Еліміздегі тұңғыш достық үйі жиырмадан астам этностың басын қосып, татулық пен достыққа ұйытып отыр
Сәрсенбі, 11 қаңтар 2012 8:32
Шығыс Қазақстан облысы әкімдігі мәдениет басқармасының облыстық Достық үйі коммуналдық мемлекеттік қазыналық кәсіпорны жайлы тұрғындар арасында жақсы пікір қалыптасқан. Аманшылық болса, қанатын кеңге жайған Достық үйі үстіміздегі жылдың қарашасында құрылғанының 20 жылдығын атап өтпек. Облыстық мәдениет басқармасының бастығы, бұл қызметке кіріскеніне көп уақыт болмаса да, шырайлы шығыста мәдениет пен өнердің өркен жаюына үлкен үлес қосып келе жатқан Жақсылық Омар былай деп ағынан жарылады:
Сәрсенбі, 11 қаңтар 2012 8:32
Шығыс Қазақстан облысы әкімдігі мәдениет басқармасының облыстық Достық үйі коммуналдық мемлекеттік қазыналық кәсіпорны жайлы тұрғындар арасында жақсы пікір қалыптасқан. Аманшылық болса, қанатын кеңге жайған Достық үйі үстіміздегі жылдың қарашасында құрылғанының 20 жылдығын атап өтпек. Облыстық мәдениет басқармасының бастығы, бұл қызметке кіріскеніне көп уақыт болмаса да, шырайлы шығыста мәдениет пен өнердің өркен жаюына үлкен үлес қосып келе жатқан Жақсылық Омар былай деп ағынан жарылады:
– Қазақ жері кең байтақ, көңілі дарқан, талай тар жол, тайғақ кешулерде тығырықтан шығып қана қоймай, небір қилы заманда шеттен келген басқа ұлт өкілдерін жатсынбай қарсы алып, бауырына басты, төрін беріп, бір жапырақ нанын бөліп жеді. 1995 жылы түрлі ұлт өкілдерінің басын қосып, татулық пен бейбітшіліктің елімізде салтанат құруын мақсат тұтқан Елбасы Н.Назарбаев Қазақстан халқы Ассамблеясын құру жөнінде бастама көтеріп, ол жүзеге асты. Өскемендегі Достық үйі 1992 жылы құрылды. 1995 жылы Шығыс Қазақстан халқы Ассамблеясының облыстық Достық үйі облыс әкімі өкімі негізінде құрылып, заңды тұлға деп танылды. Достық үйінің салтанатты ашылуына Елбасы Н.Назарбаев арнайы келіп қатысып, ақжарма тілегін айтты, шырайлы шығыстан бастау алған құнды тәжірибені еліміздің барлық облыстарының қолдауы қажет екеніне тоқталды. Сонымен, Кенді Алтайдың тәжірибесін Қазақстан Республикасының Президенті Әкімшілігі зерттеп, барлық өңірге таратты. Облыс әкімі Бердібек Сапарбаев Достық үйіне үнемі қамқорлық жасап тұрады, еліміздегі тұңғыш құрылған этноауылдың авторы да өңір басшысы.
Қаланың көрікті жерінен орын алған Достық үйіне келдік. Екі қабатты, ежелгі архитектурамен көз тартатындай етіп әдемі салынған мекемені Эльдар Төлеубеков басқарады. Этномәдени бірлестіктердің көркемдік жетекшісі – Оксана Доценко. Әдіскерлік бөлімнің меңгерушісі Айбарша Жұмаділова атқарылып жатқан жұмыстармен таныстырды. Достық үйінің қызметкерлері өз міндеттері мен істерін ұқыптылықпен атқарып жатқаны байқалады.
– Кеңес өкіметі кезіндегі бір тілді, бір дінді боламыз деген солақай идеология салдарынан қаншама ұлт өкілі өз тілінен, мәдениетінен ажырап қала жаздады, оның ішінде қазақтар да бар. Ал тәуелсіз Қазақстан әр этностың баласы өз ана тілін, салт-дәстүрін, мәдениетін, тарихын ұмытпасын деген мақсатты алға қойып, республика бойынша біртіндеп достық үйлері ашыла бастады. Бүгінгі таңда өзіміздің Шығыс Қазақстан облысында 8 Достық үйі бар, онда 82 этномәдени бірлестік жұмыс жасап жатыр, – деп Айбарша Жұмаділова біраз жайдан хабардар етті.
Облыстық Достық үйінің мақсаты – ұлтаралық келісім мен тұрақтылықты нығайту, ұлттар мәдениетін, ана тілін, салт-дәстүрін жаңғырту, мәдени мұраны сақтау және Қазақстан жастарын патриоттық сезімге тәрбиелеу болып табылады.
Шығыс Қазақстан облысы аумағындағы тарихи-мәдени мұраны зерттеп, қалпына келтіреді, осында тұратын этностар туралы тарихи-библиографиялық материалдар басып шығарады. Халық шығармашылығын, этномәдени салт-дәстүрлерді және әдет-ғұрыптарды насихаттап, сақтайды. Оларды әлеуметтік-экономикалық және қазіргі тарихи жағдайға бейімдеу де басты назарда. Бұған қоса қызмет істейтін этномәдени бірлестіктерге ана тілін оқыту жұмыстарын ұйымдастыруға, ұлттық музыкалық, көркем шығармашылық, қолданбалы өнер ұжымдары қызметіне тәжірибелік көмек көрсетеді, олардың қызметі үшін қажетті жағдай жасайды және этномәдени қоғамдық бірлестіктерге әдістемелік, ұйымдастырушылық және құқықтық көмек көрсетеді.
Қазіргі таңда Достық үйінде 12 этномәдени бірлестік және 9 қоғамдық бірлестік, Шығыс Қазақстан облыстық Қазақстан халқы Ассамблеясының жастар қанаты мен ғылыми-сараптамалық кеңесі жұмыс істеуде. 2010 жылы «Алтын арқау» және оралман жастардан құралған «Бірлік» қоғамдық бірлестіктері құрылды. Бүгінде этномәдени бірлестіктер облыста өтетін көптеген қоғамдық маңызды және мәдени шаралардың ұйытқысы болып отыр. Сонымен бірге, этномәдени бірлестіктердің жанынан құрылған 20 шығармашылық ұжым бар, оның 8-і «Халық ұжымы» және бір ұжым «Үлгілі» атағына ие. Олар Достық үйіндегі және облысымыздағы мәдени шараларға белсене қатысады.
Достық үйі жұмысының ауқымы жыл сайын кеңейе түсуде, мұнда әртүрлі тақырыпта ғылыми-тәжірибелік конференциялар, семинарлар, байқаулар, кездесулер, фестивальдер, атап айтсақ, «Орыс өнері», «Казачье сторонушка», «Жыраулар» фестивальдері дәстүрлі өткізілуде, былтыр алғаш рет «Күмбірле, домбыра, ойна, сырнай» фестивалі өтті. Жақында ғана облыстық Қазақстан халқы Ассамблеясының XVI сессиясы өтсе, жуырда «Халықаралық келісім және толлеранттылық – тұрақтылық негізі» атты халықаралық симпозиум ұйымдастырылды. Сонымен қатар, халық мерекелері: «Наурыз», «Масленица», «Ханука», «Рош-а-на», «Сабантуй», «Астық мерекесі», діни мерекелер – «Құрбан айт», «Рождество», «Пасха», «Вардавар» және мемлекеттік мерекелер жыл сайын Достық үйінде тойланады.
Этномәдени бірлестіктер тарихи отандарымен де байланыс жасап тұрады. Достық үйінде поляк, беларусь, армян мемлекеттерінің елшілері өз диаспораларымен кездесіп, Достық үйінің өмірімен танысып қайтты. Достық үйі жылдық жоспар бойынша және жоспардан тыс 70-тен аса үлкенді-кішілі іс-шаралар өткізіпті. Достық үйінде ай сайын «Отанға деген сүйіспеншілік пен ұлтжандылықты, азаматтықты тәрбиелеу» деген тақырыптарда жоғары оқу орындарының аға оқытушылары дәріс оқиды. Достық үйі құрылған 19 жылдан астам уақыт ішінде жақсы дәстүрлер қалыптасып, жұмыс ауқымы кеңейе түсті. Достық үйінің атқарып жатқан жұмыстары жайлы ай сайын шығарылатын мекеменің жеке басылымы – «Ассамблея жаршысы» газетінде кеңінен жарияланады. Достық үйі қызметкерлері облыста тұратын этностар жайлы тарихи-библиографиялық материалдар басып шығарып келсе, осы уақытқа дейін Шығыс Қазақстандағы беларусьтар, орыстар, поляктар, еврейлер, татарлар, туралы кітаптар жарық көрді. Өткізіліп жатқан ғылыми-практикалық конференциялардың материалдары да жинақ болып немесе әдістемелік құралдар ретінде басылды.
Өткен жылдың жаз айларында облыстық Достық үйінің этномәдени бірлестіктері этноауылда мәдени күндерін өткізді. Этноауылға келген қала халқы мен қонақтары Шығыс Қазақстан жерінде тұратын этностардың салт-дәстүрімен және ән-жырымен кеңінен танысты. Осы атқарылған жұмыстарды қорытындылай келе «Бір шаңырақ астында» атты журнал жарыққа шығып, Достық үйінде тұсаукесері өткізілді.
Елбасы Н.Ә.Назарбаев 2010 жылы өткен Қазақстан халқы Ассамблеясының XVI сессиясында сөйлеген сөзінде: «Осыдан 15 жыл бұрын іргесі қаланған Ассамблея өркениетті әлемге өзінің өміршеңдігін дәлелдеп берді. Қоғамдық келісімнің кепілі болған Ассамблея еліміздегі тұтастықтың тұтқасына, бірліктің діңгегіне, достықтың дәнекеріне айналды. Еліміздегі татулық пен тұрақтылықтың берекелі бекетіне айналуына Қазақстан халқы Ассамблеясы үлкен үлес қосып келеді», деген болатын.
Қазақстан халқы Ассамблеясының XVI сессиясында қойылған жаңа міндеттерді облыстық Достық үйі жүзеге асыру бойынша жұмыс атқаруда. Осыдан 20 жыл бұрын алғаш рет Достық үйі Шығыс Қазақстан облысының Өскемен қаласында ашылса, 2010 жылы Қазақстан бойынша алғаш рет этноауыл Өскемен қаласында бой көтерді. 19 үй әр халықтың тұрмыстық дәстүрі бойынша жабдықталған.
Сөз реті келгенде айта кету керек, былтыр «Шығыс Қазақстан мұсылман әйелдер» қоғамдық бірлестігіне де 20 жыл толды. Оны «Өскемен қаласының құрметті азаматы» Г. Етекбаева іскерлікпен басқаруда. «Алтын арқау» қоғамдық бірлестігін Сағынбек Ақанов басқарады. Ал ақсақалдар алқасы жанынан құрылған «Ата мұра» ансамблі ел Тәуелсіздігінің 20 жылдығына арнап 20 концерт берді. Оны жақында ғана «Құрмет» орденімен марапатталған Фрунзе Жақсылықов басқарады.
Адам жанын ізгілікке бөлейтін, әр ұлт өкілдерін татулық пен бейбітшілікке үндейтін Достық үйіндегі өнеге тұтарлық істер алдағы уақытта да көңілдерге шуақ құя бермек.
Оңдасын ЕЛУБАЙ.
Өскемен.