Биіктігі 5,3 метр болатын ескертіштің лентасын Білім және ғылым министрі Ерлан Сағадиев, Түркістан облысының әкімі Жансейіт Түймебаев пен Шымкент қаласының әкімі Ғабидолла Әбдірахымов қиды. Салтанатты рәсімде сөз алған облыс әкімі мүсіннің шынайы шыққанын, өңірдегі қара шаңыраққа айналған білім ошағының ұлы жазушы Мұхтар Әуезовтың есімімен аталатыны үлкен мақтаныш екенін атап өтті. Мерекелік шарада қонақтар, сондай-ақ «Мұхтартану» ғылыми-зерттеу орталығының ашылуына қатысты.
Тұсауы кесілген тағы бір нысан – «Студенттерге қызмет көрсету орталығында» болды. Шәкірттерге «бір терезе» қағидасы бойынша қызмет көрсететін орталықтың жұмысымен министр Ерлан Сағадиев арнайы танысып шықты. Орталық бір мезетте 40-50 студентке қызмет етеді. Университеттің ректоры, тарих ғылымдарының докторы, профессор Дария Қожамжарованың айтуынша, цифрланған орталық қызметі арқылы студенттің білім алуы, сабаққа қатысуы, емтихан нәтижелері бақыланып, қажетті құжаттарына да қол жеткізуіне болады.
Ғалымжан ЕЛШІБАЙ,
«Егемен Қазақстан»
Шымкент
