Дүбірге толы дүние
Жұма, 6 сәуір 2012 7:52
Одақ басқаға қарсылық үшін құрылмаса жөн
Жақында ғана BRICS елдері басшыларының төртінші саммиті өтіп, ол сарапшылар талдауларының арқауына айналды. Олардың пікірінше, әлемдегі жетекші елдердің арасындағы қарым-қатынас біршама шиеленісе түскендей.
Алдымен бұл ұйымның атауына тоқтала кеткен жөн. Ол алғашында орысша БРИК (Бразилия, Ресей, Үндістан және Қытай) аталған. Оған былтыр Оңтүстік Африка Республикасы қосылғаннан кейін (БРИКЮ) қиынға соқты да, ағылшынша BRICS атауына тоқталған.
Жұма, 6 сәуір 2012 7:52
Одақ басқаға қарсылық үшін құрылмаса жөн
Жақында ғана BRICS елдері басшыларының төртінші саммиті өтіп, ол сарапшылар талдауларының арқауына айналды. Олардың пікірінше, әлемдегі жетекші елдердің арасындағы қарым-қатынас біршама шиеленісе түскендей.
Алдымен бұл ұйымның атауына тоқтала кеткен жөн. Ол алғашында орысша БРИК (Бразилия, Ресей, Үндістан және Қытай) аталған. Оған былтыр Оңтүстік Африка Республикасы қосылғаннан кейін (БРИКЮ) қиынға соқты да, ағылшынша BRICS атауына тоқталған.
Ұйымға кірген елдердің әлеуеті өте жоғары. Бес-ақ ел, олардың үлесіне бүкіл Жер шары аумағының 30 пайызы тиеді. Ал халық саны тіпті зор – әлем халқының 42 пайызы. Рас, экономикалық көрсеткіштері төмендеу, әлемдік ІЖӨ-нің 18 пайызын өндірсе, әлемдік сауданың 15 пайызы осы елдердің үлесінде. Жер көлемі, ондағы байлық, ең бастысы – адам капиталы ұйымның жарқын болашағындай, өрлеу, өркендеудің қайнар көзіндей.
Бұл ұйымның мақсат-мүддесін ашық сипаттау оңай болғанымен, көзге көрінбейтін ағысы барлығы да шындық. Осынау әлеуеті жоғары елдер ортақ мәселелерді бірлесе шеше отырып, жоғары қарқынмен дамуды көздейді десек, онда ешқандай қайшылық жоқ. Сөйтсе де, бұл ұйымның пайда болуына да АҚШ бастаған жоғары дамыған «Үлкен жетілік» елдерімен бәсекенің ықпалы күшті болды. Сол мықтылар қатарына Ресей баса-көктеп қосылып, оны «Үлкен сегіздікке» айналдырса да, Мәскеу онда жөнді жайғаса алмады. Оның сөзін ешкім тыңдамады деу артық болар, оның бастамашы болғысы келген кейбір істерін басқалар мойындай қоймады. Сонда ол өзі мүше болып отырған «сегіздікке» бәсеке болғандай ұйым құруға ұйытқы болуға кірісті.
Иә, БРИК-тің дүниеге келуінің басында Ресей тұрды. Бұл алып елдердің басын құраған ұйымның беделін көтере қойған жоқ. Басқаларға жол көрсеткендей үлкен қабілет бұл елде тапшы. Оның экономикасы негізінен шикізатты экспорттауға негізделген, әлемдік үрдісте Ресей моделі өте әлсіз. Бұл әлсіздік жалпы ұжымның да сипатын аңғартады.
Дәл қазір бұл ұйымның басты тірегі – Қытай. Және ол өзінің жетекші орнын басқаға бере қоймайды. BRICS-тің болашағын да жұрт Қытаймен байланыстырады. Қытай тауары, әсіресе, Еуропа елдерінде, АҚШ-та өтімді болса, бұл ұйымның да беделі сақталады.
Бұл ұйымға мүше елдердің барлығы да «Жиырманың тобына» кіреді. Соған қарамай, өздерінің саммиттерінде көбіне өздерінің мүдделерін сол «Жиырманың» мүддесінен бөліп қарайтыны бар. Ол соңғы Нью-Делиде өткен саммитте де айқын аңғарылды. Онда халықаралық қаржы институттарын, ең алдымен Халықаралық валюта қорын реформалау қажеттігі айтылса, ол BRICS-тің мүддесіне сай болуға тиіс деген пікір басым болды.
Сол саммитте доллар мен еуроның жолын кесу, өзара есептесуде ұлттық валюталарын қолдану да көп сөз болды. Әрине, өз валюталарының беделін көтеруге ұмтылысты құптағанмен, халықаралық экономикалық байланыста екінші жақтың мүмкіндігін шектеуді мақсатқа айналдыру жақсылыққа апара қоймайды.
Қандай одақ, ұйым оған мүше елдердің жолын кеңейтуге, басқалармен байланысын күшейтуге бағытталса ғана жақсылыққа бастайды. BRICS те Еуроодақ, «Үлкен сегіздік» сияқты құрылымдармен, әлемдегі жетекші елдермен байланыстарын кеңейтуді көздесе ләзім. Ал қалайда оларға қарсы әрекеттерді мақсат тұтар болса, бұл ұйымның болашағы күмәнді.
Мьянмадағы жаңа дәуірдің басы
Соңғы кездерде әлемдік ақпарат құралдарының басты тақырыбының бірі Мьянмадағы қосымша сайлауда демократтардың жеңісі болды. Әсіресе, телеарналарда ел астанасы көшесіндегі қаранөпір халықтыңқұрметіне бөленген оппозиция жетекшісі, Нобель сыйлығыныңлауреаты Аун Сан Су Чжи қайта-қайта көрсетіліп жатты. Халыққуанышында шек жоқтай.
Нақтылап айтқанда, Демократия жолындағы ұлттық лига мен оның көсемі Аун Сан Су Чжидің парламенттегі жеңісі тым үлкен де емес еді. Осы қосымша сайлау арқасында 440 орындық парламентте олар бар-жоғы 40-ақ орын алып отыр. Әңгіме басқада: демократтар күресуге мүмкіндік алды, алғашқы жеңіске жетті.
Жалпы, бұл елде әскери хунта жарты ғасыр бойы, 1962 жылдан билік басында. Тек былтырғы наурызда ғана олар билікті азаматтық қоғамға берген болды, бірақ онда да өз ықпалындағы «Ынтымақ пен даму жолындағы одақ» партиясын таңдаған. Бәрібір әскерилердің елдегі ықпалы күшті. Басқасын былай қойғанда, парламенттегі 110 орын әскерилердікі.
Дегенде, әскерилердің, олардың басшысы генералиссимус Тан Швенің, сондай-ақ олардың ықпалындағы саяси күштердің елдегі саяси жағдайды бағалай білгендігін атап өткен жөн шығар. Елді тұйыққа тіреген әскери хунтаны ақтағалы отырған жоқпыз. Жарты ғасырлық диктатураны айыптайтын айғақ жетіп артылады. Соңына дейін биліктен айырылмаймыз деп қасарысар болса, ол сөзсіз «араб революциясы» жағдайына апарып соқтырар еді, қан төгілер еді. Олар белгілі дәрежеде бітім, келісім жолдарына жүгінді.
Билікке келген азаматтық үкімет те енді демократиялық талаптарға құлақ асуға мәжбүр. Бұл ең алдымен Еуроодақ пен АҚШ-тың санкцияларынан құтылудың да жолы. Тек Қытай экономикасына ғана тәуелді болу бұл елді тұйыққа тіреді. Сонан соң әлемдегі саяси жағдайдан хабардар халықтың шыдамы да шегіне жетіп отыр. Соның алдын алудың бір жолы қосымша парламенттік сайлауға оппозицияны шақыру еді.
Иә, бұл үлкен парламент сайлауы емес, биліктегі партияның біраз мүшелері үкімет құрамына, яғни министр және сондай дәрежедегі қызметтерге тағайындалуына байланысты 48 депутаттық орын босап, соған сайлау өткен. Сол 48 орынның 40-ын оппозиция өкілдері жеңіп алды!
Бұдан жұрт үлкен қорытынды жасап отыр. Бұл қосымша сайлау емес, нағыз парламенттік сайлау болғанда да 20 жыл бойы үйқамақта отырған Аун Сан Су Чжи бастаған оппозиция сөзсіз жеңіске жетер еді дегенді айтады. Биліктегілер де, парламенттегі айқын басымдығына қарамай, елде жаңа жағдай қалыптасқанын іштей мойындағандай. Көшені кернеген халық шеруінің дүмпуі еріксіз мойындатқандай. Ал оппозиция жаңа дәуір басталғанын ұран етіп көтеріп, халықтың қолдауын айқын сезініп отыр.
Бұл жеңістің жаңғырығы халықаралық ауқымда да айқын естілді. Еуроодақ өкілі Дэвид Липман: «Мьянмадағы осынау мүмкін еместей өзгерістерді қолдайтын боламыз», деп мәлімдеп үлгерді. Ал күні кеше саммитке жиналған АСЕАН елдерінің басшылары Еуроодақ пен АҚШ-қа Мьянмаға жасалған санкцияларды тоқтатуға шақырды.
Әскери биліктің жосықсыз саясатының салдарынан 50 миллион халқы бар Мьянма өзінің тағдырлас көрші елдерінен даму жолында көш кейін қалып қойды. Ерекше ел Сингапурды айтпағанда, Малайзия, Таиланд, Индонезиямен салыстырғанда, Мьянмадағы жағдай өте төмен. Ол әлемдегі ең кедей елдердің сапында. Халықтың тұрмыс жағдайы жөнінде 132-ші орында. Елдің еңсесін көтеру үшін батыл саяси да, экономикалық та реформа керек. Осындай ұран көтерген оппозицияны халық қолдап отыр.
Мамадияр ЖАҚЫП.