Атажұрт
Егемендiктi елiмiз ендi еншiлеген кезде Қазығұрт ауданының адам аяғы баспаған, топырағына күрек жүзi тимеген ат шаптырым жазықтарында қос бiрдей ауыл сән түзедi. Екi елдi мекеннiң “Қызылсеңгiр” деген атты иемденгенiн Тәжiкстанның Қорғантөбе облысындағы Вахш және Колхозабат аудандарынан ат арылтып келген ағайындар ұжымдастырып едi. Ал, Қазақстан картасына “Заңғар” деп енгiзiлген екiншiсiн Өзбекстанның Ташкент облысы Бөке ауданынан шекара асқан қандастарымыз көтердi.
Егемендiктi елiмiз ендi еншiлеген кезде Қазығұрт ауданының адам аяғы баспаған, топырағына күрек жүзi тимеген ат шаптырым жазықтарында қос бiрдей ауыл сән түзедi. Екi елдi мекеннiң “Қызылсеңгiр” деген атты иемденгенiн Тәжiкстанның Қорғантөбе облысындағы Вахш және Колхозабат аудандарынан ат арылтып келген ағайындар ұжымдастырып едi. Ал, Қазақстан картасына “Заңғар” деп енгiзiлген екiншiсiн Өзбекстанның Ташкент облысы Бөке ауданынан шекара асқан қандастарымыз көтердi.
Тәуелсiздiгiмiз жаһанға жарияланысымен-ақ Қорғантөбеден атажұртқа қопарыла қозғалған көштiң басы киелi Қазығұрттың құнарлы баурайына табаны тигенде жүз шақты отбасы едi. Жиырма жылда отау саны 270-тен асып, қазiр айдарлы ауыл болды.
Қызылсеңгiрдiң уығын шаншып, керегесiн керiп, шаңырағын құрған көштiң бас бұйдасын ұстап, тарихи отанына қарай бұрған қадiрмендi қариялардың айтуына қарағанда, олардың бабалары Қорғантөбеге 1860 жылы отаршылдар атақонысын озбырлықпен тартып алғаннан кейiн жансауғалап қашуға мәжбүр болыпты.
– Атажұртымыз – қазақ елi әлемге өз тәуелсiздiгiн паш еткенде Қорғантөбедегi бүкiл бауырларымыз бөркiмiздi аспанға атып шаттандық. Көп ойланып-толғанып жатпастан туған елге дүр көтерiлуге белдi бекем будық. Алдымен атажұрттың қай аумағына бет түзейтiнiмiздi ақылдасып алдық та, жолға шығуға жиналдық, – деп еске алады сол мәре-сәре күндердi ұлағатты ардагер ұстаз Тағай Шәкiбаев.
– Оралмандар көшiнiң туған елдiң Қазығұрт төскейiне бiржола бет бұруына септiгi тиген себептi де айта кеткен жөн, – деп әңгiменi жалғады ауыл биi Қалмантай Баймолдаев. – Ертеректе Душанбедегi институтты бiтiргеннен соң, Оңтүстiк Қазақстан өңiрiнiң Қазығұрт аймағында қызмет iстеп, осында тұрақтап қалған Дәуренбек Ауданов деген жерлесiмiз бар едi. Оның әкесi Әбсаматпен Вахшта бiрге тұрдық. Соның жаңағы ұлымен хабарластық. Сол жұрағатымыздың да шақыруы дәтiмiзге қуат болды. Атажұртқа қозғалған көштiң басы-қасында Тәжiкстанда да қазақ қауымы арасында халықшылдығымен танылған ағаларымыз Әбсамат Ауданов, Әбдiшүкiр Iлесбаев, Әбсалам Әбдiқалып, Қалабай Әлиев, Нағымет Машақов бел шешiп жүрдi. Киелi Қазығұрттың бұл кездегi басқару тiзгiнiн ұстағандар бойларына ұлтжандылық, қандастарға қайырымы мол қасиет дарыған азаматтар болып шықты. Сол кездегi аудан басшысы Молдабай Iлиясов бiздi мидай тегiс тепсеңге, қарайған үйсiз қазiргi осы Қызылсеңгiр алқабына керуенiмiздiң арқанын тарқатысып, жүгiн түсiрiстi.
Әрбiр шаңыраққа 20 сотықтан жер телiмi бөлiндi. Қолдағы қаржымызға арзан бағаға құрылыс заттары берiлдi. Алдын ала жобасы дайындалған көшелерде асарлатып үй тұрғызылды. Айналасы 3-4 айда жоқ жерден жаңа бiр ауыл жұмыртқадай жұтынып шыға келдi. Жат жақтан ағайын деп жеткен бiзге Молдекең бастаған елжанды азаматтардың қолдан келген көмегiн, қамқорлығын, жылы сөзiн аямағанына алғысымыз шексiз.
Қызылқия ауыл округiне қарасты Қызылсеңгiрден кейiн келесi оралмандар ауылы Заңғарға да жолымыз түстi. Бұл елдi мекен Қақпақ ауыл округiне қарайды. Ташкент облысының Бөке ауданынан 1993 жылы көктемгi көкөзек шақта көшiп келген 5 отбасына берiлген жер телiмдерi де айдалада едi. Оларға да үйлерiн салуға мемлекет тарапынан көмек қолы ұсынылды. Өздерi асарлатып баспана тұрғызды. Бұлардың жақсы жайғасқандарына көз жеткiзген жерлестерi де көп ұзамай осылай қарай қоныс аударды. Қазiр бұл ауылда 130 отбасын құрайтын мыңға жуық тұрғын бар.
– Бiз Ташкент маңындағы шағын қала iспеттес Тойтөбеде тұрдық. Өнiп-өскен, орныққан жерiмiз ежелден қазақтың басыбайлы атамекенi едi. Амал нешiк, ол бөгденiң боданына байланып кеттi – дейдi осындағы мектеп директорының оқу iсi жөнiндегi орынбасары Мүнира Қоңыратбаева. – Бiз квотаға алаңдап жатпадық, өз ырқымызбен ұлтымыздың бiрегей отаны – тәуелсiз Қазақстанға жедел көшудi ғана мұрат еттiк. Ерім Өктем осында келген бетте өз қаржысына мектеп құрылысын қолға алып едi, бiлiм ошағының оқу жылына дейiн бiтуiне аудан әкiмдiгi тағы да қолұшын бердi. Қазiргi жалпы орта мектебiмiздiң ғимараты мемлекет қаржысына салынды. Пошта бөлiмшесi, фельдшерлiк-акушерлiк бекет, электр стансасы, дүкен халық сұранысына лайық қызмет етiп жатыр. Әуелгiде қиындықты бастан өткергенiмiздi несiне жасырамыз, бастысы, ағайындар арасына келдiк. Ендi мiне, тәуелсiз елiмiздiң бiр бұтағы болып орныққанымызға қуаныштымыз. Балаларымыз да шадыман. Қазiр бiз оралман емеспiз. Өзiмiздi егемен Қазақстанның түпкiлiктi тұрғыны, азаматы ретiнде сезiнемiз.
Десе дегендей-ақ, алды ел тәуелсiздiгiмен түйдей құрдас, соңғысы да соған жетеқабыл қос ауылдың түзу көшелерi, жасыл желекке көмкерiлген келiстi үйлерi сүйсiндiредi. Ауыл маңындағы жоталы жайлау төрт түлiк малға толды. Үйлерiнiң iргесiндегi жерден отбасынан артылатын көкөнiс жиналады. Елдi мекен айналасынан бөлiнiп берiлген суармалы құнарлы танаптардан көл-көсiр ырзық алынады. Еңбекке жарамды бiр де бiреуi қол қусырып қарап отырмайды. Азаматтарының етi тiрлiгiнiң, ауызбiрлiгiнiң арқасында тұрмыстарын әлдеқашан түзеп алды. Басқаларға ендi өздерi де жәрдемдесетiн дәрежеге жеттi.
Қазығұрттықтар қатарларына қосылған қандастарының тыным таппайтын аса еңбекқорлығына, бiр жеңнен қол, бiр жағадан бас шығарудағы өте ұйымшылдығына, елдi бiрiктiретiн iске жанын сала кiрiсетiнiне, қандай да қиындыққа төзiмдiлiгiне, балды бармақ, бес аспап шеберлiктерiне таңдай қағысады. Олардың ерiнбей еңбек етуiн өздерiне үлгi тұтады және де осы екi ауылда кез келген тойдың iшiмдiксiз өтетiнiне таңғалады. Ауданда қазiр мал ұрлығы өршiп тұрса да бұл ауылдардың өрiсiнен де, қорасынан да бiр ашатұяқ жоғалыпты деген әңгiменi әлi күнге ешкiм естiмептi. Қазақы өмiршең әдет-ғұрыптың, салт-дәстүрдiң қаз-қалпында сақталып отырғанын тамсана әңгiмелейдi. Көршi ауылдармен ерсiлi-қарсылы қыз алысып, қыз берiсiп, құдандалы болып тату тiршiлiк жасап жатыр.
Айтпақшы, Қазығұрт ауданында екi жыл болды, Алматы-Ташкент күре жолының бойында Өзбекстаннан оралған, ертең келетiн қандастарымызға жергiлiктi әкiмдіктiң қаулысымен белгiленген, әзiрге шартты түрде Жаңбыршы деп аталатын жаңа ауылдың iргесi қаланып жатыр. Келес өзенiнiң шұрайлы жағасынан бөлiнген 50 гектар аумақта бiрер жылда тағы бiр ауыл бой көтермек. Көршiлес елден мұнда 250 отбасы көшiп келмек. Олардың жүзден астамына жер телiмiн беру жөнiнде шешiм де берiлiп қойылыпты. Қазiр 20 үйдiң құрылысы аяқталып, адамдары қоныстанып та үлгеріпті.
Тәуелсiздiкпен басталған ұлы көштiң алыстағы қандастарымызды елдегi ағайындармен қауыштырған шарапатты жолы осылай жарасты жалғасын таба бермек.
Жеңiс БАҺАДҮР.
Оңтүстік Қазақстан облысы, Қазығұрт ауданы.