Игорь ВОРОТНИКОВ: «Біздің енді туыстарымыз бар. Олар – Жәнібек пен Евгений»
Сенбі, 1 қыркүйек 2012 8:05
Денсаулық сақтау министрі Салидат Қайырбекова Игорь Воротниковты «Алтын жүрек» сыйлығымен марапаттау туралы ұсыныс айтқанын Tengrinews.kz сайты хабарлайды. Алматыда өткен селекторлық жиында Денсаулық сақтау министрі осы сыйлыққа бірден-бір лайық жан осы Игорь екенін айтқан.
Сенбі, 1 қыркүйек 2012 8:05
Денсаулық сақтау министрі Салидат Қайырбекова Игорь Воротниковты «Алтын жүрек» сыйлығымен марапаттау туралы ұсыныс айтқанын Tengrinews.kz сайты хабарлайды. Алматыда өткен селекторлық жиында Денсаулық сақтау министрі осы сыйлыққа бірден-бір лайық жан осы Игорь екенін айтқан.
Игорь Воротниковтың есімін тіпті осыдан бірер ай бұрын көпшілік қауым білмейтін де еді. Қайтыс болған анасының жүрегі мен бауырын өзге адамдардың өмірін сақтап қалу мақсатында трансплантациялауға келіскен үлкен азаматтығы үшін, міне, бүгінгі күні арамызда оның аты-жөнін білмейтін адамдар кемде-кем. Оған қоса Игорьдің анасының жүрегін иемденген Жәнібек Оспанов, кеудесінде оның анасының бауыры қызмет атқарып тұрған Евгений Курц те қоғамдық пікірді дүр сілкіндірді.
«Жәнібектің жаңа жүрегі…» деп бұл туралы 30 тамызда біздің газет те үн қатты. Өйткені, біздің елімізде бауырға бірен-саран оталар жасалып жүргені болмаса, жүрекке алғаш рет трансплантация жасалған еді. Онда да трансплантация үшін науқас азаматтарға туыстарының не жақындарының емес, тіпті өмірінде ешқашан да көрмеген, білмеген бейтаныс орыс әйелінің ішкі ағзалары алынды. Елордадағы Жедел жәрдем медициналық ғылыми орталығында миына қан құйылып қайтыс болды делінген Воротникованың ұлы Игорь бұған жылап тұрып келісім берген.
Жуырда ғана журналистермен болған кездесуде Игорь: – Менің анам о дүниелік болғанымен, оның жүрегі баяғыдай соғып тұр. Сондай-ақ, ол жүрек басқа өмірге арашашы болды. Әрине маған бұл туралы ұсыныс айтқан кезде қатты қамығып, өз-өзіме келе алмадым. Сосын «сен ол адамдармен араласасың» деді. Анамыз қайтыс болғанда қарындасым екеуміз жапанда жалғыз қалғандай күй кештік. Міне, енді біздің туыстарымыз бар. Олар – Жәнібек пен Евгений, – деді.
Ал бұл жиында жаңа ағзаларды иеленген Жәнібек пен Евгений де Игорьға, отаны жасаған азаматтарға, орталықтың мамандарына алғыс айтқан болатын.
Бұл оталардың басы-қасында Кардиохирургия ұлттық ғылыми орталығының басқарма бастығы, елдегі жетекші кардиохирург Юрий Пя бар екенін де естеріңізге салғымыз келеді. Ол өзінің чех әріптесі Жан Пиркпен, сондай-ақ орталықтың басқа да білікті мамандарымен бірге аталмыш отаны сәтті жүзеге асырды.
Өзге дамыған елдердің барлығында трансплантацияға, донорлыққа қалыптасқан түсінікпен қарайды. Себебі, ол елдерде бұл мәселе баяғыда-ақ талқылаудан өтіп кеткен. Жаңалық болудан қалған. Өзге адамдардың өміріне арашашы болғысы келетіндер ажалы жетпей тұрып, медициналық орталықтарға тіркеліп қояды, яғни, өз еркімен донор болады. Ал, тіркелмесе де оны күштеп жатқан ешкім жоқ. Яғни, донор болу-болмау оның еркіндегі нәрсе. Бірақ, бір ғана мысал келтірейік. АҚШ-та көлік жүргізушілердің куәлігіне егер ол өз еркімен донор болуға келіскен болса, донор екендігі жазылған белгі болады екен.
Әрине, бұл оқиға отандық медицинадағы үлкен жаңалық. Яғни, тұңғыш рет жүрекке трансплантация жасалып жатыр. Ал, бұның екінші маңызды қыры да бар. Игорь ұлты орыс болғанымен, Жәнібекті жатсынбай, бауыр тартып, оған өмірдегі ең бір қимасының жүрегін салуға өз еркімен келісімін берді. Осы бір аса күрделі, қиын операцияны хирургтердің интернационалдық бригадасы мүлтіксіз жүзеге асырды. Бұл біздің біртұтас, тату-тәтті елімізде ұлттар арасында шынайы татулық, достық сезімдерінің іргетасы берік, қарапайым өмірде бір атаның балаларындай екенін және қандай қиын жағдайда да бірге болатын жағдайдың қалыптасқанын көрсететін оқиға.
Айгүл СЕЙІЛОВА,
«Егемен Қазақстан».
