Міне, сондай игілікті жобалардың бірі ретінде Шымкент қаласында мұқтаж жандар үшін «IZGILIK» аталатын тегін дүкен ашылды. Аталған дүкен күнкөріс деңгейі төмен отбасылар мен жетім-жесірлерді азық-түлік, киім-кешекпен қамтамасыз етуді мақсат еткен. Мұнда тек материалдық көмек көрсетіліп қана қоймай, жұмыссыз азаматтарды қабілетіне қарай жұмысқа үйретеді. Осылайша, олардың қоғамда өз орнын табуына септігін тигізеді.
«Ізгілікте жарысайық» қайырымдылық қоғамдық қорының ұйымдастыруымен жұмыс бастаған бұл әлеуметтік үйден мұқтаж жандар аптаның 6 күнінде қажетті заттарын тегін алуына мүмкіндік бар. Бұл үшін өзімен бірге жеке куәлігін, әлеуметтік аз қамтылатын топтың өкілі екендігін анықтайтын құжатын алып келсе жеткілікті.
Дүкеннің ішкі ережесі бойынша мұқтаж жан айына тек бір ғана киімге ие болмақ. Азық-түлікті де отбасындағы адам санына қарай шамалап алып кете алады. Ал дүкен сөрелеріндегі заттар қайырымды қала тұрғындарының күнделікті осы әлеуметтік үйге алып келген тартулары. Айналасына қарайласқанды азаматтық парыз санайтын жандар Шымшаһардағы Елшібек батыр көшесінде орналасқан №88 үйге атбасын бұрып, қажетті тұрмыстық заттарды өткізуіне болады.
– Тек киім-кешек таратып қана қоймай, қыстың көзі қырауда жаурамас үшін отыны жоқ отбасыларға көмір түсіріп беруді жоспарлап отырмыз. Әрине, бұл уақытша көмек. Дегенмен, осындай сауапты істерді көптеп ұйымдастыру арқылы қоғам назарын әлеуметтік жағдайы төмен отбасыларға, мүгедек жандарға аудармақпыз. Тіпті, еңбекке қабілеттілігі жоқ ағайынды қайырымдылық қор арқылы баспанамен қамтамасыз етуді қолға алдық. Осы жылы кәсіпкерлердің қаржылай қолдауымен 2 үй сатып алдық. Алдағы уақытта үйсіз-күйсіз жүрген отбасыларға табыстайтын боламыз», дейді «Ізгілікте жарысайық» қоғамдық қорының басшысы Асқар Мәуленов.
Дүкен ашылған 10 күн ішінде 250 отбасыға киім-кешек, 50-ден астам отбасыға әлеуметтік, тұрмыстық заттар үлестірілген. Алдағы уақытта дүкен желілерін аудандардан ашып, ауылдағы әлеуметтік жағдайы төмен отбасыларға көмек қолын созуды жоспарлап отыр екен.
Кейде күнделікті қоқыс жәшігінің қасында үйіліп жатқан жамау-жасқаусыз киім-кешек пен қалта толы ақ нан қалдықтарын көргенде қайырымдылыққа мойыны бұрылмай жүрген адамдардың қылығына ішің ашиды. «Өзінен артылғанды далаға тастағанша неге мұқтаж жандарға үлестірмеді екен?» деген сұрақ туады... Мүмкін бұл жандар «керексіз» заттарын кімге берерін білмей жүрген шығар. Ендеше, сондай жандарға «IZGILIK» дүкенінің мекен-жайын көрсетіп жіберсеңіз, сол да қайырымдылыққа барабар іс болмақ.
Нұршат ТӨКЕН,
«Егемен Қазақстан»
ШЫМКЕНТ
