Ерліктің ескірмейтін ескерткіші
Сәрсенбі, 14 наурыз 2012 7:42
Тәуелсіздіктің 20 жылдық тойын атап өткен 2011 жылдың аяғында еліміздің жастарын патриоттық рухта тәрбиелеу, отаншылдық, елдік сипаттағы қасиеттерімізді жария ету, халқымыздың жүріп өткен ұлан-ғайыр тарихындағы қаһармандық істерін жаппай таныту, дәріптеу, мақтан ету бағытын мақсат етіп, елдік пен ерліктің өшпес ескерткішіндей болған бір ерен еңбек жарық көрді. Ол – «Қазақ энциклопедиясы» шаңырағында терілген, 900 беттен тұратын,
Сәрсенбі, 14 наурыз 2012 7:42
Тәуелсіздіктің 20 жылдық тойын атап өткен 2011 жылдың аяғында еліміздің жастарын патриоттық рухта тәрбиелеу, отаншылдық, елдік сипаттағы қасиеттерімізді жария ету, халқымыздың жүріп өткен ұлан-ғайыр тарихындағы қаһармандық істерін жаппай таныту, дәріптеу, мақтан ету бағытын мақсат етіп, елдік пен ерліктің өшпес ескерткішіндей болған бір ерен еңбек жарық көрді. Ол – «Қазақ энциклопедиясы» шаңырағында терілген, 900 беттен тұратын, 5 мың данамен жарық көрген «Айбын» энциклопедиясы. Бұл жобаның авторы запастағы полковник, ізденгіш, көп қырлы зерттеуші, бірнеше кітаптардың иесі, патриот азамат Сағидолла Көшімбаев. Ол өзінің аталмыш бағытта 20 жылға жуық уақыт бойы талмай ізденуінің арқасында тірнектеп жинаған дүниелерін осындай атаумен жарыққа шығарып отыр. Ғылыми кеңесшілері: генералдар Б.Ертаев пен А.Тасболатов және полковник, әскери ғылымдар докторы К.Серікбаев.
Біз еліміз тарихының ерлік беттерін айшықтаған «Айбын» энциклопедиясын оның алғашқы оқушыларының бірегейі, Халық Қаһарманы, халқымыздың айтулы азаматы, армия генералы, сенатор Мұхтар АЛТЫНБАЕВҚА жолығып, осы еңбек туралы пікірін білмек болып, бірнеше сұрақтар қойған едік.
– «Айбын» – әскери энциклопедия болғандықтан алдымен өзіңіздің пікіріңізді білгіміз келді. Осы еңбектен алған әсерлеріңізбен бөліссеңіз деп едік…
– Өте үлкен еңбек сіңірілген алып кітап екен. Бірақ өзі де, ішінде қамтылған толып жатқан деректер де білмекке ұмтылған ешбір жанды жалықтырмас деп ойлаймын. Өз басым үлкен қызығушылықпен, түгел танысып шықтым. Алған әсерім орасан зор. Жүздеген жаңа есімдер мен еліміздің тарихында болған талай мыңдаған жауынгерлік, ерлік оқиғалармен таныстым. Соның ішінде халқымыздың Кеңес Одағына дейінгі тарихындағы ерек оқиғалар мен ерен есімдердің бір парасын өзім үшін жаңадан аштым десем, артық емес. Өйткені, бізге олардың көбін оқытпай, Кеңес Одағы жылдарында тек Ресейдің тарихын, соның жауынгерлік ерлік беттерін ғана дәріптеп келді ғой. Қазақтың көптеген ерлік, елдік тарихтары туралы әңгіме бола қалса, ондағылар кертартпа, ескі қоғамды аңсаушылар, Қазақ еліне прогресс тек қана Ресейге қосылғандығының арқасында ғана келді деген секілді идеологиялық ұстаным аузымызды ашырмай тастайтын. Ал тәуелсіздік жылдарында халқымыздың өз бостандығы мен жерінің азаттығын қорғау жолында ғажайып ерліктер жасағандарын білдік. Бірақ сол оқиғалардың тарихын, қашан, қалай, нақты қай жерде болғанын біле бермейтінбіз. Енді мына энциклопедиядан олар туралы ғылыми, әскери тұрғыда ықшамдалған, нақты түсініктер алуға болады екен. Құрып кетуге шақ қалған ХVIII ғасырдағы халқының бастан кешкен оқиғаларынан да қызықты деректер таптым. Соның ішінде алғашқы әдет-ғұрып заңдары жинақталған «Жеті Жарғы», Ұлы және Орта жүздерде «Ақтабан шұбырынды – Алқакөл сұлама» атты қанды оқиғаның Кіші жүзде «Сауран айналған» аталғаны, Моңғолияда тұратын Абақ Керейлердің қазақтың дәстүрлі және Ислам діні әдет-ғұрпына сай жасалған ережелері, шетелдегі Оспан мен Зуқа батырлар сияқты ерлеріміздің көтерілістері, т.с.с. өзім үшін жүздеген жаңа жаңалықтарды таптым. Кеңес Одағы жылдарындағы «Қарақол көтерілісі», «Қордай көтерілісі» сияқты қалың көпшілік біле бермейтін оқиғалар да қамтылған екен.
Бұл энциклопедияның тағы бір ерекшелігі – оған тек әскери адамдарға, жауынгерлік оқиғаларға ғана байланып қалмай, Қазақ елін, жерін үлкен айтыс-тартыстарда, орталық өкіметтің кеңестерінде ұрда-жық шешімдерге қарсы шығып қорғаған ерлер, мемлекет қайраткерлерінің есімдері де енгізіліпті. Мәселен, Әлімхан Ермеков, Жұмабек Тәшенов және т.б. тұлғалар сондай мақсатпен енгізілгені көрініп тұр. Сондай-ақ халықты ерлікке, жастарды ержүректілікке үндейтін шығармалар, намысын қайрап, жігерін тасытқан өткір үндеулер тудырған, шешен кесімдер айтқан билер, жыраулар мен жыршылар, күйшілер, ақын-жазушылар да ұмыт қалмаған. Мәселен, Асан Қайғы, Кетбұға сияқты шешендер, Құрманғазы, Тәттімбет, Сүгір сияқты күйшілер, Төле, Қаз дауысты Қазыбек, Әйтеке сияқты билер, Махамбет сияқты ақындардан бастап патриоттық шығармалары халықтың аузынан түспейтін осы күнгі ақын-жазушылар мен сазгерлерге дейін бар. Басқыншы жаулардың шапқынынан ел бүтіндігін қорғауды ұйымдастырған хандар, батырлар, қолбасшылар есімдері де түгел енгізілген. Сондай-ақ кеңестік және тәуелсіз Қазақстанда ірі әскери лауазым атқарғандар, соның ішінде генерал атағын алғандар түгел қамтылған. Ұлы Отан соғысының қаһармандары да кеңінен орын алған. Сөйтіп бұл еңбек, өзінің негізгі мақсаты – патриоттық сезім тудыратын үлгілерді халыққа барынша молынан танытуда озық әдістерге қол жеткізген.
– Елбасының еліміздің алдына қойып отырған міндеттерінің қатарында патриоттық тәрбиенің де айрықша орын алып отырғаны белгілі. Мына еңбек сол талаптың үдесінен шыға ала ма?
– Әрине. 2007 жылғы 21 наурызда Қазақстан Республикасы Президентінің Жарлығымен еліміздің жаңа Әскери доктринасы бекітілген болатын. Онда негізінен мемлекеттің әскери қауіпсіздігін қамтамасыз етуге, әскери текетірестер мен қарулы жанжалдарды болдырмауға, Қарулы Күштерді, басқа да әскерлер мен әскери құрылымдарды дамыту мен қолдауға негіз қалаушы көзқарастар жүйесі көрсетілген. Сонымен бірге онда Қазақстан Республикасының азаматтарына патриоттық тәрбие берудің 2006-2009 жылдарға арналған мемлекеттік бағдарламасы негізінде идеологиялық жұмысты жандандыру керектігі атап айтылды. Осы істі жан-жақты жүргізуді жалғастырып, оның тиімділігін арттыруда мына «Айбын» әскери энциклопедиясы өзінің үлкен рөлін атқарар деген үміттемін. Айта кетерлігі, осыдан біраз жылдар бұрын орыс тілінде 2 томдық «Сарбаз» атты әскери энциклопедия да жарық көрген еді. Бірақ онда қазақ халқының өз төл тарихына тән оқиғалар аталмай, тек кеңестік дәуір мен тәуелсіздік жылдары ғана қамтылған болатын. Сондықтан да «Айбын» әскери энциклопедиясын ана тілімізде тұңғыш рет шыққан қазақ халқының барлық кезеңде бастан кешкен әскери оқиғалары мен ел қорғаған хан, батыр, билерінен бастап, мемлекет қайраткерлері, ақын-жырауларын қоса қамтыған ұлан-ғайыр еңбек деп бағалауымызға болады.
Барлық мемлекеттерде де айтулы оқиғалар мен ардақты тұлғалардың өмірінен қысқа да нұсқа ғылыми, нақты деректер беретін энциклопедия жасауға үлкен көңіл бөлінеді. Жауапкершілігі өте ауыр осындай еңбекпен арнаулы ғылыми мекемелер айналысатынын да білеміз. Мәселен, Кеңес Одағы кезінде орыс тілінде жарық көрген 8 томдық «Герои Советского Союза» әскери энциклопедиясына сол кездегі КСРО Министрлер Кеңесінің Төрағасы А.Косыгин басшылық еткенінен хабардармыз. Ондағы құрастырушылар мен авторлары қатарына Қорғаныс министрлігінің ең жоғары әскери лауазымды адамдары, тарих, философия, саясаттану ғылымдарының әйгілі мамандары қатысқан еді. Ал біздің мына сөз етіп отырған «Айбын» әскери энциклопедиясын негізінен бір-ақ адам – запастағы полковник, зерттеуші Сағидолла Көшімбаевтың құрастырғаны – оның өте үлкен, жанкешті еңбек атқарғандығының көрінісі. Мен автормен әңгімелескенде оның осы еңбекті жинақтауға 20 жылға жуық уақыты кеткенін білдім. Енді оның еңбегі лайықты бағасын алар деген үміттемін.
– Осы энциклопедияда өзіңізді таң-қалдырған айрықша деректер болды ма?
– Иә. Мәселен, қазақтан шыққан барлаушы қыз Ақжібек Мұқашева жайлы бұрын білмейді екенмін. Орынбор өлкесінде туған ол 1940 жылы Мәскеу мемлекеттік университетінің механика-математика факультетін бітіріпті. 1941 жылғы көктемде КСРО Қорғаныс министрлігі Бас штабының Бас барлау басқармасындағы шифровальщиктер бөліміне жұмысқа алынады. Одан Брюссельдегі Кеңес елінің барлаушысы «Кенттің» (Уругвай азаматы Витсент Сиерра) жеке шифровальщигі болған. Сонда жүріп Гитлердің КСРО-ға соғыс ашатынын алғашқы жеткізушілердің бірі болады. Жалпы, ол КСРО-ның Батыс Еуропада 1930 жылдан бастап әрекет еткен «Қызыл капелла» атты барлау тобына қатысты болғанын өзі де білмеген. Ақырында, қазақтың батыр қызына НКВД жендеттері тарапынан ағылшын барлау қызметіне жұмыс істеді деген жалған айып тағылып, 1942 жылы желтоқсанда ұсталып, 25 жылға сотталады. Энциклопедияда оның кейінгі тағдырынан дерек жоқ екендігі айтылған, бірақ зерттеушілер бір дерек тауып қалар деген үміттемін.
Жаудың ішінде жансыз ұстау ежелден бар әдіс қой. Абылай ханның тұсында да жау ішінде болған Айбике ханым туралы осы энциклопедиядан біліп отырмын. Ол «қолға түскен күңнің» лақап «аңызымен» қалмақ ханының ордасында тұрып, көмекшілері арқылы қазақ қосындарына көп мәліметтер беріп тұрған. Өзі қалмақ тілінде таза сөйлейтін болыпты. Қазақтың осындай да қыздары болғандығы мені керемет таңқалдырды. Сондай-ақ «Айбында» Тойғара, Айғаным ханшайым, Айғыз, т.б. қазақтың атақты қыздары туралы деректер бар екен. Ал біз негізінен Әлия, Мәншүк және Хиуаз апаларымыз туралы ғана біліп келдік емес пе.
– Осы еңбектің құндылығы қатарына тағы нені жатқызуға болады деп ойлайсыз?
– Жалпы айтқанда, «Айбын» энциклопедиясы халқымыздың сонау, көне дәуірлеріне дейін ой жүгіртіп, қазақ жерінде адамның қашан пайда болуынан бастап, олардың қолданған соғыс құралдарына дейін деректер береді. Одан берідегі Еділ (Атилла), Бейбарыс, Шыңғыс хан мен оның ұрпақтарынан біздің кешегі хандарымызға дейінгі ел билеушілерін, атақты адамдарын қалдырмай қамтыған. Қазақтардың жоңғармен болған 200 жылдық соғысындағы айтулы ерлер есімдері, оқиғалар, атақты өлең-жырлар, жер-су атаулары, соғыс әдістері, қолданылған жауынгерлік қарулар тарихынан да мол мағлұматтар береді. Ресей патшалығына отар болған жылдардағы ұлт-азаттық көтерілістер, оларды бастаған ерлер, түрлі құжаттар, шайқас болған өңірлер туралы мәліметтер қамтылған. Қазақстанның кеңес дәуірі азамат соғысынан бастау алған. Қазақтан шыққан алғашқы әскерилер, ұлттық қазақ полктары, сол кездегі қолбасшылар мен белгілі қайраткерлер жайлы деректер мол. Әсіресе, «қызыл қырғын», жаппай болған репрессия жылдарындағы әскери өмірге қатысты ерлер есімдері мол.
Ұлы Отан соғысы жылдары да молынан қамтылған. Тиянақтап оқыған азамат бұрыннан белгілі деректермен қатар жүздеген жаңа оқиғалар, есімдер мен фактілерге жолыға алады. Соның ішінде Қазақстаннан басқа ТМД елдерінде туып-өсіп, Кеңес Одағының Батыры атағын алған, жоғары әскери шенге жеткен қандастарымыздың есімдеріне де тап боламыз. Сондай-ақ, Қытай, Моңғолия, Түркияда да жоғары әскери шен алып, елеулі әскербасылар болған немесе үлкен ерліктер жасаған қазақ ұлдарының аты-жөндері бар. Энциклопедияда ядролық қару, оның зардаптары, соның ішінде Семей ядролық сынақ полигоны туралы деректер де жетерлік. Отан қорғауға, ерлікке үндейтін патриоттық жырлар, дастандар, тарихи шығармалар және олардың авторлары туралы мол мағлұматтар бар. «Желтоқсан көтерілісі» туралы да шағын дерек беріліпті. Кеңес Одағы және тәуелсіздік жылдарында жасалып, халқымызға қаһармандық рух беретін шараларға, елдік пен ерлікке үндейтін ескерткіш белгілердің бәріне анықтама берілген. Соның ішінде Абылай хан, Кенесары, Әлия мен Мәншүк ескерткіштері, «Даңқ», «Отан-ана» мемориалдарына жақсы анықтамалар берілген. Тәуелсіз Қазақстан қарулы күштерінің алғашқы жылдардан басталған тарихына, жүрген жолдарына, қабылданған заңдарға, қару-жарағына, әскери шендеріне, айырым белгілеріне, тіпті ерліктері үшін берілетін атақтар мен орден-медальдарына дейін көрсетілген. Сондай-ақ «Айбын» әскери энциклопедиясында елдің барлық әскерлері мен әскери құрылымдары, соның ішінде ішкі және шекара әскерлері, Ұлттық қауіпсіздік, әскери академия мен басқа да әскери жоғары оқу орындар, училищелер және кадет корпусы, азаматтық жоғары оқу орындарының әскери кафедраларына, Б.Момышұлы, С.Нұрмағамбетов, Т.Бигелдинов атындағы арнаулы әскери орта мектептер турасында толық мағлұматтар берілген. Міне, осындай құндылықтары болғандықтан да «Айбын» энциклопедиясын әскердегі қатардағы жауынгерден бастап барлық әскери қызметшілерге, әскери кафедра студенттеріне, ұландарға, курстар мен факультет тыңдаушыларына, әскер тақырыбын зерттегісі келген ғалымдарға, осы саланы тереңірек білгісі келген жалпы көпшілікке дерек көзі ретінде пайдалануда таптырмайтын құрал деп айта аламыз.
– Құрметті Мұхтар Қапашұлы! Сіз осынау еңбектің барлық жақсы жақтарын атап шықтыңыз. Әрине, ана тілімізде шыққан осындай тұңғыш энциклопедия болғандықтан оған қуанамыз ғой. Қуанбай, мақтанбай болмайды. Бірақ әділдік үшін көзіңізге түскен кемшіліктер туралы да айта кетсеңіз…
– Ондайлар болуы заңды. Алдағы уақытта ескерту үшін айту парыз. Мысалы, Қазақстан әскері құрылған кезден жоғары әскери атақ алған бірді-екілі генерал енгізілмей қалыпты. Соның бірі генерал-майор С.Байтеміров. Содан соң, ғылыми кеңесшілер қатарына армия генералы, Кеңес Одағының Батыры және №1 Халық Қаһарманы Сағадат Нұрмағанбетовтің енгізілгені дұрыс болар еді. Тәуелсіз еліміз әскерінің ең алғашқы Қорғаныс министрі болған ол кісінің жөні бөлек қой, айтары да көп болар еді. Кітапты құрастырушының лауазымды қызметтердегі қолбасшыларға жолыға алмаған себебінен болу керек, осындай олқылықтар орын алған. Әріп қателері де жоқ емес екен. Мәселен, 13 бетте «АВАКС» деген сөз «АБАКС» болып жазылыпты. Тағы бір байқағаным, тәуелсіз Қазақстан әскерлері мен басқа да құрылымдар генералдарының фотолары бір ізді емес. Бірінікі түрлі түсті, тағы бірінікі қара болып шыққан. Менің көзіме түскені осындай нәрселер. Әрине, талапшыл ғалымдар, оқырмандар өз пікірін айтар, оған таласым жоқ. Содан кейін кітап толықтырылып, жөнделіп, қайта басылып жатса, дұрыс болар еді. Қалай десек те, Қазақстан әскері тарихын білуде құбылыстық оқиғаға баларлық, халық игілігіне пайдасы тиетін бір еңбектің дүниеге келгені сөзсіз. Сондықтан барша қауымға құтты болсын айтамын.
– Әңгімеңізге рахмет.
Әңгімелескен Жақсыбай САМРАТ.
АСТАНА.