Үміт оты
Бейсенбі, 29 наурыз 2012 8:01
Алыста жүрген адамға атамекеннен ыстық жер болмайтыны айтпаса да түсінікті. Сонау Қарақалпақстанда тұрып жатқан ерлі-зайыпты Еділ Әйтімбетов пен Қарлыға Әбдіғалиева отбасы төрт баласымен 2004 жылы ата-бабаларының кіндік қаны тамған Ақтөбе өңіріне атбасын бұрып, көш керуенді түзегендеріне қазір еш өкінбейді. Мұғалжар ауданының Ақкемер ауылына табан тіреген олар квота бойынша бөлінген қаржыға үй сатып алып, «көппен көрген ұлы той» дегендей, тіршілікке араласып, елден қалмауға талпынды. Еңбектен бойын аулақ салмайтын ағайындар ауылдастары арасында өнегелі отбасы ретінде тез сіңісіп кетті.
Бейсенбі, 29 наурыз 2012 8:01
Алыста жүрген адамға атамекеннен ыстық жер болмайтыны айтпаса да түсінікті. Сонау Қарақалпақстанда тұрып жатқан ерлі-зайыпты Еділ Әйтімбетов пен Қарлыға Әбдіғалиева отбасы төрт баласымен 2004 жылы ата-бабаларының кіндік қаны тамған Ақтөбе өңіріне атбасын бұрып, көш керуенді түзегендеріне қазір еш өкінбейді. Мұғалжар ауданының Ақкемер ауылына табан тіреген олар квота бойынша бөлінген қаржыға үй сатып алып, «көппен көрген ұлы той» дегендей, тіршілікке араласып, елден қалмауға талпынды. Еңбектен бойын аулақ салмайтын ағайындар ауылдастары арасында өнегелі отбасы ретінде тез сіңісіп кетті.
Балалары да тәртіпті болып өсіп, өз өмір жолдарын таба бастады. Балалары «екі қолға, бір күрек» дегендей, жұмысқа орналасты, еңбекке араласты, ұлы үйленді, қызы тұрмыс құрды. Ғалымы да аға-апасының ізін қуып, өмірден өз орнын табуға ұмтылды. Өзі қолға алған ісін аяғына дейін жеткізгенше тыным таппайтын еңбекқор. Облыс орталығындағы «Рауан» колледжін кеден ісі мамандығы бойынша бітірген ол екі жылдай «ИМК Секьюрити» ЖШС-інде күзетші болып жұмыс істеді. Арасында облыс орталығындағы жиһаз жинау цехында жұмыс істеп, ағаш шеберлігіне де төселіп алды. Сөйтіп, жиһаз жасаудың қыр-сырын игерді. Біреуге тәуелді болғанша ауылға барып, өз ісімді неге ашпасқа деген ой келді қаперіне. Нартәуекел деп 2007 жылы сәуір айында «Әйтімбетов.Ғ.Е.» жеке кәсіпорнын ашып, тіркеуден өткізді. Құрал-жабдығын түгендеп, қажетті материалды Ақтөбе қаласынан жеткізуге тура келді. Ол үшін әрине, көлік керек болды. Жас кәсіпкер тәуекелге барып, БТА банктің облыстық филиалынан 600 мың теңге несие алып, жиһаз құрастыру станогын, «ГАЗель» қорапты автокөлігін сатып алды. Жиһазды басында ыңғайластырылған орындарда жинады. Өз қолынан шыққан жиһазға тапсырыс көбейе түскенін аңғарған Ғалым арнайы цех салуды ойластырды.
«Құланның қасуына, мылтықтың басуы» дегендей, осы кезде Мұғалжар өңірінде қара алтын өндірумен айналысатын Ресейдің «Лукойл» компаниясы өңірдегі ауылдарда өз ісін ашуға үміткерлерге «Арай» арнаулы бағдарламасын жүзеге асыруға кірісті. Бір ерекшелігі, бұл бағдарлама бойынша бөлінетін грант өтемсіз тегін берілетін еді. Кәсіпкер жігіт өз бизнес-жобасын жасап, грантқа ілікті. Грант бойынша қолына тиген 1 миллион теңгеге тым-тәуір жиһаз жинау цехын салып алды. Ғалымның қолынан шыққан жиһаздардың дүкендердегіден артық болмаса, кем түспейтінін аңғарған ауылдастары ат сабылтып, Ақтөбеге барып, жиһаз әкелуді қойды. Осында тапсырыс беріп, кіреберіске, ас үйлік жиһаздарды, компьютер үстелі және басқа жиһаздарды жақын жерден үйлеріне кіргізе қоюға дағдыланды. Көрші ауылдардан да келіп, алып жатады. Бір сөзбен айтқанда, Ғалымның ісі жүрді, енді өндірісті кеңейтуге тура келді. Былтыр ол «Жұмыспен қамту-2020» бағдарламасы бойынша «Бизнес-Навигатор» кәсіпкерлік орталығында білімін көтеріп, арнайы курстан өтті. Оқуы, жатар орны мен жолын Үкімет көтерді. Қолына арнайы сертификатпен бірге, осы бағдарламаның екінші бағыты бойынша 1 миллион теңге несиесі де тиді. Жиһаз жинаушы кәсіпкер бұл қаржыға қосымша материал сатып алып, өндірісін кеңейті. Қазір осы шағын жиһаз цехында өзі мен інісі Нұрымнан басқа екі ауылдасы Кенен Байсұлтанов, Жаңалық Аймағамбетов еңбек етеді. Айлықтары да жаман емес, 40-50 мыңнан айналады. Болашақта жұмысқа тағы да бір-екі ауылдасын тартуды көздеуде.
– Қашанда жаңадан іс бастау оңай емес. Мен бұл шаруаға он ойланып, мың толғанып барып кірістім. Сондай-ақ, маған ата-анам, бауырларымның қолдау көрсетуі де күш берді. Елбасы Нұрсұлтан Назарбаевтың әлеуметтік бағдар ұстанған сара саясатының арқасында қолға алған ісімізден берекет таптық десем артық айтқандық болмас. Кәсіпкерлікті, соның ішінде ауылда шағын және орта бизнесті дамытуға бағытталған бағдарламалардың тиімділігі сөзсіз. Мұндай мүмкіндікті жалқау, енжар адам ғана пайдаланбайды. «Қолымызға қармақ берді», соның игілігін көру әркімнің өз ынта-ықыласына байланысты. Біз көптеген тұрмысқа қажетті жиһаздар құрастырып, шығаруды жолға қойдық. Біздің жиһаздарымыз фирмалық өнімдерден кем түспейді, есесіне арзан, тасымалға да шығынданып жатпайды. Сондықтан болар сұраныс жоғары, оның үстіне біз тұтынушының тапсырысы бойынша өздерінің талғамына сай етіп дайындаймыз. Жиһаздарды сол үйдің алаңына сай келетіндей етіп, тұтынушымен келісе отырып жасаймыз. Бұл да тұтынушылар көңілінен шығып тұр, – деді ақкемерлік кәсіпкер жігіт Ғалым Әйтімбетов бізбен әңгімесінде.
Кәсіпкер жігіттің әңгіме ауанынан аңғарғанымыз ісі оңға басып, ілгері күнге үлкен үмітпен қарап отыр. Қазір банктен алған несиелерін біртіндеп қайтара бастапты. Болашақта диван, кресло сияқты жұмсақ жиһаз шығаруды да ойластыруда. Жалпы, Ғалым Әйтімбетов «Тәуекел түбі, жел қайық» деп бастаған ісінің жүргені тек өзінің еңбекқорлығының ғана емес, шағын кәсіпкерлікті дамыту бағытында елімізде кабылданған бағдарламаларда қарастырылған жеңілдіктер мен Елбасының сара саясатының арқасында мүмкін болғанын ағынан жарыла жеткізді. Өз бойына ертеңгі күнге деген сенімділік ұялатқанын тілге тиек етті.
Сатыбалды СӘУІРБАЙ.
Ақтөбе облысы.
