Дүбірге толы дүние
Жұма, 30 наурыз 2012 7:18
ЖАУАПКЕРШІЛІКТІ АРҚАЛАУҒА КІМ ЛАЙЫҚ?
22 сәуір күні Францияда президенттік сайлау өтеді. Оны көп адамның әлемдік мәні бар оқиға ретінде қабылдайтыны да заңды. Франция – Еуропада ғана емес, әлемдегі тұлғалы ел. Оны кім басқаратыны сондықтан да айрықша маңызды.
Енді сол Франциядай тұлғалы елдің билік тізгінін кім ұстайды, Саркози, болмаса оның орнына келген басқа адам өз мойнына Еуропа үшін, әлем үшін жауапкершілікті ала ала ма деген сұрақ біраз адамның көңілінде жүретіні анық.
Жұма, 30 наурыз 2012 7:18
ЖАУАПКЕРШІЛІКТІ АРҚАЛАУҒА КІМ ЛАЙЫҚ?
22 сәуір күні Францияда президенттік сайлау өтеді. Оны көп адамның әлемдік мәні бар оқиға ретінде қабылдайтыны да заңды. Франция – Еуропада ғана емес, әлемдегі тұлғалы ел. Оны кім басқаратыны сондықтан да айрықша маңызды.
Енді сол Франциядай тұлғалы елдің билік тізгінін кім ұстайды, Саркози, болмаса оның орнына келген басқа адам өз мойнына Еуропа үшін, әлем үшін жауапкершілікті ала ала ма деген сұрақ біраз адамның көңілінде жүретіні анық.
Жақында Францияның Конституциялық кеңесі алдағы президенттік сайлауға қатысатын 10 адамның тізімін жариялады. Ал үміткерлер әжептәуір көп болған. Дені електен өте алмады. Елек дегенде, бұл елде басқа жердегідей сайлаушылардың қолын емес, «халық қалаулыларының» – мэрлердің, муниципалдық кеңестер, парламент депутаттарының, сенаторлардың қолдарын жинайды. Олардың саны 500-ден асуы тиіс. Алдын ала қимылдамаса, оның оңай бола қоймайтыны анық. Белгілі әсіре оңшыл «Халық майданы» партиясының көсемі Марин Ле Пен тек соңғы сәтте ғана әзер қол жинап үлгерген. Ал бұрынғы премьер-министр Доминик де Вильпен қажетті қол жинай алмай, күрестен сырт қалды.
Үміткер онның басында қазіргі президент Николя Саркози тұр. Ол өзі біразға дейін сайлауға түсетінін мәлімдемей, кейінірек жариялады. Мұны тактикалық қадам десе де болады. Әйтпесе, жұрттың көңілінде жүрген миграция сияқты мәселелерді қозғап, дауыс жинауға көптен-ақ кіріскен. Тіпті елдегі армяндардың дауысы үшін геноцид мәселесін көтеріп, Түркиямен кикілжіңге де барғаны жұртқа белгілі.
Сайлау алдындағы қоғамдық сауалдамаға қарағанда, алғашқы турда ешкім 50 пайыздық биіктен өте алмайды, ал 6 мамырдағы екінші турға Николя Саркози мен социалист Франсуа Олланд өтсе керек. Соңғы кездегі сауалдамаға сенсек, социалистің артықшылығы барған сайын төмендеп келеді. Сайлау кезінде ол мықтап өзгеруі мүмкін.
Көп саясаткер бұл сайлауға жеңістен бұрын бедел үшін барады. Президенттіктен үміткер болғанның өзі не тұрады! Ал алғашқы үштікке, бестікке ілініп жатса, ол үлкен абырой. Сауалдаманың нәтижесінде әзірге үштікте жүрген Марин Ле Пеннің көңілі одан әлдеқайда жоғары. Бірақ басыңнан биік секіре алмайсың деген бар. Өткен сайлауда алғашқы турда үшінші орынға шығып, біраз жұртты таңдандырған центрист Франсуа Байру биыл одан көп төмен. Үміткерлер ішінде солшылдар баршылық. Олландқа тиетін дауыстың біразын «Солшыл майданның» көсемі Жан-Люк Меланшон алмақ. Оған коммунистер дауыстарын беруге уәде етіп отыр. «Жасылдардың» ұранын көтерген бұрынғы судья Ева Жолидің азын-аулақ өз сайлаушылары бар. Әсіре солшыл «Жаңа антикапиталистік партияның» көсемі Филипп Путуды қолдаушылар көп бола қоймас.
Сайланар-сайланбас, күреске қосылуды француздар парыз санайды. Сонысымен де бұл елдегі сайлау халықтың көңіл күйін аңғартады, өздеріне қоғамның назарын аудартады, ел ішіндегі саяси күштердің ара салмағын көрсетеді. Бұл жеңгенге де, жеңілгендерге де керек.
ШАҒЫН ЕЛДЕ БИЛІККЕ ЖЕТУ КҮРДЕЛІРЕК
Оңтүстік Осетияны Франциямен салыстыру қиын. Бірі – шағын, бірі – алып. Бірақ билік үшін күрес бірінде оңай, бірінде қиын деп айта алмайсың. Қайта Оңтүстік Осетиядағы президенттік сайлауға қарап, шағын елде ол күштірек болады-ау деген ой келеді.
Міне, әлі тәуелсіздігін басқа жұрт тани қоймаған Оңтүстік Осетиядағы президенттік сайлаудың науқаны жүргеніне жарты жылдай болды, бірақ президенттерін сайлай алмай отыр. Өткен күздегі сайлауда оппозиция өкілі Алла Джиоева жеңіске жеткенімен, ішкі-сыртқы күштердің қысымымен елдің Жоғарғы соты сайлауды заңсыз деп тауып, жаңа сайлауды 25 наурызға белгілеген. Бұл жолы да алғашқы турда ешкім жеңіске жете алмады. Екінші тур – 8 сәуірде.
Шағын елде сайлау күрделілеу болады деген пікірдің де жаны бар. Мұнда халық үміткерлерді жақсы таниды. Сөзіне қарай емес, ісіне қарай біледі. Оңтүстік Осетиядағы бұл сайлауда дауыс беретіндер саны 30-ақ мың. Сонша бюллетень таратылыпты. Сонда бұл елдің халқының саны 50 мыңның төңірегінде. Бір-бірін жүзіне қарап та таниды десе де болғандай. Сондықтан да дауыс бергенде, жұрт сөзге еріп емес, өз жүректерінің қалауын білдіреді.
Өткен жолғы сайлауда халық Анатолий Бибиловты қаламады, көпшілігі Алла Джиоеваға дауыс берді. Бұл сайлауға төрт адам түсті: республика МҚК бұрынғы төрағасы Леонид Тибилов, адам құқы жөніндегі өкіл Давид Санакоев, Оңтүстік Осетияның Ресейдегі елшісі Дмитрий Медоев және компартия көсемі Станислав Кочуев.
Екінші турға көбірек дауыс жинаған 60 жастағы Тибилов (42,48 пайыз) пен 35 жастағы Санакоев (24,58 пайыз) шықты. Дауыс айырмашылығы өте үлкен көрінгенмен, алда жеңілгендердің есебінен мықтап өзгеруі әбден мүмкін. Алғашқы турдың барысында Тибиловпен біраз жағаласқан Медоев өз сайлаушыларын (23,79 пайыз) Санакоевке дауыс беруге шақырып отыр. Демек, күрес қызуы жоғары болмақ.
Үміткерлер сайлаушылардың ықыласын аудару үшін барлық жолды пайдаланбақ. Өз бағдарламасын баяндаумен қатар, қарсыласын жамандауға да сөз таңдамайтын түрі бар. Бұл екінші тур алдында тіпті күшеймек. Бұл ретте бұрынғы биліктің шоқпарын соққан Тибиловке біраз кінә тағылар. Санакоев – таза. Алғашқы сайлауда жеңіске жеткен Алла Джиоеваны да олар ұмытпаған – өздері жеңсе, оған лайықты қызмет ұсынбақ. Бұл да біраз сайлаушыларға ұнайды.
Ал бағдарлама дегенде, онда үміткерлердің қай-қайсысы да бірінші кезекте Ресеймен қарым-қатынасқа тоқталады. Бұл енді Оңтүстік Осетия үшін шешуші мәселе. Ел бюджетінің 90 пайызы Ресей көмегінен тұрады. Ресейдің әскерінсіз күндері жоқ. Сыртқы саясатын да Ресей арқылы жүргізеді.
Енді бір аптадан кейін кезінде Грузияның құрамында болған осынау шап-шағын елдің билік тізгінін Леонид Тибилов пен Давид Санакоевтің біреуі ұстайды. Одан саясат өзгере қоймас. Бұл елдің Грузияға қайта қосылмасы да белгілі. Ресейдің беделін көтерері де шамалы. Сөйтсе де оларды асырауға мәжбүр. Онсыз бұлар күндерін көре алмайды.
Мамадияр ЖАҚЫП.