайта тірілтуге 40 жылдай уақытын жұмсады. 1892 жылы 25 қарашада Сорбоннаның салтанат залында Пьер де Кубертен «Олимпиаданы жаңғырту» тақырыбында дәріс оқыды. Осы жерде ол алғаш рет бүкіл әлемде спортты жандандырудың маңыздылығын, ол бейбітшілік пен қауіпсіздіктің символы болуы керектігін айтып, Олимпиаданы өткізу туралы ұсыныс жасады. Алғашқы кезде бұл идея гректердің өзінен шыққан болатын. Гректер бұрынғы дәстүрді қайта жаңғырту үшін әр төрт жылда астық пен жүзім жинау маусымының арасында спорттық жарыстар өткізу туралы шешім қабылдаған еді. Сондай отырыстардың бірінде гректер Олимпиялық ойындардың бірыңғай күнтізбесін бекіту идеясын айтып, ойындарды бір күнде өткізу туралы ұсыныс жасап, кейін оны бір айға дейін ұзартуға болады деген шешімге келеді.
Ал Пьер де Кубертен сол идеяны заңды негізде іске асырғысы келіп, Францияның оқу ағарту министріне Олимпиаданы өткізу туралы ұсынысын айтады. Министр болса, оның бұл идеясы жақсы екенін, ұсынысын қабылдайтынын, бірақ бұл мәселені халықаралық деңгейде көтеріп, оған дене тәрбиесін дамыту жөніндегі халықаралық конгресті шақыруды тапсырады. Содан 1894 жылы 24 маусым күні Сорбоннада конгресс шақырылады. Оған 12 елден келген екі мың делегат қатысып, Олимпия ойындарын өткізу үшін Халықаралық олимпиада комитетін құру туралы шешім қабылдайды. Оның тұңғыш төрағасы болып грек Деметриус Викелас сайланады. Сол жерде шығыс пен батысты байланыстыру үшін екі өркениеттің арасында жатқан Афина қаласы алғашқы Олимпиаданы өткізетін қала болып таңдалады. Арада екі жыл өткен соң, 1896 жылы Афина қаласы қазіргі заманғы Олимпия ойындарын алғаш рет өткізеді. Ал екі жыл бұрын конгресте Олимпиаданы өткізу туралы баяндама жасаған француз Пьер де Кубертен тарихта Олимпиаданы тірілткен, оның бастамашысы болған адам ретінде қалады.
1896 жылы Афина Олимпиадасы 6-15 сәуір аралығында өтеді. Бағдарламасына күрес, гимнастика, жеңіл және ауыр атлетика, жүзу, нысана көздеу, теннис, семсерлесу сияқты спорт түрлері кірген Олимпиадаға 13 елден 311 спортшы қатысады. Осы жылы Олимпиада алауы жағылады. Содан бері ол төрт жылда бір рет қолдан қолға, шекарадан шекараға өтіп, Олимпиаданы қабылдайтын қаланың төріне келіп, үлкен қазандықта тұтанады. Ал Олимпиаданың эмблемасы 1913 жылы жасалады. Ондағы 5 шеңбер – 5 құрлықты бейнелейді. Олимпиаданың туы – ақ матаға салынған логотип. Ақ түс – ойын кезіндегі бейбітшілікті білдіреді. Оны қолдану 1916 жылы жоспарланғанымен, тек 1920 жылы ғана Бельгияда алғаш рет жүзеге асады.
Міне, Олимпиада сияқты тарихи жарыстарға біздің еліміз тәуелсіз мемлекет ретінде тек 1996 жылдан бері қатысып келеді. Ал одан бұрын, яғни Кеңес Одағы кезінде де қазақ жастары Олимпиадаға алып елдің қол астында қатысқанын білеміз. Қазақ жастарының алғашқы жүлде алған кезі де сол КСРО тұсында болатын. Ғұсман Қосанов 1960 жылы Римде өткен Жазғы ХVІІ Олимпиадада 4х100 метрлік эстафеташылар жарысында күміс жүлде алды. Ал қазақтан шыққан тұңғыш Олимпиада чемпионы – баскетболшы Әлжан Жармұхамедов. Ол ағамыз КСРО құрамасының сапында 1972 жылы Олимпиада чемпионы атанды. Содан кейін 1980 жылы грек-рим күресінен Жақсылық Үшкемпіров пен Шәміл Серіков Олимпиада чемпионы атағына ие болды.
Дегенмен, одан ертерек тағы бір талантты спортшымыз, биыл 75 жасқа толған Әмин Тұяқовтың 1964 жылы Токиода өткен Жазғы ХVІІІ Олимпиадада жүлде алатын жөні бар еді. Ол кезінде 100, 200 метрге жүгіруден және 4х100 метрлік эстафеташылар жарысында КСРО рекордшысы болған. 1963-1965 жылдары 200 метрлік жарыста КСРО халықтары спартакиадасының екі дүркін жеңімпазы, екі мәрте чемпионы, 100 метрлік қашықтықта Одақтың бірнеше дүркін чемпионы атанған. Ал 4х100 метрлік эстафеташылар сынында Еуропа кубогының жеңімпазы, КСРО чемпионатының бас жүлдесін иеленген.
Бірақ, бірнеше жыл қатарынан халықаралық жарыстар мен Одақ көлеміндегі бәйгелерде топ жарып, жұбы жазылмай жүрген Тұяқов, Озолин, Қосанов, Политико төрттігі Токио Олимпиадасына барып тұрса да аяқ астынан өзгеріске ұшырады. КСРО-ның бас бапкері Тұяқовтың орнына эстафеташылар командасына Савчукті қосты. Нәтижесінде КСРО құрамасы эстафетада мәреге төртінші болып жетті. Бас жүлде АҚШ құрамасының уысында кетті.
Алайда келесі жылы КСРО мен АҚШ арасында тарихта «Ғасыр матчы» деген атпен қалған кездесуде 4х100 метрлік эстафетада кеңестік төрттік есені қайтарып, бас бәйгені жеңіп алды. Бірақ бұл Олимпиададағы жеңіс емес еді…
Бұл енді, әрине, мүлдем басқа әңгіме.
Дастан КЕНЖАЛИН.
Суретте: Пьер де Кубертен.