Жекелеген жағдайлардың сайлау нәтижесіне әсері жоқ
Сейсенбі, 17 қаңтар 2012 7:47
Конституцияға және Елбасының тапсырмаларына сәйкес Бас прокуратура өткізілген Қазақстан Республикасы Парламенті Мәжілісінің және мәслихаттарының депутаттарын сайлау барысында заңдылықтың сақталуын қамтамасыз ету бойынша барлық қажетті шараларды қабылдады, деп хабарлады Бас прокуратураның ресми өкілі Нұрдәулет Сүйіндіков.
Сейсенбі, 17 қаңтар 2012 7:47
Конституцияға және Елбасының тапсырмаларына сәйкес Бас прокуратура өткізілген Қазақстан Республикасы Парламенті Мәжілісінің және мәслихаттарының депутаттарын сайлау барысында заңдылықтың сақталуын қамтамасыз ету бойынша барлық қажетті шараларды қабылдады, деп хабарлады Бас прокуратураның ресми өкілі Нұрдәулет Сүйіндіков.
Оның айтуынша, электораттық кезеңде барлық сайлау процесіне қатысушылардың заңнама талаптарын және азаматтардың конституциялық құқықтарын мүлтіксіз сақтаулары прокуратура органдары жұмысының басты бағыты болған. Әрбір заң бұзушылық туралы хабарлама мұқият тексеріліп, олар расталған жағдайда бұзылған құқықтарды қалпына келтіріп, кінәлі адамдарды заңмен белгіленген жауапкершілікке тартуға бағытталған шаралар қолданылыпты.
Атап айтқанда, сайлау жарияланған күннен бастап прокурорлар 76 қадағалау актісін енгізді. Оның ішінде, бұқаралық ақпарат құралдарында сайлау заңнамасын түсіндірумен 1 үндеу жасалды, заң бұзушылықты жою туралы 2 ұсыныс енгізілді, заңды бұзуға жол бермеу туралы 28 алдын ала ескерту жасалды, әкімшілік құқық бұзушылық туралы 45 іс қозғалды. Алайда, заңнаманың кейбір талаптарының бұзылуы жекелеген жағдайларда орын алғанымен, олар дауыс беру қорытындыларына әсерін тигізген жоқ, деді Н.Сүйіндіков.
Оның сөзіне қарағанда азаматтардың сайлау құқықтарын өрескел бұзу фактілері анықталған жоқ. Төтенше жағдай режіміндегі Жаңаөзен қаласында да сайлау тыныш өткенін айта кеткен жөн. Сайлауға қатысты қандай да бір жағдайлар мен оқиғалар орын алмаған. Бұл ретте қаладағы сайлаушылар едәуір жоғары белсенділік танытты (63,6 % келген).
* * *
Енді жеке және заңды тұлғалардың өтініштері мен шағымдарын қарау нәтижелеріне тікелей тоқтап кетейін, деп жалғады сөзін ресми өкіл. Сайлау кезеңінде, дауыс беру күнін қоса алғанда 104 прокуратура органдарына 536 арыз-шағым түсті, олардың 64-і Парламент Мәжілісінің, 472-сі мәслихаттар сайлауына қатысты. Заң бұзушылықтар туралы ақпараттардың негізгі бөлігі тиісті тексерулер барысында өз дәлелін тапқан жоқ.
Заң бұзушылықтар туралы хабарламалар жекелеген жағдайларда ғана негізді және шынайы болып шықты. Әрбір осындай факт бойынша заңнамамен қарастырылған шаралар қолданылды.
Мысалы, Солтүстік Қазақстан облыстық мәслихаты депутаттығына кандидат Е.Әбиевтің хабарламасы бойынша В.Н.Суржиков үгiтке тыйым салынған кезеңде оны жүргiзгені үшін әкімшілік жауапкершілікке тартылды.
Дауыс беру күні де жекелеген заң бұзушылықтар орын алған. Атап айтқанда, Алматы қаласындағы №225 сайлау учаскесінің хатшысы Иса сайлаушы Енкебаеваға оның отбасының келмеген үш мүшесі үшін бюллетеньдер берген.
Осы тектес сайлаушыға келмеген отбасы мүшелері үшін бюллетеньдер беру фактісі Степногор қаласындағы сайлау учаскелерінің бірінде де орын алған.
* * *
Талдау заң бұзушылықтар туралы арыз-шағымдардың басым бөлігі (60 немесе 11%) прокуратураға Бақытжан Төреғожина басқаратын «Ар. Рух. Хақ» қоғамдық қорынан түскенін көрсетті, деді әрі қарай Н.Сүйіндіков. Аталған арыз-шағымдар бір мезгілде интернет-сайтқа орналастырылып, «заң бұзушылықтар картасына» жинақталған. Дауыс беру күнінің соңында аталған интернет-картада сайлау заңнамасының бұзылуы туралы 300-ге жуық хабарлама орналастырылған. Қазірге біз олардың 296-сын тексердік. 281 жағдайда (немесе 95%) сайтта орналастырылған ақпарат дәлелденген жоқ.
11 қаңтарда сайтта Қызылорда облысы Мыңшоқы кентінің №397 орта мектебінің директоры Сәрсенбаева Сәуле сынып жетекшілеріне «Нұр Отан» партиясының кандидаттарына дауыс беруді оқушылардың ата-аналарының назарына жеткізуге мәжбүрлегені туралы хабарлама жарияланған, деді одан әрі ресми өкіл. Сондай-ақ осы хабарламада «Айбын» колледжінің директоры Тимур Балаимов оқытушыларын «Нұр Отанға» дауыс беру үшін 10 туыстарын немесе жақын достарын алып келуге мәжбүрлегені көрсетілген. Алдындағы жағдайлардағыдай, Қызылорда облысында мұндай оқу орындары жоқ екендігі анықталды. Облыстағы басқа білім беру мекемелерінде де аталған адамдар басшылық етпейді.
Ресми өкіл үстіміздегі жылдың 13 қаңтарында сайтта аудан әкімінің нұсқауы бойынша тұрғындарды «Нұр Отан» үшін дауыс беруге үгіттеген Астана қаласындағы «Астик» пәтер иелері кооперативінің төрағасы В.Горовиковтың заңсыз әрекеттері туралы ақпарат жарияланғанын да айтты. Тексеру барысында Астанада «Астик» пәтер иелері кооперативі жоқ екендігі анықталған. Сондай-ақ, сайтта Шымкент қаласының №96 сайлау учаскесінің төрағасы Азамат Сарыханов дауыс беру күні мас екендігі туралы ақпарат орналастырылыпты. Тексеру барысында аталған учаскеде комиссия төрайымы Насия Алтаева екендігі, ал Сарыхановтың комиссия мүшелерінің ішінде жоқ екендігі анықталған. Осы тектес Тараз қаласындағы №82 сайлау учаскесінің төрағасы Әмір Ниязқұловтың мас екендігі туралы хабарлама да расталмапты.
Н.Сүйіндіковтің сөзінен сайтта сайлау учаскелерінің уақытында ашылмауы туралы хабарламалар орналастырылғаны да белгілі болды. Атап айтқанда, Өскемен қаласындағы №90 және Шымкент қаласындағы №94 учаскелер көрсетіліпті. Алайда, аталған учаскелер белгіленген мерзімде және халықаралық байқаушылардың қатысуымен ашылғандығы анықталған.
Бұл тізімді, дейді ресми өкіл, ондаған ұқсас мысалдар келтіре отырып жалғастыруға болады.
* * *
Сайлау күнінде түрлі ақпарат көздерінде дауыс беру жәшіктеріне жаппай бюллетеньдерді тастау туралы хабарламалар болған, деді әрі қарай Н.Сүйіндіков. Тексерулермен бюллетеньдерді жаппай тастау тетігін қолдануды қоса алғанда, дауыс беру процедурасына заңсыз араласуға әрекет жасау жағдайлары орын алғандығы анықталды. Қазіргі кезде бұл әрекеттер арандатушылық сипатқа ие. Мысалы, Алматы қаласының Әуезов ауданындағы №426 сайлау учаскесінде белгісіз ер адам жәшікке бюллетеньдерді жаппай тастап, оны ұстау кезінде жасырынып үлгерген. Алайда, байқаушылардың қатысуымен жәшіктерді ашқан кезде қастық жасаушы бюллетеньдер емес, бюллетеньдерге ұқсас өзі жасаған түсті қағаздардың парақтарын тастағандығы анықталды.
Бұрын хабарланғандай, Оңтүстік Қазақстан облысының Түркістан қаласында дауыс беру күні белгісіз адамдардың сайлау бюллетеньдерін ашық түрде ұрлау фактісі орын алған. Көшпелі комиссия мүшелері сайлау учаскесінде дауыс беруге мүмкіндігі жоқ мүгедектердің үйлерін аралау кезінде анықталмаған тұлғалар олардың қолдарынан 27 бюллетеньді тартып алып, белгісіз бағытта жасырынған. Бұл жағдай ұрланған бюллетеньдерді қаланың сайлау учаскелерінде әрі қарай дауыс беру кезінде заңсыз қолдану мүмкіндігін туғызды.
Алайда жедел шаралардың нәтижесінде барлық 27 бюллетеньдер табылып, сайлау учаскелеріне қайтарылды. Заң бұзушылықтарға жол берген кінәлілер заңмен белгіленген жауапкершілікке тартылатын болады, деді ресми өкіл.
* * *
Жалпы, бұған дейін атап көрсетілгендей, электораттық науқан мен дауыс беру күні қалыпты жағдайда өтті. Азаматтардан дауыс беруге қатысу құқығын іске асыруда кедергі жасалғаны туралы өтініштер мен шағымдар түскен жоқ.