Төте жолдың тиімділігі мол
Бейсенбі, 29 наурыз 2012 7:29
Қазақ елі егемендігін алған сәттен бастап іргесін бекітіп, қарқынды дамуымен қатар, сонау қырғын соғыс, қуғын-сүргін, ашаршылық сияқты қиын-қыстау кезде шетелге тарыдай шашырап, жан сауғалап жыраққа кетіп, қазіргі таңда басынан талай қиыншылықты өткізіп жүрген қандастарына бабасындай қамқорлық жасап, әке-шешесіндей аялағанда, оларға жұмсақ алақанын ашқанда, қандастарын өздерінен артық көріп оларға жанашырлық жасағанда, жанына тартып мәпелегенде Қара шаңырақ иесі – бүкіл қазақстандықтар болғанына біз шексіз қуанамыз, ішіміз елжіреп, тынысымыз кеңейіп, шаттанамыз.
Бейсенбі, 29 наурыз 2012 7:29
Қазақ елі егемендігін алған сәттен бастап іргесін бекітіп, қарқынды дамуымен қатар, сонау қырғын соғыс, қуғын-сүргін, ашаршылық сияқты қиын-қыстау кезде шетелге тарыдай шашырап, жан сауғалап жыраққа кетіп, қазіргі таңда басынан талай қиыншылықты өткізіп жүрген қандастарына бабасындай қамқорлық жасап, әке-шешесіндей аялағанда, оларға жұмсақ алақанын ашқанда, қандастарын өздерінен артық көріп оларға жанашырлық жасағанда, жанына тартып мәпелегенде Қара шаңырақ иесі – бүкіл қазақстандықтар болғанына біз шексіз қуанамыз, ішіміз елжіреп, тынысымыз кеңейіп, шаттанамыз.
Қазақ елінің қамқорлығына бөлене бастаған шетел қазақтары ел тәуелсіздігін аса зор бағалап елімізге барлық жақсылық бола берсе екен деп тілеп қана қоймай Қара шаңырағымызға тамшыдай болса да өз үлесімізді қосып, елімізді, жерімізді көздің қарашығындай қорғап сақтау, қадірлеу, барынша өркендету біздің абыройлы борышымыз деп санайды. Қазақ елі егемендігін алып, туын көтергенде бұған дүниежүзі қазақтарынан, тіпті бойында қазақтың қаны бар адамдардан қуанбаған, мәз-мейрам болып тойламаған бірде-бір адам баласы сірә болмаған шығар. Біздің ұзақ жылдар бойы енесінен айырылған ботадай боздап, келешегі мен ұрпақ-жұрағат үшін алаңдаумен күн өткізіп жүргенімізді сезінген Қазақ елі біздерге Отанына оралудың жолын ашты. Келешегімізге сенімділік тудырып, үмітімізді арттырып, күдігімізді үзді. Сол үшін Дүниежүзі қазақтарының қауымдастығын Елбасы өзі құрып, күні бүгінге дейін бұл ұйымды өзі басқарып келеді. Тәуелсіздіктің ертеңінен бастап қазақ иісі бұрқыраған барлық елдерге іссапармен бірнеше рет барып, ондағы қазақтармен кездесіп әңгімелесті.
ДЖҚҚ арқылы шетелдегі қазақтардың ұлы құрылтайын 4 рет өткізіп, олардың келешек бағытын анықтады. Былтыр егемендігіміздің 20 жылдығын тойлап өткізсек, 2012 жылы ДЖҚҚ құрылуының, және шетелдегі қандастардың туған Отаны, Қара шаңырағына оралуының 20 жылдық мерекесін қуанышпен өткізетініміз де анық. Қауымдастық Төрағасының бірінші орынбасары Талғат Мамашев осы мәселені әдейі белгілеп, еларалық төте жол мәселесі жөнінде өз ұсынысын 2008 жылы шыққан “Шетел қазақтары” атты кітабында өте анық жазған. Қазақ елінің Елбасы Нұрсұлтан Әбішұлы ең алғаш Германия, Англия, Түркияда болған сапарларында сондағы қазақтармен кездесіп, қаншалықты толқығанын телевизор, радио, баспасөз арқылы естіп-біліп, Елбасының жүрегінде екенімізге аса қуандық, еліміздің ерлігіне, Елбасының қаһармандығына сүйсіне білдік. Тіпті 1993 жылдың күзінде Моңғолияға іссапармен барған кезде аймағымыздың әйгілі ақын-жазушысы Шынай Рахметұлының сөзіне жазылған арнауға жазушы, журналист Қайнар Олжай “Президент пырағы” кітабында былай деп жазған:
“Баян-Өлгей аймағының Мизамхан бастаған азаматтары Қазақстан делегациясына қонақасы беруді парыз санапты. Көк тәңірі резиденциясының ішінен олар да он екі қанат қазақы киіз үй тігіпті. Үйдің ою-өрнегі айтып жеткізгісіз. Сол жерде үкілі домбыра алып, өзі де үлбіреп тұрған Меруеш Башайқызы деген қарындасымыз Қазақстан Президентіне арнау айтты. Президент талай арнауды естіп жүргені белгілі. Бірақ ата жұрттан алыстағы жұрттың сағынышы, аңсауы, өксігі, өкініші, үміті, болашағы жатқан бұл арнаудың жөні бөлек болды. Наз да бар, базына да бар, тілек те бар, қайсарлық та бар. Бәрі-бәрі даусы ерен, әні ерен, сөзі ғаламат осы арнаудан табылар еді…»
Сол арнау жыр былай басталатын:
Қош келдіңіз Нұр-аға!
Елімізге нұр ала.
Өзіңізді көргенде
Толқымай көңіл тұра ма?
Халықтың сөзін сөйлейін,
Болмасам да ғұлама.
Уа, дариға-ай, дариға-ай!
Жүректі шоқ қариды-ай!
Алты алашта қол бастар,
Абылайдай аға жоқ,
Жауды жасқап, жол бастар
Жәнібектей дара жоқ.
Азған елге Абайдай
Ақыл айтар дана жоқ.
Өтеміз-ау өксумен,
Басқаларға таба боп.
Деп аһ ұрып жүруші-ек
Дене де дерт, сана дерт.
Келдіңіз бе өмірге
Еліңізге пана боп,
Сол жобадан табылса
Бізде арман, нала жоқ.
Уа, дариға-ай, дариға-ай!
Жүректі шоқ қариды-ай!
Сұлтанбысыз, нұрмысыз,
Аман-есен жүрмісіз.
Дұғай сәлем жеткізем,
Сұра елдің тұрмысын.
Қаңқылдайды алдыңда ,
Сыңар қанат бір құсың.
Құқай ойнап төбемде,
Құдай болып тұр мүсін.
Боданы болып бөтеннің,
Жырта-жырта жыртысын,
Күйзелумен үш ғасыр
Күн өткіздім, күйді ішім.
Тек, желтоқсан желінде
Сізді көрдім, Тұңғышым!
Уа, дариға-ай, дариға-ай!
Жүректі шоқ қариды-ай!
Қанды бұғау қақырап,
Қайта оралды Көк туым,
Алыстағы ағайын
Келші деген жетті үнің…
Ақ боз үйдің алдында арнауды тыңдап тұрып, Президент Нұрсұлтан Назарбаев толқыды. Бұған дейінгі талай сапарларда бұл кісі таңданысын да, толқынысын да байқатпайтын. Әлде, табиғатынан, әлде президенттік қызметінен болар, өзін сезім жетегінде жібермейтін. Тұңғиығын тербей білсе, терең де толқиды екен” деп жазыпты. Шынында осы сәтте Нұрағаның көзінен жас ытқығанын мен өз көзіммен көріп, барлығымыз іштей елжіредік. Жүректен шыққан сөз жүрекке жететінін, шынайы сезімнің қанша толқытатынын осы сәтте аңғардық. Нұраға екінші келген сапарында Моңғолия үкімет үйі ішінде бір топ қазақтармен жеке кезігіп, онда тұратын қазақтардың жай-күйін қайта-қайта сұрап, тіршілігімізге, келешек ұрпағымыз өркеніне аса мән бергенін, “Қане айтыңдар, қолдан келген барлық жағдайды жасаймын, сендерді президенттеріңе жекелеп тапсырып та кетемін, енді еш нәрсеге алаң болмайсыңдар, арттарыңда біз бармыз ғой” деген жүрекжарды сөздері күні бүгінге дейін ұмытылмайды. Қазақ елінің, Елбасының қамқорлығына бөленген шетел қазақтары біздер осы елге, Елбасына үнемі еркелеумен келеміз.
Сол күннен бастап Баян-Өлгей қазақтары өгей де, жетім де емес, еліміз, жеріміз, панамыз, еркелейтін, қастерлеп сақтайтын Елбасымыз, жеткізіп өсіретін Қара шаңырағымыз барын тіпті терең түсіндік. Таудың тауға болмаса да, адамның адамға қосылатыны да, ат оралып қазығын табатыны да шындық болды. Ұлы көш әрмен жалғаса беретіні, қазақ өзімен өзі өсіп толғаны, әрмен толатыны да рас. Сол үшін Елбасы Нұрсұлтан Назарбаев Моңғолия қазақтарының тыныс-тіршілігімен жете танысып, ерекше мән беріп, екі ел арасында сайрап жатқан талай жылдар бойы ата-бабаларымыз мал айдап, жүк тасып Шығыс Қазақстанның Катонқарағайы арқылы қатынап тұрған небәрі 57 км. төте жол мәселесін тез арада шешуді, Ресей жерімен өтетін 57 км.-ге дәліз ашып, жол салуды армандаған Баян-Өлгей қазақтарының тілегін осылай мақұлдаған. Бұдан кейін де төте жолды салдыруды министрліктерге тапсыра келіп, егер жол салынса дәліз аштыруды Ресей басшыларымен өзі келісетінін де айтқан. Өткен жылы Ресей президенті Медведевке кезіккен сәтте де Нұрекең осы мәселені есіне алып, Ресей жағынан қарсылық болмайтынын нақтылаған.
Өмір шындығына тоқтасақ, 20 жылда Қазақ елі ғасырлық өркениетке жетіп, ғарыштан бастап әуе ұшақтарын жасаудың бәрін игеріп, тіпті адамның ми тамырларына күрделі операция бүйрек, бауыр, жүрек сияқты органдарды ауыстыра алатын ірі жетістіктерге жетті. Ал Ресеймен келісе отырып ата-бабаларымыз талай жыл жол етіп келген осы бір азғантай жерге жол салу, оны ашу арқылы Елбасы Нұрсұлтан Әбішұлына қуанышты хабар беріп сүйіншісін алу Шығыс Қазақстан облысы әкімдігінің еншісіне қалып тұрғанға ұқсайды. Егер осы жол ашыла қалса Моңғолия жағынан әскери бекет орнатып, кеден құруды өз мойынымызға алар едік. Бас-аяғы 57 км.-ге жол салынса нұр үстіне нұр, екі елдің сауда-экономикалық қатынасын дамытуға, барыс-келіске жағдай жасалар еді.
Баян-Өлгейдің Көкірге деген жерінде бұрын Ресейге мал шығаратын мал базасы болған. Ол жерден малды айдап немесе машиналарға тиеп Семейге әкетіп отырған. Осы Көкіргеден қызыл кезең арқылы Ресейдің Халгута заставасы, одан әрі Ақанаса заставасы жалғасады. Бұл Ақанаса бұрынғы Қазақстанның “Ала алқа” деген өзеннің атымен аталған. Осы Ақанасадан 15 км. жүріп, Қазақстан шекарасы Бұқтырма өзеніне кіреді. Одан әрмен 160 км. жүріп. Катонқарағай орталығына жетеді. Дәлірек айтсақ, Ресей шекарасымен 57 км. жүріп өтеді. Осы жолмен кезінде Қазақстан-Моңғолия тікелей шекараласып, тура байланыс жасап отырған.
Дәл осы жолмен Моңғолия қазақтары 1880-жылдардан бастап Катонқарағай ауданындағы Никольск жәрмеңкесіне жыл сайын желтоқсанда көптеген түйемен келіп, сауда жасап жүк тасымалдаған. Қысқы аязда керуен тартуының мәнісі – суықта түйе зорығып қызыл май болмайды, ширақ жүреді. Міне, осы мәселені Шығыс Қазақстан облысы қолға алса бәрі сәтіне айналатынына сеніп қайта-қайта тоқталып отырған жайымыз бар. Қазақ елі егемендігін алған алғашқы сәттен ерекше қуанған да, келешегін ойлап қобалжыған да шет қазақтары ішінде Баян-Өлгей қазақтары болды.
Бүгінгі таңда Баян-Өлгей аймағы қазақ халқының ана тілі ең таза сақталған, салт-дәстүрі, әдет-ғұрпы, мәдениеті өзінің ежелгі бояуын жоғалтпаған өңірлердің бірі деп Қазақстан Республикасының Президенті, Әлем қазақтары қауымдастығының Төрағасы Н.Ә.Назарбаев Дүниежүзі қазақтарының 2-құрылтайында жасаған баяндамасында баға берген еді. Тіл мен дәстүрдің жақсы сақталу себебі қазақтардың ұлтжандылығы мен намысшылдығына және Моңғол елінің мейірбандығына байланысты болғанымен де атажұрт Қазақстанның, өз қандастарымыздың айрықша ықпал еткендігі де толассыз шындық. Қазақ елі мен Моңғолия арасында осылай төте жол ашылса халқымыз, келешек ұрпағымыз қаншама қиыншылықтан арылар еді. Баян-Өлгейден шыққан көлік Ресей жерімен 1500 км. жерді шамамен екі-үш күн жүріп, жолда көрмегенді көріп, азапты шегіп әрең жетсе, төте жол арқылы небәрі 60 км. жерді екі-ақ сағат жүріп Қазақ елі шекарасына жетері даусыз. Қазіргі кезде бұрынғыға қарағанда екіге бөлінген халық бір-біріне, әсіресе, қыстың аязында торқалы тойға емес, топырақты өлімге барып-келуі көбейіп барады. Оның сыртында екі ел арасында сауда-экономикалық қатынасты дамытатын жаңа кезең ашылмақ.
Үзбен ҚҰРМАНБАЙҰЛЫ, Моңғолия үкіметіне еңбек сіңірген қайраткер.