Қазақстан армиясы
Сейсенбі, 27 наурыз 2012 7:48
Ол қалай құрылып еді? Қазір қандай?
Айбынды армиямыздың бейбітшілік туын желбіреткен жауынгерлері Тәуелсіз елімізді, кең-байтақ жерімізді, айдын шалқар көлімізді көзінің қарашығындай қорғап тұр, қорғай береді де. Осыдан жиырма жыл бұрын тұсауын кескен Қарулы Күштеріміздің бүгінде қанаты қатайып, бұғанасы бекіді. Алыс-жақын шетелдік әріптестерімен бәсекеге түсуге толық мүмкіндік алды. Әрине, мұның бәрі оңайлықпен келмегені белгілі. Келмеске кеткен Кеңес Одағы тарап,
Сейсенбі, 27 наурыз 2012 7:48
Ол қалай құрылып еді? Қазір қандай?
Айбынды армиямыздың бейбітшілік туын желбіреткен жауынгерлері Тәуелсіз елімізді, кең-байтақ жерімізді, айдын шалқар көлімізді көзінің қарашығындай қорғап тұр, қорғай береді де. Осыдан жиырма жыл бұрын тұсауын кескен Қарулы Күштеріміздің бүгінде қанаты қатайып, бұғанасы бекіді. Алыс-жақын шетелдік әріптестерімен бәсекеге түсуге толық мүмкіндік алды. Әрине, мұның бәрі оңайлықпен келмегені белгілі. Келмеске кеткен Кеңес Одағы тарап, Тәуелсіздіктің арайлы ақ таңы атқан шақта құрылған қазақ армиясы егемен елімізбен бірге дамып қалыптасты. Қазақстан Тәуелсіздік алған тұста дербес қарулы күштердің болмауы бетпе-бет келген сын-қатерлердің бірі еді. Сол қатерден аман-сау шығу үшін күн тәртібінде: «Елімізге қандай армия керек? Оның келешегі қандай болмақ? Ұйымдастыру құрылымы қандай болуы тиіс? Қажетті кәсіби мамандарды қайдан аламыз? Біздің стратегиялық одақтасымыз кім? Стратегиялық күштер мен ядролық қаруды не істейміз?» деген сұрақтар тұрды. Сонымен аталған мәселелер қалай шешілгенін және Қазақстан Армиясының құрылып қалыптасқан кезеңдеріне көз жіберейік.
Ғаламдық қауіпсіздікке бастаған маңызды шешімдер
1990 жылғы 25 қазанда Қазақ КСР Жоғарғы Кеңесі мемлекеттің егемендігі туралы Декларацияны халыққа жариялады. Осы жылы бұрынғы КСРО республикаларының басшылары басқосты. Кездесуде тәуелсіз мемлекеттердің бастапқы қалыптасу кезеңінде Кеңес Армиясының әскери қуаты мен жауынгерлік әлеуетін сақтап қалу үшін Тәуелсіз Республикалар Одағының Біріккен Қарулы Күштерін құру туралы шешім қабылданды. 1991 жылғы Беловеждегі Ресей, Украина, Белоруссия басшылары кездесуінің нәтижесі бұрынғы Кеңес Одағы республикаларының және оның біртұтас қарулы күштерінің бөлінуін жылдамдатты. Қалыптасқан жағдайды және елдің әскери қауіпсіздігін қамтамасыз етудің маңыздылығын ескере отырып Нұрсұлтан Назарбаев 1992 жылғы 7 мамырда № 745 Жарлығымен Қазақстан Республикасы Қарулы Күштерінің құрылғанын жариялады.
Егемен Қазақстанды құрумен Республиканың аумақтық тұтастығын қорғау, елдің қорғаныс ведомствосын кім басқарады деген сұрақтар туындаған кезде Мемлекет басшысы Н.Ә.Назарбаев: «Қорғаныс министрі болып көпті көріп, ысылған Сағадат Қожахметұлы Нұрмағамбетов тағайындалады» деген жалғыз шешімін айтты.
1992 жылғы мамырдан бастап 1995 жылғы қазанға дейін – Қазақстан Республикасының Қорғаныс министрі болған армия генералы Сағадат Нұрмағамбетовке №1 Алтын жұлдызды тапсыру мен «Халық Қаhарманы» атағы 1994 жылғы 4 мамырда берілді.
Бұрынғы Кеңес Одағының басқа елдерінің армиясы сияқты, Қазақстан армиясы да бүгінгі келбетіне бірден ие болған жоқ. Қазақстанның өз армиясын құру тәжірибесі жоқтың қасы еді. Сондықтан, оны түйірлеп жинау қажет болды. Еліміз үшін оңай болмаған уақытта қысқа мерзімде көптеген мәселелерді шешуге тура келді – мемлекеттік органдарды бекіту, ел дамуының жаңа экономикалық және саяси моделін қалыптастыру қажет болды. Ұзақ жылдар бойы қалыптасқан бұрынғы жүйенің аяқ астынан күйреуі көпшілікті алаңдатпай қоймады. 1991 жылы Кеңес Одағы құлаған соң тәуелсіздік алған Қазақстан саны көп стратегиялық қару мен қуатты ядролық арсеналға ие болып қалды. Республика аймағында 104 құрлық- аралық СС-18 ядролық оқтұмсықты баллистикалық ракеталар мен ядролық қанатты ракеталарды алып жүруге мүмкіндігі бар Ту-95 стратегиялық бомбалаушы ұшақтардың дивизиясы тұрды. Сол кезеңде бұрынғы Кеңестік Социалистік Республикалар Одағынан ірі сынақ, ғарыштық және ядролық полигондар – Ембі, Сарышаған (Приозерск), Байқоңыр (Ленинск немесе Төретам атымен белгілі болған), Семей полигоны, сондай-ақ егемен мемлекетке бұрынғы кеңестік Түркістан әскери округінің саны 200 мыңнан асатын әскери тобы мұраға қалды.
Осы тұста Нұрсұлтан Назарбаев тек Қазақстанға ғана емес, бүкіл әлемге үлгі боларлық заманалық шешім қабылдады. Ол оның әлемдегі ең ірі ядролық полигонды жауып, ядролық арсеналдан бас тартып, қаруды таратпау жөніндегі Келісімге қосылу туралы шешімі еді.
Ядролық қарусыздану процесіне баға жетпес үлес қосып, аймақтық тұтастығы мен егемендігіне халықаралық кепілдеме алған жас Тәуелсіз Қазақстан бүкіл адамзатқа өзінің тату көршілікке, бейбітшілікке бекем екендігін көрсетті. Сол бір ауыр кезеңдерде қабылданған шешімдер туралы Нұрсұлтан Назарбаев кейін былай дейді: «Ол шешімдер ғаламдық қауіпсіздік саласындағы Қазақстанның келешектегі стратегиясын анықтады. Сол кезден бастап Қазақстан өзіндік ғаламат құртып жіберетін күшке ие бола тұрып, адамдар тұңғыш рет одан өз еркімен бас тартқан «әлем эпицентріне», орынға айналды».
Қазақстан үшін ауыр да күрделі алғашқы жылдары бірден қуатты Қарулы Күштерді құру мүмкін болған жоқ. Бірақ мемлекет қауіпсіздігі, жаңа армияны аяғынан тік тұрғызу негізгі басымдықтардың қатарынан орын алды. Қазақстан Республикасы Президенті Нұрсұлтан Назарбаевтың жеке басшылығымен Республикада дербес Қарулы Күштерді құрудың қажетті алғы-шарттары мен Отанды қорғауға олардың дайындығын қамтамасыз етудің негіздері жасалды.
Қазақстан елі мен халқының әскери қауіпсіздігін қамтамасыз ету жолындағы алғашқы қадам Мемлекеттік қорғаныс комитетін құру болып табылды. Мемлекеттік қорғаныс комитеті – Қазақстан тарихындағы алғашқы орталық басқару органы және республикалық әскери комиссариат пен республиканың Азаматтық қорғаныс штабының базасында құрылды. Комитет өз қызметінің алғашқы қадамында-ақ Қазақстанда орналасқан барлық әскери құралымдардың командирлерімен тығыз байланыс орнатуға, олардан әскерлердегі істің жағдайы туралы айқындалған ақпараттар алуға қол жеткізді. Қазақстан Республикасы Президентінің аппаратында және Министрлер Кабинетінде әскерлерді басқару жүйесін тиімді ұйымдастыру үшін Қорғаныс бөлімі құрылды.
Бәрінен бұрын елдің жеке Қарулы Күштерін құру және оларды Республика ұлттық қауіпсіздік жүйесіне ықпалдастыру, атқарушы билік органдарымен және қуатты ведомстволармен қарым-қатынасын қамтамасыз ету, әскерлерді басқару мен жауынгерлік әзірлікті жөнге келтіру, қаржылық, тылдық және материалдық қамтамасыз етуді ұйымдастыру қажет болды.
Қазақ КСР Жоғарғы Кеңесінде тұрақты негізде Ұлттық қауіпсіздік және қорғаныс жөніндегі комитет құрылды. Комитетте қысқа мерзімде Қазақстан Республикасының Қарулы Күштерін құруға қажетті құжаттар пакеті әзірленді.
Қойылған мақсатқа жету қиындықтар туғызды, себебі, Қазақстанда әскери құрылыстан тәжірибесі бар әскери мамандар саны шектеулі ғана болатын. Кәсіби мамандардың басқару саласында және әскери буындарда жетіспеушілігі көзге ұрып тұрды. Сол кездердегі ащы шындықтың бірі Қазақ Кеңестік еспубликасының аймағында қызмет еткен бұрынғы кеңес офицерлері жаппай өздерінің кіші отандарына және басқа да Тәуелсіз Мемлекеттер Достастығы республикаларына кетіп жатты. Қарулы Күштерді қалыптастырудың өтпелі кезеңінде әскери-саяси басшылық ұйымдастыру, экономикалық, техникалық, әлеуметтік және құқықтық мәселелерді армияның жұмыс жасауы үшін шұғыл түрде шешіп жатты. Тапсырманың мәні мемлекеттік құрылысты және елдің егемендігі мен аймақтық тұтастығын қорғауды қамтамасыз етуге дайындық жұмыстарының мерзімін барынша қысқарту болды. Жұмыс күні-түні қайнап жатты. Барлық назар әскери мекеменің толыққанды жұмыс істеуіне, заңнамалық актілер пакетін жасап оны қабылдауға, жастарды өз армиямыздың қатарына шақыруға, күнделікті жауынгерлік оқу-жаттығуларды ұйымдастыруға, әскерлер мен штабтардың әскери-жауынгерлік қызметінің тәртібін белгілеуге аударылды.
Ант, жарғы, әскери доктрина, идеология, қамтамасыз ету жүйесі, елдің алғашқы әскери басшылығы құрылды, әскери кадрларды даярлау базасы, командалық құрамды тағайындау сияқты мәселелердің барлығын келешек үшін заманауи тұрғыда ой елегінен өткізіп шешу қажет болды. Елде қажетті ақша мен материалдық қаражат іздестірілді. 1990 жылдың басында ақшалай қамтамасыз ету кешіктіріліп төленді. Бұл кезеңде әскери ведомствоға бюджет қаржыларының әскерлер қолындағы қару-жарақтар мен әскери техниканы жауынгерлік дайындықта ұстап тұруға ғана жететіндей аз ғана бөлігі бөлінді. Осылайша, 1993 жылы еліміздің әскери бюджеті, бүгінгі күнмен салыстырғанда, небәрі 8 млрд. теңгені құрады. Қару-жарақ пен әскери техниканы инвентаризациялау жүргізілді, оған қоса әскерлерде жедел және жұмылдыру дайындығы жолға қойылды.
Қазақстандық армия құру барысында барлық әскери құрылымдарда взводтан дивизияға дейін офицер кадрлардың жетіспеушілігі өткір мәселе болды. Әсіресе, жоғары буындағы офицерлер тым аз еді. Кеңестік кезеңнің 74 жылында қазақ халқының тек үш өкілі ғана Бас штабтың Әскери академиясын бітірген, тек екі адам ғана әскери ғылымдар кандидаты ғылыми дәрежесі бойынша диссертация қорғады. Мұнан біз ұлттық әскери кадрлар даярлау мәселесіне ол уақытта ешқандай көңіл бөлінбегенін көреміз. Әскери комиссариаттар мен республиканың Азаматтық қорғаныс жүйесінде 1949 офицер қызмет атқарды, оның ішінде ұлты қазақтары 247 (12,6%) ғана болды. 19 облыстық әскери комиссардың тек 5-уі ғана қазақ еді. КСРО Қарулы Күштері бойынша жалпы 2 830 офицер қазақ ұлтынан болса, Алматы жоғары жалпы әскери командалық училищесіндегі 190 офицердің тек 6-уы қазақ (3%) болды. Училищеде батальон командирінің бірде-біреуі қазақ ұлтынан болған емес, курсанттардың санына келсек, 87 (9,4%) қазақ баласы болды. Әскери кадр саясатының осындай зардаптары, әрине, қиыншылыққа кезіктірмей қоймады. Әсіресе, әскери білім саласы жүйесінде ұлттық әскери кадрларды даярлау ең көкейкесті мәселе еді. Осыған қарамастан кадрларды іріктеу ұқыптылықпен жүргізіліп, оларды орналастыру сауаттылықпен іске асырылды, алғашқы әскери басшылық қалыптасты.
Ел Президентінің жарлықтарымен және өкімдерімен Қорғаныс министрлігінің басшылық құрамы белгіленді. Офицерлік корпус кез келген мемлекеттің және оның армиясының «алтын қоры» екендігі көпшілікке белгілі. Көптеген офицерлер нағыз патриот ретінде Отан үніне құлақ түріп ұлттық армияның қатарын толықтырды. Олар бұрынғы одақтық республикалардан өздерінің Отанына қызмет етуге әзір екендіктерін іс жүзінде дәлелдеп, туған елге бет түзеді. Сол кезден бастап қазіргі Қазақстан Армиясының іргетасы қалана бастады. Оның құрамына Қорғаныс министрлігі, Бас штаб, Құрлық әскерлері, Әскери-әуе күштері мен Әуе шабуылына қарсы қорғаныс әскерлері кірді. Біртіндеп әскерді тастап кетпеген кәсібилердің күшімен әскери жүйе пайда болды. Өзгерген жағдайға байланысты жаңа Қарулы Күштердің мақсаты мен міндеттері оны шешудің жолдары белгіленген нормативті-құқықтық база жасалды.
1992 жылдың 22 желтоқсанында Қазақстан Республикасы қорғанысын ұйымдастыратын негіздемені белгілейтін, мемлекеттік билік пен басқарушы органдарға өкілеттілік беретін «Қазақстан Республикасының қорғанысы және Қарулы Күштері туралы» Қазақстан Республикасының Заңы қабылданды. Заң Қазақстан қауіпсіздігін қамтамасыз етудегі жалпы жүйе бойынша Қарулы Күштердің рөлін, орны мен міндеттерін белгіледі. Қазақстан Республикасы Қарулы Күштері әскери қызметшілерінің Әскери антының мәтіні жасалып, Президенттің 1992 жылғы 25 тамыздағы Жарлығымен іске асырылды. 1992 жылдың күзгі әскерге шақыруынан бастап жас сарбаздар Қазақстан Республикасына ант берді. Ант қабылдау армия тарихында жақсы дәстүрге айналып, әскери бөлім үшін мереке күні болып хабарланды әрі салтанатты жағдайда өткізілді.
1993 жылдың 19 қаңтарынан Қазақстан Республикасының «Жалпы әскери міндет және әскери қызмет» Заңы қабылданып, онда әскери қызметті атқарудың негізгі ережелері, азаматтарды дайындау мәселелері, оларды белгіленген нақты әскери қызметке шақыру және босату, азаматтар мен лауазым иелерінің заң бұзушылыққа жауапты екендігі көрсетілді. «Әскери қызметшілер мен олардың отбасы мүшелерінің мәртебесі және оларды әлеуметтік қорғау туралы» Заң қабылданды, онда Қазақстан Республикасы әскери қызметшілерінің әскери борышын өтеу кезіндегі міндеттері мен жауапкершілігі және құқықтары белгіленді.
Қазақстан Республикасының бірінші әскери доктринасы 1993 жылы 11 ақпанда ел Президенті бекіткеннен кейін күшіне енді. Тәуелсіздіктің алғашқы күндерінен бастап мемлекет басшылығы армияның қоғаммен терең әлеуметтік қатынасы бар мемлекеттің нышаны екендігін атап өтті. Қарулы Күштердегі қызмет бұрынғы замандағыдай адами қасиетке тәрбиелейтін және армияға шақырылатын жастардың есейіп ес жинайтын әскери-патриоттық мектебі болып қалуына бар күш жұмсалды. Сонымен аз уақыт ішінде тәуелсіз және егеменді Қазақстанда мемлекеттің қарулы қорғанысына бағытталған жаңа мемлекеттік институт құрылды.
Қазақстан Республикасы Президентінің 1996 жылғы 18 шілдедегі «Қазақстан Республикасы Қарулы Күштерінің әскери рәміздері туралы» Жарлығымен Қарулы Күштер түрлерінің байрақтары, әскери бөлімдердің жауынгерлік тулары мен Қазақстан Республикасы Қарулы Күштерінің рәміздері бекітілді. Сондай-ақ, «Әскери бөлімнің Жауынгерлік туы туралы ереже» күшіне енгізілді.
Жаңа әскери буын – заманауи армияның негізі
Заманауи армия құру – бұл тек техника мен қару-жарақты жетілдіру емес, сонымен бірге бірінші кезекте кәсіби армияның негізі болып саналатын жаңа әскери буынды тәрбиелеу. 1996-2005 жылдар аралығында әскери білім беру жүйесінің негізі қаланды. Республикада бірнеше әскери оқу орындары ашылды. Олар: Ұлттық қорғаныс университеті, Құрлық әскерлерінің Әскери институты, Әуе қорғанысы күштерінің Әскери институты, Радиоэлектроника және байланыс әскери инженерлік институты, Әскери-теңіз институты, Шет тілдері әскери институты. Жұмылдыру резервін толықтыру мақсатында азаматтық оқу орындарында запастағы офицерлер даярлау үшін әскери кафедралар ашылды.
1996 жылы Қарулы Күштерге кәсіби сержанттар даярлау мақсатында Елбасының Жарлығымен Шучье қаласында Қорғаныс министрлігінің Шоқан Уәлиханов атындағы Кадет корпусы құрылды. Оны бітірушілер кәсіби сержанттар институтының негізін құрады. Бүгінгі таңда сержанттар басқару орталық органдарынан бастап ең төменгі бөлімдерге дейін әскерлердің бүкіл құрылымын қамтиды. Ал 1999 жылы ашылған армия генералы С.Нұрмағамбетов атындағы «Жас ұлан» республикалық мектебі нағыз патриоттар тәрбиелейтін оқу орнына айналды. Онда тұрмысы төмен және көп балалы отбасыларының балалары білім алуда.
Әскерлерде жеткілікті түрде кадрлар мен зияткер офицерлер әлеуеті қалыптасты. Қазақстан Республикасы Қарулы Күштері институттарының түлектері жыл сайын ел әскери құрылымдарында лайықты қызметтен өтеді. Олардың көпшілігі қазірдің өзінде құрама, әскери бөлім, батальон, рота командирлері лауазымдарында, сондай-ақ Қазақстан мен Ресей әскери академиялары мен университеттерінде оқып, білімдерін жетілдіруде. Әскери оқу орындарын үздік бітірген түлектерге ел Президенті – Қазақстан Республикасы Қарулы Күштерінің Жоғарғы Бас қолбасшысы салтанатты жағдайда лейтенант погондарын тапсыруы игі дәстүрге айналып отыр.
Жүніс Омар, Қорғаныс министрлігі баспасөз қызметінің басқарма бастығы, полковник.
(Жалғасы бар).