Қазақстан Құрама Штаттардың шешуші одақтасына айналды
Сейсенбі, 13 наурыз 2012 8:35
Жақында АҚШ Конгресінің Халықаралық қатынастар жөніндегі комитетінің Еуропа және Еуразия елдері бойынша шағын комитетінің төрағасы Дэн Бертон Қазақстан Республикасы Тәуелсіздігінің және екіжақты қарым-қатынастардың 20 жылдығына орай ресми мәлімдеме жасады. Онда ықпалды америкалық конгрессмен екіжақты стратегиялық әріптестіктің жоғары рухын атап көрсете келіп, Қазақстанның өңірдегі көшбасшылық рөліне, еліміздің ядролық қарусыздану және таратпау үдерістеріне қосып келе жатқан үлесіне, тағы басқа маңызды мәселелерге жан-жақты тоқталады.
Сейсенбі, 13 наурыз 2012 8:35
Жақында АҚШ Конгресінің Халықаралық қатынастар жөніндегі комитетінің Еуропа және Еуразия елдері бойынша шағын комитетінің төрағасы Дэн Бертон Қазақстан Республикасы Тәуелсіздігінің және екіжақты қарым-қатынастардың 20 жылдығына орай ресми мәлімдеме жасады. Онда ықпалды америкалық конгрессмен екіжақты стратегиялық әріптестіктің жоғары рухын атап көрсете келіп, Қазақстанның өңірдегі көшбасшылық рөліне, еліміздің ядролық қарусыздану және таратпау үдерістеріне қосып келе жатқан үлесіне, тағы басқа маңызды мәселелерге жан-жақты тоқталады.
Төменде америкалық конгрессмен ресми мәлімдемесінің мәтіні жарияланып отыр.
Мен қазақстандықтарды ел Тәуелсіздігінің 20 жылдығымен құттықтаймын. 1991 жылдың 25 желтоқсанында Құрама Штаттар Қазақстанды тәуелсіз мемлекет ретінде таныды. Екі онжылдық өткен кезде Қазақстан АҚШ-тың маңызды әріптесі және Орталық Азиядағы көшбасшы мемлекетке айналды.
Кеңес Одағы кезінде қазақ даласы КСРО-ның басты сынақ полигоны және әскери ядролық бағдарламалар жасайтын орын ретінде пайдаланылды. КСРО ыдырағаннан кейін Қазақстан 1000-нан асатын ядролық оқтұмсықтары бар орасан ядролық арсеналға ие болып қалды. Арсенал құрамында сондай-ақ құрлықаралық баллистикалық зымырандар мен стратегиялық бомбалаушы ұшақтар болды. Осы орасан ядролық қарудың нәтижесінде Қазақстан қуаты жөнінен әлемдегі 4-ші ядролық державаға айналды.
Қазақ халқы бұл қарудың қиратушы күшін өзінің жанымен және тәнімен айқын сезінді. Өйткені, қазақ даласында 500-ден астам ядролық сынақтар жасалды. Бірақ Қазақстан Президент Назарбаевтың басшылығымен өзінің ядролық арсеналынан өз еркімен бас тартқан жұмыр жердегі алғашқы ел атанды. Кейін, 1994 жылы ел Ядролық қаруды таратпау туралы шартқа қол қойып, оны ратификациялады. 1995 жылға қарай Қазақстан соңғы ядролық зарядын Құрама Штаттардың айтарлықтай қолдауымен және Қатерлерді бірлесіп қысқарту бағдарламасы аясында Ресейге өткізіп берді. Қазақстан мен АҚШ аталған бағдарлама аясындағы ынтымақтастығын жалғастырып келеді. Тәуелсіздігінің 20 жылдығында Қазақстан таратпау жөніндегі көшбасшы және өзге елдерге үлгі болып қалып отыр. Бұл – өсіп-өркендеу үшін ядролық қару қажет емес екендігінің айқын айғағы.
Тәуелсіздігін алған сәттен бастап Қазақстан өз экономикасын реформалау жөніндегі жұмыстарын бастап, кеңестік жоспарлы ойлаудан нарықтық механизмдерге көшті. Бүгінде Қазақстан өңірдегі ең дамыған экономикаға ие. Елдің әлемдік рынокқа тұрақтандырушы ықпал ететін энергетикалық хаб болу әлеуеті бар. Бұған қоса, Үкіметтің Ұлттық қор құру туралы шешімі Қазақстанның минералдық байлығын бүкіл ел халқының игілігіне айналдыратын болады.
Табиғи байлықтары молдығына қарамастан, Қазақстан өзінің экономикасын әртараптандыруға ұмтылыс танытып отырса, нәтижесінде Бүкіләлемдік сауда ұйымына қосылуда айтарлықтай прогреске қол жеткізді. Бұл прогреске жақында Қазақстан мен Құрама Штаттар арасында БСҰ бойынша екі жақты келіссөздердің аяқталуы туралы хаттамаға қол қойылуы айғақ бола алады. Аталған келісім америкалық қызмет көрсетушілерге көбірек тиімділік әкеліп, Қазақстан БСҰ-ға өткеннен кейін олардың Қазақстан рыногындағы мүмкіндіктерін айтарлықтай кеңейтеді. БСҰ-ға мүшелік Қазақстан үшін, сондай-ақ осы тез дамып отырған рынок өзіне барынша көп тарта бастаған ірі америкалық компаниялар үшін де тиімді.
2001 жылдың 11 қыркүйегіне бірнеше ай қалғанда Президент Назарбаев Ауғанстандағы ахуал өңірлік қауіпсіздікке қатер төндіріп отырғанын айтып, алаңдаушылық білдірген болатын. Құрама Штаттардағы терактілерден кейін Қазақстан өзінің әуе кеңістігін ашып, Ауғанстандағы коалицияға қолдау көрсете бастады. 2009 жылдан бастап Қазақстанның темір жол инфрақұрылымы Солтүстік тарату желісінің шешуші буыны бола отырып, Ауғанстанға қажетті жеткізілімдердің барынша маңызды маршрутына айналды. Қазақстан әскери операцияларға қолдау көрсетумен қатар, Ауғанстанды басқа да бірқатар бағыттар бойынша дамытуға ықпал етуін жалғастырып келеді. Бұл өзгесін айтпағанда, ауғандық студенттерге Қазақстан университеттерінде оқу үшін стипендиялар тағайындаудан көрінеді.
Ядролық қарудан бас тарту, экономикалық реформалар жүргізу және Ауғанстандағы коалициялық операцияларды қолдау саясаты нәтижесінде Қазақстан тұрақтылықтың тініне, сондай-ақ Орталық Азия дамуының локомотивіне айналды. Мұндай көшбасшылық Еуропадағы қауіпсіздік және ынтымақтастық ұйымының (ЕҚЫҰ) 2010 жылы ұйымға төрағалық ету мүмкіндігін беру жөніндегі шешімімен мойындалды.
Мен Президент Назарбаев пен Қазақстан халқын еркін баспасөзді, тәуелсіз сот билігін, қуатты азаматтық қоғам мен мөлдір саяси жүйені қоса алғанда, осындай берік іргетасқа негізделген демократиялық реформаларды жүргізуді белсенді жалғастыруға құрметпен шақырамын. Демократиялық даму Қазақстан халқына пайда әкеліп қана қоймай, сондай-ақ Қазақстанның Орталық Азия мен әлемдік аренадағы көшбасшылық рөлін сақтап, нығайта түсуге қызмет ететін болады.
Соңғы 20 жылда Қазақстан Құрама Штаттардың шешуші одақтасына айналды. Қазақстанның одан арғы дамуына орай біз әрі қарай да маңызды қарым-қатынасымызды нығайта беруге тиіспіз. Мен Президент Назарбаев пен Қазақстан халқын Қазақстан Республикасы Тәуелсіздігінің 20 жылдығымен құттықтаймын.