Мемлекеттік индустриялық-инновациялық даму бағдарламасы аясында іске қосылған «DALA-FRUIT.KZ» ЖШС-нде бастапқыда 83 адам тұрақты жұмыспен қамтылса, компания жұмысын бастаған үш жылда оның саны 277 адамға жеткен. Жалпы көлемі 106,5 гектар болатын серіктестік бауына 215 мың түптен астам жеміс ағаштары егілген. Мұнда алманың түр-түрі мен шиенің «Стенлей» атты шетелдік сұрыптарын кездестіруге болады. Яғни, 1 гектер жерге шамамен 2500 түп ағаш көшеті отырғызылған. Заманауи техникамен жабдықталған бау тамшылатып суару жүйесі арқылы жұмыс істейді.
Ақпараттық топ өкілдері мекеменің алмадан шырын шығаратын цехын, шетел нарығына сапалы өнім дайындайтын қоймасын аралап, кәсіпкер Болатбек Әлиевтің шетелдік тұқым сұрыптаудағы озық үлгілер мен технологияларды кәдеге жаратқан игі бастамасына ризашылығын білдірді.
Мұнан соң Сайрамдағы шетел нарығына ет экспорттайтын «Нұрым групп» бордақылау алаңында болған ведомство басшысы сойыс малдың басын көбейтіп, ірі шаруа қожалықтарын, оның ішінде қой бордақылау алаңдарын арттыруды тапсырды.
«Қазірдің өзінде Қытай нарығы көптеген ауылшаруашылық өнімдеріне (балық өнімі, асыл тұқымды жылқылар, мұздатылған қой еті, бал, бидай, бидай кебегі, соя бұршағы, сойылатын жылқылар, рапс күнжарасы, сиыр еті, жоңышқа, ұн, өсімдік майы) ендеп келеді. Иран тарапымен қойды, тоңазытылған әрі салқындатылған қой етін, сиыр етін, тағамдық жұмыртқаны жеткізуге арналған ветеринарлық талаптар келісілді. Ал биыл тірідей ірі қараға қойылатын талаптарды келісу жоспарланып отыр. Сондай-ақ ірі қараны және ұсақ малды Сауд Арабиясы мен Біріккен Араб Әмірліктеріне, ет пен ет өнімдерін, тауық жұмыртқасын Біріккен Араб Әмірліктеріне жеткізуге қойылған шектеулер алынды. Ет және сүтті ірі қара мал, құс, суармалы жерлерді дамыту бойынша ұзақ мерзімді салалық бағдарламалар әзірленді. Салалық бағдарламалардың шаралары мен көрсеткіштері аймақтық бағдарламаларда көрініс табады. Ірі инвестициялық жобаларды іске асыру басталды. Ұлтаралық компанияларды экспорттық нарықтармен Қазақстанның агроөнеркәсіп кешеніне тарту олардың капиталға ғана емес, сондай-ақ жаңа өндіріс пен технологияларды инвестициялауына, жаңа басқару тәсілдерін енгізуге және танымал әлемдік брендтердің белгісімен ауыл шаруашылығы өнімдерін экспорттауға мүмкіндік береді», деді Ө.Шөкеев.
«Нұрым групп» кешенді мал бордақылау алаңы мамандарының айтуынша, жыл басынан бері Өзбекстанға 800 тонна, Иранға 200 тонна ет жөнелтілді.
Ақпараттық-насихаттық топтың сапары Шымкент қаласында қорытындыланды. Ө.Шөкеев Елбасының «Қазақстандықтардың әл-ауқатының өсуі: табыс пен тұрмыс сапасын арттыру» атты Қазақстан халқына Жолдауын түсіндіру мақсатында қала активімен кездесті.
Бүгінде Жолдауда көрсетілген міндеттерді орындау мақсатында Шымкент қаласында бірқатар жұмыс атқарылып жатқанын айтқан қала басшысы Ғабидолла Әбдірахымов алдағы уақытта «Шымкент» агроиндустриялық аймағы құрылатынын жеткізді. Жобада аграрлық секторды экономиканың жаңа қозғаушы күштеріне айналдыру қажеттігі ескерілетін болады. Оған 20 млрд теңге жеке инвестиция тартылып, 40 кәсіпорын ашу жоспарлануда. Нәтижесінде Шымкентте бүкіл оңтүстікте өсетін ауылшаруашылық өнімін өңдейтін кластер құрылып, 2022 жылы ауылшаруашылық өнімінің көлемі 67,5 млрд теңгеге жеткізілмек.
«Ауылшаруашылық өндірістік кешенін қолдаудың жоспарланған шаралары үш блокқа бөлінуі мүмкін: жүйе, индустрия және нақты инвестициялық жобалар. Өнеркәсіп мемлекеттік тетіктер жетілдіріліп, мемлекеттік қолдау көлемі артады. Сондай-ақ тиімсіз субсидияларды қысқарту жоспарлануда. Босайтын қаражат несиелер мен лизинг бойынша сыйақы мөлшерлемесін, бірінші кезекте фермерлерді техникалық және технологиялық қайта жарақтандыруға арналған инвестициялық субсидияларды азайту үшін пайдаланылатын болады», деді сала басшысы.
Нұршат ТӨКЕН,
«Егемен Қазақстан»
Түркістан облысы
