Алғыс

Сенбі, 1 желтоқсан 2012 6:41

Чешенстандағы Қазақстан Президенті салдырған үй екі елдің достық қарым-қатынасына, ынтымақ, бірлігіне қызмет етуде

Жуырда редакцияға Халықтық және рухани емшілер мекемесінің басшысы, Денсаулық сақтау министрлігі аккредитация орталығының директоры, Қазақстан Республикасындағы Шанхай Ынтымақтастық Ұйымының (ШЫҰ) Дәстүрлі медицина академиясы Қазақ бөлімшесінің төрағасы, медицина ғылымдарының кандидаты Шәкен ШЫҢТАЕВ телефон шалды.

Сенбі, 1 желтоқсан 2012 6:41

Чешенстандағы Қазақстан Президенті салдырған үй екі елдің достық қарым-қатынасына, ынтымақ, бірлігіне қызмет етуде

Жуырда редакцияға Халықтық және рухани емшілер мекемесінің басшысы, Денсаулық сақтау министрлігі аккредитация орталығының директоры, Қазақстан Республикасындағы Шанхай Ынтымақтастық Ұйымының (ШЫҰ) Дәстүрлі медицина академиясы Қазақ бөлімшесінің төрағасы, медицина ғылымдарының кандидаты Шәкен ШЫҢТАЕВ телефон шалды. Ол кісі Чешенстанның денсаулық сақтау министрі Шахид Ахмадовтың шақыруымен Грозный қаласында болған екен. Онда «Сал ауруына шалдыққан балаларды кешенді емдеудің мәселелері» атты тақырыпта өткен халықаралық симпозиумға қатысып қайтыпты. Әңгіме иесі сондағы қаланың көрнекті жерлерін аралай келе чешен халқы үшін Қазақстан Президенті салған үйдің қабырғасында Елбасы Нұрсұлтан Назарбаевтың суретін көргенде мақтаныш сезімі кернеп, масаттанғанын айтып, жағымды жаңалықты жеткізген еді. Біз де мұндай елдік тұрғысындағы қуанышты жайтпен оқырмандарды құлағдар ету мақсатында Шәкен ағаға жолығып, әңгімені әрі қарай қаузай түстік.

– Шәкен Мұқанұлы! Чешен­станға бұған дейін жолыңыз түсіп пе еді?

– Жоқ, тау халқының топы­рағына алғаш рет қадам басуым. Қонақжайлығын айтпаңыз, бізді сонау Мәскеуден қарсы алды. Чешенстанның астанасы Грозный қаласына келген соң 32 қабатты бес жұлдызды қонақ үйге орналастырды. Құдды екін­ші Вашингтонды көргендей болдым. Көше­лері түзу, бес-алты қабатты үйлер көп салыныпты, ал бизнес орта­лықтары керемет ғимараттарға орналасқан.

Симпозиум Чешенстан мем­лекеттік университетінің мәжіліс залында өтетіндіктен қонақүйдегі делегаттарды аталмыш оқу ор­нының медицина факульте­тінің кафедра меңгерушісі, профессор Тахауз Ахмадов бастап апаратын болды. Қаланың көрікті жерлерін аралатып, орталық кө­шенің бо­йын­дағы бір үйге жа­қындағанда жолбасшы автобус­та­ғы отырған делегаттардың сырт­қа шығуын өтінді. Шықтық. Бес қабатты үй­дің қабырғасында Қа­зақстан Рес­пуб­ликасының Пре­зиденті Нұр­сұл­тан Назарбаев­тың, Ресей Фе­де­ра­ция­сы­ның Пре­зиденті Владимир Путин және Чешенстан Рес­публика­сының бұрынғы Прези­ден­­ті Ахмад Қадыровтың пор­трет­тері қатар ілінген екен. Со­ның арасында Тахауз Ахмадов дауыстап: «Құрметті делегаттар! Мы­на бес қабатты тұрғын үйді 2004 жылы Грозный қаласын қайта қалпына келтіруде Қазақ­стан Президенті Нұрсұлтан Назарбаев қолұшын беріп салдырып, халқымызға сыйлаған еді. Бауырлас қазақ елі­нің қиын-қыс­тау кездегі бұл көмегін чешен халқы еш уақытта ұмытпайды. Біздің ортамызда сол қазақ жері­нен келген Шәкен Мұқанұлы деген азамат бар», деп мені нұсқа­ғанда қуа­ныштан тө­бем көкке жеткендей болды. Бес қабатты үйдің қабыр­ға­сын­да ілін­ген Елба­сымыздың жарқырап тұрған үл­кен суретін көріп, жанарыма қуа­ныш жасы үйірілді. Әрине, бұл сәтті тілмен жеткізу мүмкін емес, оны тек әркім өз басынан өткізіп, сезінуі керек. Сол сәтте қазақ болып туғаныма бір қуансам, қазақ хал­қының маңда­йына біткен осын­дай Президен­тіміздің болға­нына жүре­гім жарыла шаттандым. Құдды сол үйді мен салдыр­ғандай делегаттар ара­сында мәр­те­бем өсіп, марқай­ғанымды айтпаңыз.

Автобусқа жайғасқан соң Тахауз Ахмадов әңгімені әрі қарай жалғады. «Сіздерге тағы бір айта­йы­н дегенім, Чешенстандағы зиялы қауымның көпшілігі Қа­зақ­станда туып, Чешенстанда қызмет жасап жүргендер, не болмаса Чешенстанда туып, Қазақ­станда білім алған­дар. Соның біреуі – мына менмін. Кезінде солақай саясаттың құр­баны болған біздің отбасы қазақ­тардан пана тапқан. Соғыс жылдары өздері жетісіп отырмаса да қолындағы барымен бөлісіп, бізді аман алып қалды. Семейде тудым, сонда оқып, ержеттім. Енді еліме келіп, қызмет жасап жатырмын. Мен сияқты тағдырын Қа­зақ­станмен байланыс­тырған азаматтар өте көп. Олар өздерінің екі Отаны бар деп есеп­тейді. Сол үшін де қазақ халқына қарыз­дармыз. Нұрсұлтан Назар­баев­қа ықыласы­мыз өте зор. Өйткені, кешегі күні ел басына күн туған шақта да біздің қарапайым хал­қымызға бес қабатты тұрғын үй салып беру қазақ халқына деген құрметімізді одан әрі еселеп арттырды. Сон­дық­тан да, чешен халқы сол жақсылықтарды ұмыт­пау мақ­са­тында төріне Қазақстан Прези­ден­тінің суретін іліп қоюы­ның сыры осындай», деді. Бұл тұрғын үй Грозный қаласын­дағы үлкен Ор­талық мешіттің қарама-қарсысына салынған екен. Ме­шіт­тері керемет, барлық мұ­на­ра­лары сұйық алтынмен жала­тылған.

– Симпозиум қалай өтті?

– Өте жоғары деңгейде. Жалпы жиынның мақсаты – соңғы жылдары көбейіп отырған туа біткен және жүре пайда болған балалардағы церебральды сал ауруының (ДЦП) алдын алу. Чехия, Словения, Германия, Рига және ТМД елдерінің құрамын­дағы барлық мемлекет түгелімен келіп, Чешенстанда бас қосуы­ның түпкі себебі – елдегі ұзаққа созыл­ған соғыстан еңсе көтерме­ген елдің денсаулығын түзетуге атсалысу. Жиын барысында бел­гілі болғанындай, оларда әсіресе, балалар арасындағы сал, талма, қояншық ауруларының саны артқан. Сәбидің іштен мүгедек болып туылуы, әйел босанған кезде жарақат алуы баланың жүй­ке жүйесінен бастап, омырт­қа, аяқ-қол, тыныс алу мүшеле­рінің бә­ріне әсер етеді. Олардың біздерді осындай халықаралық жиынға шақыр­ғандағы мақсаты – осы күрделі мәселе Қазақстанда жақ­сы жолға қойылғанын, сол жөнінде баяндап, тәжірибе алмасуды діттегені.

Әңгімелескен

Гүлзейнеп СӘДІРҚЫЗЫ,

«Егемен Қазақстан».

АЛМАТЫ.