Алайда, атынан аңыз ерген спортшы арада ай өтпей жатып сүйікті спортынан қол үзе алмайтыны туралы жарты әлемге жар салды. Конордың бұл шешімін сарапшылар сан-саққа жүгіртуде. Бірі бұл кезекті жарнамалық қадам десе, енді біреулер Конордың ММА-ге деген махаббаты деп топшылауда.
Есімі әлем спортындағы ең танымал спортшылардың санатында аталатын Конор МакГрегор ММА талабы бойынша өзінің соңғы кездесуін өткен жылдың қазан айында өткізіп, ресейлік Хабиб Нурмагамедовке есе жіберген болатын. Спорт жанкүйерлері қос көкжалдың қайта айқасуын асыға күтуде. Сөздеріне қарағанда, шаршы алаңда қайта жүздесуге екі спортшы да қарсы емес. Дегенмен бұл - UFC-дің құзырындағы мәселе.
