Дені сау ұлттың ғана келешегі кемел
Сейсенбі, 14 ақпан 2012 7:43
Батыс Қазақстан облыстық денсаулық сақтау басқармасының бастығы Хамидолла Ирменовпен әңгіме
Елбасының биылғы Жолдауында денсаулық сақтау жүйесін одан әрі дамыту жөніндегі міндеттер өткір қойылғаны мәлім. Әрі осынау өміршең Жолдау жолдары «Саламатты Қазақстан-2015» мемлекеттік бағдарламасымен өзара сабақтасып, ұштасып, үндесіп жатқанын көреміз. Жолдауда денсаулық сақтау жүйесіне қатысты айтылған мәселелер аталмыш бағдарламаны нақты іске асырудың таптырмас тетігі іспеттес десе де болады. Ақжайық өңіріндегі денсаулық сақтау ведомствосы басшысымен болған әңгіме осындай Елбасы Жолдауынан туындайтын жүйедегі жаңаша өзгерістер төңірегінде өрбіді.
Сейсенбі, 14 ақпан 2012 7:43
Батыс Қазақстан облыстық денсаулық сақтау басқармасының бастығы Хамидолла Ирменовпен әңгіме
Елбасының биылғы Жолдауында денсаулық сақтау жүйесін одан әрі дамыту жөніндегі міндеттер өткір қойылғаны мәлім. Әрі осынау өміршең Жолдау жолдары «Саламатты Қазақстан-2015» мемлекеттік бағдарламасымен өзара сабақтасып, ұштасып, үндесіп жатқанын көреміз. Жолдауда денсаулық сақтау жүйесіне қатысты айтылған мәселелер аталмыш бағдарламаны нақты іске асырудың таптырмас тетігі іспеттес десе де болады. Ақжайық өңіріндегі денсаулық сақтау ведомствосы басшысымен болған әңгіме осындай Елбасы Жолдауынан туындайтын жүйедегі жаңаша өзгерістер төңірегінде өрбіді.
– Хамидолла Мутиғоллаұлы, Елбасы Жолдауында медициналық қызмет көрсетудің қолжетімділігі мен сапасын арттыру – адами әлеует деңгейін көтерудің маңызды бағыты ретінде қарастырылған. Осы мәселеге қатысты ой-пікіріңіз қандай?
– Қолжетімділік дегенімізді қарапайым, әл-ауқаты орташа, тіпті одан да төмен адамдар үшін жасалатын жақсылықтар деп ұққанымыз орынды. Яғни, бұдан былай елдегі денсаулық сақтау жүйесі осы бағытқа қарай икемделе түседі деген сөз. Мұның өзі барша қазақстандық қоғам мүшелері кез келген жағдайда медициналық қызметтің көмегін пайдалана алатынын аңғартады.
Бұған қоса қолжетімділік ұғымы жүйе жұмысын адамдардың талап-тілектері мен ұсыныстарына және уақыттарына сай ыңғайлы да оңтайлы әрі тиімді түрде ұйымдастыра білу қажеттілігін білдіреді. Бұл тұрғыда алғашқы нәтижелер баршылық. Ендігі міндет – Елбасы Жолдауына сай осындай оң іс-шаралар кешенін жан-жақты өрістете түсу болып отыр.
Сонымен бірге медициналық қызметтің сапасы да жыл сайын жоғарылап келе жатқаны анық. Оның басты кепілі Елбасы атап көрсеткендей, елдегі озық емдеу-диагностикалық кешендер, жаңа бағыттар бойынша құрылған орталықтар, көліктік медицина, арнайы пойыздар мен санитарлық авиациялар болып табылады. Бұл жетістіктер ең алдымен денсаулық сақтау жүйесіне бөлінген мол қаражаттың арқасы екені кәміл. Оның игілігін республика өңірлері де көріп келеді.
Соның бірі елдің батыстағы қақпасы – Ақжайық өңірі. Мұндағы бүгінгі заманғы медициналық құрал-жабдықтар мен қондырғылар, күрделі жөндеу жүргізілген және жаңадан салынып пайдалануға берілген денсаулық сақтау нысандары сапалы да тиімді емдеу нәтижелеріне жеткізе білді. Сондай-ақ бөлінген қаражаттың белгілі бір бөлігі аурудың алдын алу шараларына жұмсалды.
– Президент өз Жолдауында бала туу өсіп, өмір сүру ұзақтығы ұлғайды деп атап көрсетті. Осы жолдарды алғаш рет теледидардан естіп, көріп, кейіннен газеттен оқығанда тағы бір жалғастық пен сабақтастық іздерін тапқандай әсерде қалдық. Өйткені, Нұрсұлтан Әбішұлы өткен жылдың он алтыншы желтоқсаны күні Астанада Тәуелсіздік сарайында өткізілген салтанатты жиында дәл осы мәселеге орай нақты міндеттер қойғаны ұмытыла қойған жоқ. Атап айтқанда, Мемлекет басшысы демографиялық өсім мен бала тууды ынталандыру жөнінде ой сабақтаған болатын. Әрі оның дәл есептелген параметрлері қажеттігін де атап көрсеткен-ді.
–Дұрыс айтасыз. Бала туу мен оны ынталандыруға қатысты Елбасының Тәуелсіздіктің жиырма жылдығына арналған салтанатты жиында айтқан сөзі мен биылғы Жолдауда қойған міндеттері арасында тығыз байланыс бар. Сол кезде ана мен нәресте өлімін төмендету және бала тууды ынталандырудың дәл есептелген параметрлері қандай болмақ, ол нендей ұғымды білдіреді деген ойда қалған отандастарымыз жетерлік. Тағы бір қосарымыз, тәуелсіздік жиынында Елбасы жас отбасыларды қолдау жөнінде де сөз сабақтаған болатын. Бұл жолғы Жолдауында республика Президентінің осы айтылған мәселені нақты қолға алынатын істермен байытқанын көреміз. Бұл «Қолжетімді баспана-2020» бағдарламасының өмірге келуі, жарты миллионнан астам жас отбасын жеке баспанамен қамту жөнінде белгіленген міндеттер деп білеміз.
Алда атқарылатын осынау ауқымды істер көкжиегі Елбасының 2011 жылдың 16 желтоқсан күні айтқан демографиялық өсім жөніндегі тұжырымдарына да сәйкес келеді. Міне, бала тууды ынталандырудың бір параметрі осындай десек, шындықтан ауытқымайтын шығармыз. Дәл осындай үдерістер мен өзгерістерді қазақстандықтардың өмір сүру жасын ұлғайтуға байланысты да қарастырған жөн. Өйткені, жайлы баспана қашан да әлеуметтің көңіл-күйінің басты барометрі болып қала бермек.
– Елбасы Жолдауынан кейін республикамызда онкологиядан болатын ауру мен өлімді төмендету мәселелері бірінші кезекке шығып отыр. Бұған не дейсіз?
– Онкологиялық дерттердің қай түрін де оның алғашқы сатысында емдеп жазуға әбден болады. Бұған отандық медицинаның күші, мүмкіндігі мен әлеуеті жетеді деп ойлаймын. Әрине, мұның басты жолы – скринингтік тексерулер, яғни ауру ошағын ерте бастан анықтау болып табылады. Біз бүгінгі күні дәл осындай іс-шараларды кеңінен жүргізіп келеміз. Осындай жүйелі атқарылған жұмыстардың нәтижесінде облыста өткен жылы қатерлі ісік ауруларынан болатын өлім-жітім көрсеткіші әр жүз мың тұрғынға шаққанда 138,6-дан 105,1-ге төмендеді.
Өткен жылы облыс орталығында бүгінгі заман талабына жауап бере алатын зәулім онкологиялық орталық ғимараты салынып, пайдалануға берілді. Бұл жоғарыда аталған онкологиялық аурулардың алдын алу шараларын жүйелірек жүргізуге жол ашты. Күдік туғызған аурулардың бестен бірі расында да аса қатерлі дерт екені белгілі болды. Индикаторлар бойынша онкологиялық сипаттағы науқастардың бес жылға дейін өмір сүру көрсеткіші артып келеді.
Орал өңірінің медициналық қауымы Қазақстанда онкологиялық көмекті дамыту бағдарламасын әзірлеу жөніндегі ұсынысты үлкен серпіліспен қарсы алып, қызу қуаттау үстінде. Осындай өршіл сезім ауаны елордасы Астанада жаңа онкологиялық орталық құру жөнінде Елбасы айтқан тұжырымнан да көрініс тапты. Бұл игілікті істер өз кезегінде онкологиялық сырқаттар өмірін ұзартудың жаңа жолы, өзекті проблеманы шешудің таптырмас кілті бола алады деп сенеміз.
– Әңгімеңізге рахмет.
Әңгімелескен, Темір ҚҰСАЙЫН.
Батыс Қазақстан облысы.