Тамыр бүлкіліндегі тақырып
ТАҒДЫРЫМ ТАҢДАПТЫ. Немесе менің тағдырымдағы адамдар десем сөз көркі кіріп, мағына мархабатты бола түсер ме екен? Әлде екінші үйім болып кеткен қасиетті редакция шаңырағында оты маздап, ұшқыны миыма шашыраған тағдыр-талайлы тақырыптар ма екен? Тіпті жазғым келіп жабығып, қолым жүрмей қиналғанда көңіл ауаны буған сәттегі шамырқаныстың шаужайлатқан несібе-мақаласы ма? Жалынан ұстап жалынғандай боп, ой толғағымен елеп-екшегенде, емеурінімен емексіткен «қызық дүниенің» тосын толғақты, таптаурыннан тыс, бітімі бөлек, пішімі түйдек, айтпағы ерен, маңызы берен, жүрек лүпілі шығар, бәлкім?
ТАҒДЫРЫМ ТАҢДАПТЫ. Немесе менің тағдырымдағы адамдар десем сөз көркі кіріп, мағына мархабатты бола түсер ме екен? Әлде екінші үйім болып кеткен қасиетті редакция шаңырағында оты маздап, ұшқыны миыма шашыраған тағдыр-талайлы тақырыптар ма екен? Тіпті жазғым келіп жабығып, қолым жүрмей қиналғанда көңіл ауаны буған сәттегі шамырқаныстың шаужайлатқан несібе-мақаласы ма? Жалынан ұстап жалынғандай боп, ой толғағымен елеп-екшегенде, емеурінімен емексіткен «қызық дүниенің» тосын толғақты, таптаурыннан тыс, бітімі бөлек, пішімі түйдек, айтпағы ерен, маңызы берен, жүрек лүпілі шығар, бәлкім?
Редактор бастамасы ма, әлде өз жүрегіңнің әмірі ме немесе жиі жүргенге жолығысатын кейіпкерің ұсынған тақырып па: жазылмағы – қаламға серт! Айтылмаса – жүрекке дерт! Қане…
ШЕРХАН МҰРТАЗА: «Орақты сосын, алдымен театр…» 1990 жылдың 27 тамызы. Шерағаң мені «Социалистік Қазақстанның» (қазіргі «Егемен Қазақстан») Торғай облысы бойынша меншікті тілшісі етіп, қызметке қабылдады. Нұсқауынан бұрын қасы қайшыланып, мұрты жыбырлайды. Бара сала театрды жазуға кірісуім керек екен. Таңданыппын. Талмауратып, бір соққы жасады: «Орақты сосын!..» Салым суға кетіп, бүгіле түссем керек, тіктелуімді өтінді. Орақтың нағыз жан алып, жан берісіп жатқан қарбалас шағы-тын. Алғашқы тапсырманың түрі мынау. Шын айтып отыр ма өзі? Нұрлы жанары алдамайтын сыңайлы. Өткір көзінің ұшқыны өкіртіп жаз, қатырып жаз дейтіндей. Менің үнсіздігімнен аздап қарсылық, аңғалдық, алаңдаушылық нышанын сезді білем, сәтте жібіп, орақты кім оратынын сұрады. Әрине, Адам! Дұры-ы-ысс! Алдымен адамды тәрбиелейік. Торғайың жабылған тұста Жезқазғанға бас сауғалаған театрыңды қайта ашуға кіріс. Проблемасын аямай төк. Өзіңді құдды егіс даласында жүргендей жауапты сезін. Театр оңалмай, адам оңалмайды. Тәрбие керек! Тәрбиелі адам астықтың обал-сауабын біледі. Театр ашылып, көрерменін жинағанша орақ маусымы түгесілмей ме, осы бастығым аңдаусыз талап қойып отырғаннан сау ма дегендей дүдәмал күйімді тағы сезіп қойып, театр бір күндік немесе науқандық емес, жылдық, ғасырлық деп, шашыраңқы ойымды жинақтап, қолыма ұстатқандай болды.
Содан… Театрсыз орақ науқаны бітпейтіндей ойға малшынып, Торғайыма ұшып келейін. Келсем, орақ қызған. Басқа тірлік қалмаған. Менің ойымды тек театр қаумалаған. Облыс басшысына кіріп, Шерағаңның мақамына салмасам да, өзімнің ресмиленгендегі ызғарланып кететін сұсымды тежей алмай, дөкейдің «алдымен орақ, орақ…» дегенін құлаққа қыстырмай, «орақ сосын, театр алдымен…» дей беріппін ғой. Басшы да беріспейді. Мен де райдан қайтпаймын. Алдымен театрды жаз деген кім дейді ол. Шерхан Мұртаза! Облыс басшысы күрт моп-момақан бола қалды. Басын изеді. Құптады. Театрды жазудың жырын қалай бастағанын өзі сезбей қалды.
Қандай қызық тақырып! Кейіннен білдім ғой, театрсыз дүние бос екен! Әрине, орақ науқанын да ұмыт қалдырған жоқпыз. Қайта, жақсы қамтыдық десек те болады. Театрды шартты ұғым ретінде астарлап, меңзеген екен ғой бас редакторым. «Шерағам-ай!» деймін әлі күнге, тақырып іздеп сарсылғанда: «Ақылыңнан айналып кетейін!» Осындай талаптан соң тақырып таңдауда басты идеяны бөлектеп танып, көре білу машығын бойға дарытқандаймыз. Мәселенің ішкі астарын қопарыстырып, ең өзектісі деген аса ділгерін ноқталайтын болдық.
ТОҚТАР ӘУБӘКІРОВ: «Мәди бабамның «Қарқаралысын» ғарышта шырқадым!» Байқоңыр.1991 жылдың 2 қазаны. Батыр қазақ Тоқтар Әубәкіров Алматы уақытымен 11 сағат 59 минөтте ғарышқа самғап кетті. Қазақ елі бөркін аспанға атып, қуанды. «Егеменнің» басшылығынан: «Әдеттегідей Арқалық маңына қонуға тиіс қой, өте қырағы бол, репортаж бересің» деген тапсырма түсті. Енді жатсақ-тұрсақ, көкке қарап елеңдейтін болдық. Тоқтарлардың тілеуін тілейміз. Ол жалғыз емес еді, қасында орыс пен австрия ғарышкері бар. Бұрын тақырыпты жерден іздеп табатын басымыз, енді аспанға алақтаумен 10 қазанның таңын атырғанымызды байқамай қалғандай едік. Алматы мөлшерімен 9 сағат 12 минөтте Арқалықтың оңтүстік-шығысына қарай 58 шақырым жерде ғарышкерлер аман-есен қонды. Тікұшақпен жеткен едік. Адам көрмегендей, үшеуін қаумалап алдық. Сұрақтар қардай борады. «Мәди бабамның «Қарқаралысын» шырқадым», – деп, Тоқтар шаршаңқы күйін сездірмей, көзі күлім қақты. Осы кезде бетін тер жуып кетті де, өбектеп жүрген арнайы адамдар орамалмен жеңіл құрғата бастады… Біз сол әнді қазір жерде шырқап жіберсе ғой деп көксеп тұрмыз. Оған әл-дәрмені жоқтығын сездік те, ішімізден «Қарқаралыға» бастық… «Атыңнан айналайын Қарқаралы, Сенен бұлт, менен қайғы тарқамады. Сайыңнан сайғақ құрлы сая таппай, Мен бір жан қуғын көрген Арқадағы»…
Нөмірге репортаж берем деп, екі иіннен дем алып, аласұрып жүргенде ән мәтінін жете қаузай алмағандықтан, кейін, тіпті бүгінге шекті уақыттарда да, өзектегі ой өрмегін тарқатпаққа әуес едік. Сонымен, тосын тақырып өз жұмбағын бірден аша қоймайды екен-ау.
Тоқтар талғамы неге «Қарқаралыға» түсті екен? Әрине, кіндік қаны тамған жері – Қарқаралы. Орынды-ақ. Бірақ өзге де сыры болуы мүмкін-ау. Көңілі шерменді ғана осындай әнге жүгінер. Несі бар, Мәдидің өзіндік мұңын сәл тарқатып көрелікші. Кең пішіп, терең толғасақ, айып па? Тоқтар ұғымына сәйкестендіріп дегендей. Қарқаралыны қазақ еліне баласақ ше? Кеңес кезінде басынан бұлт, халқынан іштей болса да қайғы тарқамағаны кәдік. Өсе келе Тоқтар туған жерінен сая таппай орыс жерін паналап, оқу іздеп, талпынып, мәртебесі өсіп, Батыр атанғанымен де, Қарқаралысын аңсаған Мәди бабасындай, өз еліне жеткенше асық болды. Мұратына жетті. Қоныс аударды. Тоқтар қазір әр қазақтың жалғызы да төресі!
Жалғызы деп қалдық. Тұңғыш ғарышкер ұғымын дөп басып берген ықыласымыз ғой. Соңынан ерген Талғат Мұсабаевтай іні-ізбасары бар екен, достығы ұзағынан болсын екі алып қазақтың. Кімнің бірінші, кімнің екінші екендігін тағдыр маңдайларына анық етіп жазған екен. Еш солқылдақтығы жоқ. Мұны айтыс, пікір-талас тақырыбы етіп алып, өнбес дауды өршітудің ешқандай қисыны жоқ секілді.
Рас, біз де редакция алғаш тағдырымызға еншілеген осынау ғарышкерлік тақырыбын аракідік жаңғыртумен келеміз. Көктен түскен Тоқтарды жерде көріп, тілдесуіміз, қандай ән айтқанын сұрауымыз – қай бір тілшінің де кәсіптік мақтанышы болар, бәлкім. Соны жұбаныш етеміз.
… Жеті қат аспан мен жұмыр жерге бірдей сыйлы Тоқтар бауырымыз туралы «Егеменнің» бетінен тұңғыш рет қазақ елінен сүйінші сұраған мақаламды, әлі күнге мақтан етемін! Және де сондай жұлдызды тақырып толассыз толғандырып жүреді екен.
ЛЕОНИД ТЕЛЯТНИКОВ: «Чернобыль атом-электр стансасындағы апатта қазақстандық өрт сөндірушілердің өжеттігін алғашқы айқаста-ақ дәлелдедік!» Бір тақырып болады екен, қалам тербегесін, біраз уақыт жоғалып кетіп, ойламаған жерде қайта табысатын. Соның жайын айтып берейін енді. 1986 жылғы Чернобыль апатында қостанайлық Леонид өрт сөндірушілер жасағын бастап, асқан ерлік көрсеткені үшін кейін Кеңес Одағының Батыры атағына ие болды. Күзге салым Қостанайға келгенде кездестік. Облыстық газеттің тапсырмасымен очерк жаздық. Ол туынды еселеніп, «Чернобыль қаһарманы» деген деректі хикаят болып, 1989 жылы баспадан шықты. Сөйтіп, бұл тақырыбымыз бірте-бірте саябырсыған-тын.
1996 жылғы сәуір басында «Егеменнен» тапсырма алдым. Чернобыль апатының он жылдығына байланысты Телятниковтың қазіргі жағдайымен елді таныстыруым керек екен. Оны Киевтен телефон арқылы іздеп таптым да, «Атом ажал айдаһары ма?» деген мақала (13.06.1996 ж.) бастырдым. Атақты өрт сөндірушінің денсаулығы мәз емес екен. Атом сөзін жиіркенішпен құсаланып, демігіп айтады. Он жыл бұрын көргенімде шашы жидіп түсіп, құйқасы тақырланып қалғаны көз алдыма келе қалды… Атомға лағнет!
Лағнет дейміз ғой. Қажеттілігі ескеріліп, елімізде де атом стансасын салуға ұмтылыс болып жатқанынан хабардармыз. Түбі не болады?
Мүлтіксіз істеп тұрған Чернобыльдікі де бір мезетте әлемді әбігерге салды емес пе? Зардабы әлі запыран жұтқызуда. Мыңдаған қазақстандық апатты аластауға қатысып, радиацияға уланды. Дені осы жегіқұрттан көз жұмды. Тірі жүргендерінің халі мүшкіл. Пәтер, қаржылай көмек, дәрі-дәрмектік демеу жағы тапшы. Емдеу-сауықтыруға да зәру. Зейнетақысы да мардымсыз.
Чернобыльдіктердің қабағындағы осындай кірбіңді көргенде редакция тауып берген бұл тақырыпты ұдайы індетіп жазғың келіп кетеді. Жүрекке күш түссе де, қалам деген қара өгізің мойынын ағаш қамытқа қаймықпай тоса береді.
… Кейбір тақырыптың сананы қырғышпен қырғандай етіп, сай-сүйегіңді сырқырататыны бар екен. Жорналшы жаны қандай қиындыққа да көнген ғой. Осындай артықшылығына оның өзінше қопаңдап қоятынын қайтерсің?! Қызық!
МІРЖАҚЫП ДУЛАТОВ: «Жаза гөр топырақты елден Алла!» Тақырып деуге келер ме екен? Бұл миссияны орындауға тиісті арнаулы экспедицияға қатысуды торғайлық тілшісіне «Егемен» Алматыдан нұсқау берді. Қатыстық. Еңку-еңку жер шалдық. 1992 жылғы 1-18 қыркүйек аралығында Карелиядан М.Дулатовтың мүрдесі еліне жеткізіліп, жер қойнына қайта табыс етілді. Жангелдин ауданының Бидайық кеңшарында кесенесі тұрғызылып, мұражайы ашылды.
Газетім ұсынған бұл киелі тақырыпқа әлі нүкте қойылмай келеді. Гүлнәр Міржақыпқызын қатыстыра отырып, біраз рухани мәселелер шешімін табуда. Апай екі томдық кітап шығарды, кейін «Алаштың сөнбес жұлдыздары» естеліктер жинағының тұсауын 95 жасқа толғанда кесті. Бәрінде де әкесіне қатысты сөз өрбиді. Біз де кітап бастырдық. Нар қайысып көтеретін тақырып болған соң, уақыт өткен сайын өзге де қаламгерлерге салмақ бөлініп түсуде. Бәрінің де Міржақып алдындағы парыз бен міндетке адалдық тұрғысынан қарайтыны қуантады.
Міржақыптың қайыра жерленуіне күдікпен қарап, ол өткен ғасырдың алпысыншы жылдары Моңғолияда қайтыс болды деп, еш қисынсыз байбалам салушыларға негізді тосқауыл қойылғанын айтқанымыз абзал. Мақала авторы кешірім сұрап тынғанымен, оның кейбір тәуелсіз телеарналарда өзгеше сайрайтынын байқап қалып та жүрміз. Бұл не сонда? Беталды пікір айтуға бола ма екен? Сондай бейпіл ауыздарға соққы беру – тақырыптың жалғасына жатпағанда қайтеді? Бұл бір жағынан ұлттық мүддені қызғыштай қорудың төте жолы іспетті ғой.
Қазір Бидайық ауылының халі онша емес. Отыз шақты отбасы қалды. Былтырғы оқу жылында оқушы саны мүлде аздықтан мектепті жабу мәселесі күн тәртібіне қойылды. Небары – 19 баланың 9 сыныпқа қалай бөлінерін ойлай беріңіз. Ешкімге өкпе жоқ еді. Билік мектепті қалдырды. Қалдырмағанда, ауыл ыдырап кетер еді. Сонда жұртта состиып Міржақып кесенесі мен мұражайы қалар еді. Түбі солай болатын шығар? Кезінде алаш арысының мүрдесін кіндік қаны тамған жері Қызбелге немесе аудан орталығы Торғай селосына табыстау жөнінде айтылып, жазылған. Санаспағандықтың кесірі. Ендігі нәтижесі жан күйзелтеді.
Кесененің бір мүйісі қақ айырылып, құлағалы тұрғанын қостанайлық әртістер «Міржақып» спектаклін облыс күндеріне орайластырып Астанада сәтті қойған тұста жабығыңқы күймен айтып келді. Міржақыптың басына әдейі барып мінәжат еткен ғой. Мұражайы да мәз емес екен, жәдігерлері жырым-жырым, бүлінген. Қыста аяз қарыған нәрсе оңушы ма еді. Кім көмек қолын ұсынар екен?
Әлгі аты дардай қойылыммен әртістер Жангелдин, Амангелді аудандарында өнер көрсетіпті. Сонда кейбір әкім-қаралардың оны тамашалауға құлқы болмаған көрінеді. Бұл селқостық нені аңғартады. Түсіну қиын.
Алажаздай Міржақыптың туған ауылы Қызбел халқы Қоңыраулы өзенінен алдымен құрттаған, кейін қызыл іріңді су ішіп отырды. Бұл тұрғысында «Егеменнің» әлденеше рет қаққан дабылына аудан, облыс билігі қыңқ демеді. Мұндай енжарлыққа жол болсын.
Бір нәрсеге көзіміз жеткендей. Міржақыпқа қатысты тақырып уақыт керуеніне ұласып, жалғаса беретін секілді. Өйткені, оянуымыз бен ойлануымыз қабыспай жатқандай-ау! Осы екі ортада безек қағып, тілші жүрмегенде қайтеді? Намыс жыртуға жаралған жорналшының басқа амалы жоқ қой.
СЫРБАЙ МӘУЛЕНОВ: «Мен де өзіңдей меншікті тілші кезімде редакцияға хат жөнелтемін деп жүріп, қасқырға жем бола жаздағанмын». Сырағаңмен де жете таныстырған «Егеменім» еді. Торғайда тілші болмасам, күндей күркіреген адуынды да, жан иірімін саф самалымен жаңғыртатын сыршыл да, табиғатшыл ақынның маңайына етене жақындаса алар ма едім, бәлкім. 1992 жылдың шілде айында Сырағаң 70 жасын тойлауға Торғайға келді. Арқалықтан қарсы алып, елді аралаттық. Сонда біте қайнасып кеткендей болдық. Әрине, тілшілік тапсырмам да бұлтиып бүйрегімде жүреді. Мерейтойдың мейірімді шақтарын әуелгіде хабар-ошармен, кейін мол пішіммен оқырмандарымызға жеткізгенбіз.
Сырағаңның маңайына жұғысу қиын ба десем, таяз ойлаппын ғой. Көңіл райы түссе, нағыз ежіл-қожылдың адамы екен. Жүрегі елжіреп, ботасын аймалаған аруанадай жанарынан шуақ төгіліп, бауырына басып, жалпақ алақанымен жауырыныңнан қағып-қағып қояды. Бұл ықыласына мәз болып, баласындай еркелегің келіп кетеді. Өзі де еркелеткісі келіп отыр екен: «Білесің бе, мен сенімен газеттеспін ғой», – деп еркін әңгімеге шақырды. Білмей ше? Қостанайдың «Большевиктік жол» (қазіргі «Қостанай таңы») газетінде меншікті тілші, кейін редактордың орынбасары болған. Жымиып, басымды изеймін.
«Қайран, тілшілік өмір! – деп алып, Сырағаң сағымды жылдарынан сыр суыртпақтай жөнелді. – Жаяулап-жалпылап сапарларға шығушы едік. Бір жолы Федоров ауданын қыстың көзі қырауда ат-шанамен аралап, апталап боранмен алысқанмын. Сөйте жүріп қаншама қойын дәптерлер толтырылды. Қызық өзі, қауіп-қатерді сезінбейсің. Көрсем, білсем дейсің. Жазсам дейсің. Қаламсабым – автоматтан бетер айбарлы секілді. Пәле-жала үркіп тұратындай. Бір жолы редакцияға қалай да материалды үлгертемін деп, стансаға жаяу борасында тартып кетейін. Әудем жер. Бұталы, тобылғылы, сай-жыралы еңіс еді. Анадайдан сұр көкжалдың сұлбасы қылаң ете қалды. Біткен жерім осы шығар дегем. Қапталдасқан қасқырыңның өзі қағынып, жоламай қойсын қасыма… Қаламсаптың киесі болатынына сол жолы көзім анық жеткен. Қалтамдағы «қаруымды» жалма-жан разыланып, қысып-қысып қойдым».
Осы, міне, Сырағаңның тілшіліктен бір қызық сыры.
Кейін, наурыздың түтеген май боранында өзім де далада қалдым. Қарыс жердегі жылқышы ауылына жете алмай, діңкеледік. Жентектеле соққан қардан көлігіміз белуардан енді қайтып босамайтындай, батты. Түн көзге түрткісіз. Шарасыздан жаяулап тарттық. Адамның бойы суынса, ойы да суынады екен. Ғайыптан Сырағаңның қасқырмен аңдысқан сәті зу етіп миыма шапшып шықпасын ба? Құдай-ау, сол қасқыр ғой мынау! Бауырлай жылжып, жүргізушіні тарпа бас салатындай. Ту сыртындағы мен байқап қалдым. Серігім оппа қармен ауыр адымдайды. Сақ етіп ауыз салар-ау деген андағай сәтте қол фонарымды жағып кеп жіберейін. Солаң етіп сұмпайылынған бірдеңе арда тайыншадай жонынан көз тайдырып, қағыс кетті…
Нені ойласаң, сол келеді деген осы. Сырағаңның сонау жылғы қасқырмен бетпе-бет келген әңгімесі санамның бір түпкірінде түлен түрткендей сергек жатушы еді. Сол ғапылдан оянып кетсе керек. Қасқырға әкеп мені де жолықтырыпты. Аман қалдық. Қасқырды қаламсаптың киесінен үріккен ғой деп, топшылаймыз.
Тақырыпқа барар жолдың кейде осылай тым ауырлап кететіні бар. Жылқышының үйіне ілдалдалап жеткенбіз. Үйде 10-12 жас шамасындағы жалғыз бала. Әкесі жылқы соңынан ығып кетіпті. Шешесі қалаға бір бастыққа тай сойып әкетіпті. Ысытқан құрт көжені сораптап отырып, әңгіме соғайық. Әке – депутат. Үйде сирек қонады. Жылқыны негізінен көмекшілері қайырып, бағады. Жиі-жиі жиналысқа шапқылайды. Кейде алыс сапарлардан ұзақ жүріп оралады. Шешесінде де таусылмайтын шексіз жұмыс. Әлдекімге қазы-қарта тасудан жалықпайды. Қысқасы, қолдары ұзын. Тікұшақпен бұл үйге не қажеттің бәрін төгіп тастайды екен. Азық-түлігің бе, дүние-мүлкің бе, талғамай жарылқайды. Үлкен қалаларда үйлері көп екен. Аға-апалары көбіне шетелге қыдырады. Әрқайсысында қос-қостан керемет көлік. Өзінің оқуын сұрасақ, мұғалім жалдап беріпті.
Баланың әңгімесін бас шайқап отырып тыңдадық.
Жазылмай қалатын тақырып та болады екен. Қалам жүрмей қойды. Бірдеңеден секемденіп, сескендік білем… Мүмкін, әке-шешесімен тілдеспегендіктен жазуды қолдай көрмеген шығармыз. Әйтеуір, тартпай қойды. Жазамыз деп барып, жазбай тастадық…
ӘЗІЛХАН НҰРШАЙЫҚОВ: «Егеменнің» 90 жылдығы тойының өзінен таусылмайтын талай тақырып суыртпақтауға болады». 2009 жылғы 23-25 желтоқсан аралығында Астанада «Егемен Қазақстан» газетінің 90 жылдық тойы өтті. Газет басшылығы тойға жан-жақтан келетін әр тұлғаға дербес адам бекітіп қойды. Менің «меншігімде» – Әзілхан Нұршайықов! Ал кеп кірісейін міндетіме.
Алдымен әуежайдан күтіп алдым. Әзағам қолында дипломаты бар, домаланып қасындағы бойшаң бір жігіттің қолтығына тығылып, жолаушылардың басы боп көрінгенімен, жүк алатын жерде тосылып қалды. Кітаптарынсыз жүрмейтін, соны алмағын шамаладым. Көп күттірген жоқ. Тағы бір кісі қолдасып қомақты қапшықты қампайтып алып келді. Зілдей. «2-3 кітабымның әрқайсысынан 90 данадан әкеліп едім. 90 жылдыққа шашуым ғой», деп Әзағаң байғазысыз жүрмейтін әдетінің мәнісін түсіндіріп жатыр.
Қонағымды «Данияр» мейманханасына түсірдім. Одан әрі той іс-шараларының аясындағы бағдарламаларға бағына қимылдадық. Опера театрындағы салтанатты кеште Әзағаң жазғанын көсілтіп оқып берді. Маңайында өңкей газет ардагерлері тұрған-тын. «Егеменмен» түйдей құрдас Саламат Хайдаров атамыз, тағы басқалар төл газетінің сарғайған парақтарындай шиырылған шежірені тарқата түсті. Өнеге. Өріс. Өскен өркен. Тағылым. Тоқтаңыз – Тақырып!
Залда, Әзағаңмен иықтаса отырып, ол кісінің кеше: «Газет тойының өзі тың тақырыптар ұсынады. Бейқам болма, айналайын. Жадыңа тұта біл, есті сөздерді», деген ақылын санамда қайыра жаңғырттым. Әркімнің жүрекпен айтқандарына ықыластана түсем. Шынында да, газет жүріп өткен сан қилы соқпақтар түгесілмейтін мақала тақырыптары секілді емес пе. Тек, көркемдік сүзгісінен өткізіп, жан бітіре біл. Енді байқадым, залдан шығарда, қойын дәптеріме біраз жазу түрткенімді.
Салтанат сарайындағы мерекелік дастарқан талғамды рухани нәрімен есте қалды. Сөйленген сөзден ғибрат мол болды… Мұхтар, Ғабит, Сәбиттер ағындап тілек қосқандай төгілтеді. Шырқалған әннен кешегі ғажап дауыстар естілгендей еді… Әміредей жезтаңдайлар көмей бүлкілдеткендей ғой. Биден ше? Мың бұралған қимыл құбылысынан – Шаралар тіріліп түскендей. Күй-аңыз бабалар үніндей бебеулейді… Дина анамыздың күйіне Жамбыл атамыз құлақ тосыпты, әне… Қайран тіршілік: бәрі-бәрі болған, жым-жылас озған… Осыларды кезінде газет насихаттаған, әлі де жалықпайды ол парызынан. Өткен дәуір бүгінге жалғасып жатыр ғой. Демек, тақырыпта толас жоқ, тек ебін тауып, өзге қырынан жарқырата білген жөн. Әзағаң біліп айтады екен ғой.
Әзағаңды талай кейіпкерлері қонақ етпек боп, қолдарына түсіре алмады. Соның бірі біздің әріптесіміз Гүлзира. Оның өкінішін бумалы 90 кітаптың бірімен бастық. Әйтеуір, өзгелердің де жабыңқы қабағын кітап жадыратып жібереді. Ал Оразбек Аймақұлы ақсақалдың шақыруын амалсыздан қабыл алды. «Оразбек бәйбішесі Ай-апа қажы екеуі Халиманың басына тәу етіп, дұға оқып, кейін сюжетті бейнетаспа түсіріп, зор ілтипат көрсетіп еді, дәм татып шығайық», деп ықылас танытқан. Әзағаң қажылар шаңырағынан аса көңілденіп, марқайып аттанған болатын. «Міне, тақырып қаншама: келіні ән айтады, немересі тақпақтайды, балалары зәулім үй салыпты, қос бәйтерек сөзімен үлгі екен», деп халық жазушысы тілші пақырыңызға көп нәрсені меңзеген.
Ара-арасында Астананы аралатып қоямын. Қуанып, дедектей жөнеледі. Қолынан фототүсіргішін тастамайды. Есіл мұзына аяғын жеңіл сырғытып тұрып, Ертісті, Жайықты, т.б. өзендерді еске алды. Абай, Жамбыл, Бауыржан, Әлия ескерткіштеріне тағзым етіп: «Шіркін-ай, менің Мәншүгіммен қатар тұрар ма еді. Шығыстың қос жұлдызын ажыратуға болмайды ғой», деп әлденеге реніш білдірді. Өкінішінің өзінен тақырыптар қоздап жатқандай. Рас-ау!
Әзағаңды қайда апарсам да – алдымда тақырып өріп жүретіндей елес пайда болды бойымда. Бастапқы бір сөзінің қуаты қандай! Шынында да «Егемен» тойы – тақырып тауып беріп, байыта түсетін тұма бұлақ көзіндей екеніне көзім жетті.
Әзағаңды қолтықтап жүріп, тақырып атаулыдан жем жегендей күй кешкенімді енді сезіп отырмын. Әзағаңның өзі де – тақырып тылсымы екен!
ҚАЛАМЫМ ЖАЗЫПТЫ. Иә, тақырып сайлы болса – қалам майлы болады екен. Тапқаныңды қызғыштай қорып, оқырман кәдесіне жаратудың өзі, ғанибет қой. Тақырыптың да талан, талайы бар: біреуге жағарсың, енді біріне жақпассың. Іліп жазғанды кім жақтырады. Ерін бауырына алып тулайтындары да кездеседі. Мақаладан өз бейнесін көріп, іші сезген соң сөйтеді де. Бола берсін. Тілші шындық жағында. Солай қалыптасқан. Ешкімнің көңіліне қарамайды. Тез қасында қисық ағаш жатпайды. Тәуелсіздікке қалтқысыз қызметтің алтын тіні осы болса керек.
Тақырып таяз болса, жазғаның жасық шығады екен. Терең тақырып теңіздей тулайды. Уақытпен жарыса зулайды. Таңдауымыз түңілтпесін. Тамыр бүлкіліндегі тақырыптарда толас болмасын. Жазар көбейсін!
Қайсар ӘЛІМ.